ເມືອງທ່າແຕງ ທຳລາຍສິນຄ້າໝົດອາຍຸການນຳໃຊ້ມູນຄ່າ 7 ລ້ານກວ່າກີບ

ຕອນເຊົ້າວັນ 12 ພຶດສະພາ 2020 ນີ້ຢູ່ທີ່ໜ້າຫ້ອງການອຸດສາຫະກໍາ ແລະການຄ້າເມືອງທ່າແຕງ ແຂວງເຊກອງ ໄດ້ຈັດພິທີທຳລາຍສິນຄ້າໝົດອາຍຸ, ສິນຄ້າເຊື່ອມຄຸນ, ສິນຄ້າປອມແປງລອກຮຽນແບບແລະສິນຄ້າທີ່ນຳເຂົ້າບໍ່ຖືກຕ້ອງ, ໂດຍມີທ່ານ ສຸພົນ ໄຊສະຫງ່າ ຮອງເຈົ້າເມືອງທ່າແຕງ, ມີທ່ານ ຄອນສະຫວັນ ພັນໂຊດຫົວໜ້າຫ້ອງການອຸດສາຫະກໍາ ແລະການຄ້າເມືອງທ່າແຕງ ພ້ອມດ້ວຍພາກສ່ວນທີ່ກ່ຽວຂ້ອງພາຍໃນເມືອງທ່າແຕງເຂົ້າຮ່ວມ.

 ທ່ານ ບຸນຫຼາຍ ບຸບຜາພັນ ຮອງຫົວໜ້າຫ້ອງການອຸດສາຫະກໍາ ແລະການຄ້າເມືອງທ່າແຕງໃຫ້ຮູ້ວ່າ: ໂດຍປະຕິບັດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້ ແລະດຳລັດວ່າດ້ວຍການກວດກາການຄ້າເຈົ້າໜ້າທີ່ກວດກາການຄ້າໄດ້ເອົາໃຈໃສ່ປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ໃນການຕິດຕາມກວດກາ ແລະ ສະ ກັດກັ້ນບັນດາຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍຢ່າງເປັນປົກກະຕິເພື່ອເຮັດໃຫ້ສັງຄົມມີຄວາມສະຫງົບ, ຊີວິດການເປັນຢູ່ຂອງພໍ່ແມ່ປະ ຊາຊົນໄດ້ຮັບການບໍລິໂພກ ແລະອຸປະໂພກ, ສິນຄ້າທີ່ມີຄຸນນະພາບ, ສິນຄ້າໄດ້ມາດຕະຖານ ແລະປອດໄພຕໍ່ສຸຂະພາບ, ຊຶ່ງນັບແຕ່ເດືອນຕຸລາປີ 2018 ຫາເດືອນເມສາ 2020 ຫ້ອງການອຸດສາຫະກໍາ ແລະການຄ້າເມືອງທ່າແຕງໄດ້ເປັນເຈົ້າການເອົາໃຈໃສ່ປະສານສົມທົບກັບບັນດາຂະແໜ່ງການທີ່ກ່ຽວຂ້ອງຂັ້ນເມືອງພ້ອມກັນເປັນເຈົ້າ ການຈັດຕັ້ງປະຕິບັດຕາມລະບຽບກົດໝາຍທີ່ກ່ຽວຂ້ອງຢ່າງເຂັ້ມງວດກັບການກວດກາສິນຄ້າທີ່ບໍ່ຖືກຕ້ອງ, ສິນຄ້າໝົດອາຍຸການນຳໃຊ້ເຂົ້າມາຈຳໜ່າຍພາຍໃນເມືອງທ່າແຕງ,ໂດຍຈຸດປະສົ່ງການທຳລາຍສິນຄ້າຄັ້ງນີ້ເພື່ອແນໃສ່ປົກປ້ອງຜູ້ດຳເນີນທຸລະກິດທີ່ຖືກຕ້ອງຕາມລະບຽບກົດໝາຍ ແລະເປັນການປົກປ້ອງຜູ້ຊົມໃຊ້, ຜູ້ບໍລິໂພກໃນສັງ ຄົມໃຫ້ໄດ້ ຊົມໃຊ້ສິນຄ້າທີ່ຖືກຕ້ອງແລະມີຄຸນນະ ພາບທີ່ດີ, ສິນຄ້າທີ່ນຳມາທຳລາຍໃນ ຄັ້ງນີ້ປະກອບມີ: ສິນຄ້າອຸປະໂພກ-ບໍລິ ໂພກໝົດອາຍຸການນຳໃຊ້ທີ່ກວດພົບຈຳ ນວນ 28 ຮ້ານມີ 9 ລາຍການຄື: ນໍ້າແປັບຊີ, ເຂົ້າໜົມ, ນົມຜົງ, ນົມກ໋ອງ, ນົມສົ້ມ, ເຄື່ອງສໍາອາງ, ນົມແລັກຕາຊອຍ-ນົມໄວຕາມິວ, ໝີສໍາເລັດຮູບ ແລະ ຖ່ານໄຟສາຍລວມມູນຄ່າທັງໝົດ 7 ລ້ານກວ່າກີບ, ພ້ອມນີ້ເຈົ້າໜ້າທີ່ໄດ້ພ້ອມກັນຈູດທໍາລາຍຖີ້ມຢ່າງເປັນທາງການ.

_____________

ຂຽນໂດຍ: ພອນ ບຸນອຸທິດ     

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 14/05/2020