ສູນກັກກັນທົ່ວແຂວງວຽງຈັນມີຄວາມພ້ອມຮັບແຮງງານຮອບ 2

  ເພື່ອສືບຕໍ່ຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີເລກທີ 06/ນຍ ລົງວັນທີ 29 ມີນາ 2020, ແຈ້ງການເລກທີ 507/ຫສນຍ ແລະບັນດາມາດຕະການໃນການຕ້ານ ແລະຄວບຄຸມການລະບາດຂອງພະຍາດໂຄວິດ-19 ຢ່າງ ເຂັ້ມງວດຄະນະສະເພາະກິດແຂວງວຽງຈັນໄດ້ກຳນົດ ແລະກະກຽມຄວາມພ້ອມຂອງສູນກັກກັນເພື່ອຮອງຮັບແຮງງານ, ນັກສຶກສາ ແລະບັນດາຊ່ຽວຊານທີ່ຈະເດີນຈາກຕ່າງປະເທດເຂົ້າມາແຂວງວຽງຈັນໃຫ້ພຽງພໍ ແລະຖຶກຕ້ອງຕາມມາດຖານທີ່ກຳນົດໄວ້.


   ໃນວັນທີ່ 11 ພິດສະພາ ທີ່ສູນກັກກັນແຮງງານຂອງຂັ້ນແຂວງວຽງຈັນ (ເມືອງໂພນໂຮງ) ໄດ້ມີການຮັບເແຮງງານລາວທີ່ກັບຈາກປະເທດໄທຈາກສູນຫຼັກ 27 ນະ ຄອນຫຼວງວຽງຈັນ ຈຳນວນ 26 ຄົນ, ຍິງ 17 ຄົນ ແລະຕໍ່ສົ່ງໄປຫາບັນ ດາສູນພາຍໃນແຂວງທີ່ໄດ້ກໍານົດໄວ້ເພື່ອ ສືບຕໍ່ກັກກັນຕິດຕາມສຸຂະພາບໃຫ້ຄົບ 14 ວັນ ໃນນີ້ສົ່ງໃຫ້ສູນກັກກັນເມືອງຊະນະຄາມເພີ່ມອີກ 6 ຄົນ, ຍິງ 4 ຄົນ ລວມເປັນ 31 ຄົນ, ຍິງ 14ຄົນ, ສູນກັກກັນເມືອງວັງ ວຽງ 7 ຄົນ ຍິງ 3 ຄົນ ແລະ ສູນເມືອງ ໂພນໂຮງ 13 ຄົນ, ຍິງ 10 ຄົນ, ລວມທັງໝົດທົ່ວແຂວງໄດ້ຮັບແຮງງານເຂົ້າສູນແລ້ວທັງໝົດ 51 ຄົນ, ຍິງ 27ຄົນ.


  ໂດຍມີທ່ານ ອີນປອນ ມະນີແສງ ຫົວໜ້າພະແນກສາທາລະນະສຸກແຂວງວຽງຈັນທັງເປັນຮອງຫົວໜ້າຄະນະສະເພາະກິດຂອງແຂວງລົງຕິດຕາມ ແລະໃຫ້ຄຳແນະ ນຳໃຫ້ຄວາມຮູ້ແກ່ແຮງງານຈຳນວນດັ່ງກ່າວໃນການດຳລົງຊີວິດໃນຊ່ວງເວລາກັກກັນໂຕເອງ ໂດຍໄດ້ເນັ້ນໃຫ້ເຂົາເຈົ້າຕ້ອງໄດ້ພ້ອມກັນປະຕິບັດບັນດາມາດຕະການໃນການຈຳກັດບໍລິເວນຂອງຕົນຢ່າງເຂັ້ມງວດຕາມທີ່ໄດ້ກຳນົດໄວ້.


  ທົ່ວແຂວງວຽງຈັນແມ່ນກຳນົດສູນກັກກັນຢູ່ 3 ສູນໃຫຍ່ຄື: ສູນເມືອງໂພນໂຮງແມ່ນກຳນົດເອົາສູນບຳບັດ ແລະຟື້ນຟູຜູ້ຕິດຢາເສບຕິດ, ສູນເມືອງວັງວຽງແມ່ນ ກຳ ນົດເອົາສູນບຳລຸງຄູ ແລະສູນເມືອງຊະນະຄາມແມ່ນກຳນົດເອົາໂຮງຮຽນອະນຸບານບ້ານສີພູມທັງສາມສູນແມ່ນສາມາດຮອງຮັບແຮງງານໄດ້ທັງໝົດປະມານ 90 ຄົນ ປະຈຸບັນກຽມຄວາມພ້ອມດ້ານບຸກຄະລາກອນການແພດ, ອຸປະກອນການແພດ ແລະເຈົ້າໜ້າທີ່ຝ່າຍຕ່າງໆເພື່ອຕິດຕາມກວດກາວັດແທກອຸນນະພູມ, ການເກັບຕົວ ຢ່າງຜູ້ສົງໄສໄປວິເຄາະຫາເຊື້ອ, ການສະໜອງເຄື່ອງອຸປະໂພກບໍລິໂພກ, ສິ່ງອຳນວນຄວາມສະດວກ ແລະການຮັກສາຄວາມສະຫງົບເປັນລະບຽບຮຽບຮ້ອຍພາຍໃນແຕ່ ລະສູນແມ່ນສຳເລັດສົມບູນແລ້ວພ້ອມນີ້ກໍ່ໄດ້ກະກຽມກຽມຄວາມພ້ອມຖ້າຫາກມີແຮງງານເຂົ້າມາຫຼາຍເກີນຄວາມສາມາດຂອງແຕ່ລະສູນແມ່ນກຳນົດເອົາສະໂມສອນຂອງໂຮງຮຽນພະຍາບານສາດເຕັກນິກຂອງແຂວງເປັນບ່ອນຮອງຮັບຕື່ມອີກ.

แชร์