ເປີດໃຊ້ລະບົບລາຍງານທັນສະໄໝ

  ໃນຕອນແລງຂອງວັນທີ 8 ພຶດສະພາ 2020 ນີ້, ກະຊວງໄປສະນີໂທລະຄົມມະນາຄົມ ແລະການສື່ສານ (ປທສ) ຮ່ວມກັບບໍລິສັດ ເອັສເທັກ ພັດທະນາຈຳກັດ ໄດ້ຈັດພິທີເປີດການນຳໃຊ້ລະບົບລາຍງານທັນສະໄໝຮັບໃຊ້ການນຳຂຶ້ນທີ່ຫ້ອງປະຊຸມໃຫຍ່ຊັ້ນ 1 ຕຶກ F, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ນະຄອນຫຼວງວຽງຈັນ ໂດຍການເປັນປະທານເປີດງານໂດຍ ທ່ານ ປອ ທະວີສັກ ມະໂນທັມ, ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ, ມີຄະນະຜູ້ບໍລິຫານຈາກເອັສເທັກພັດທະນາ ຈຳກັດ, ຄະນະກົມ/ທຽບເທົ່າກະຊວງ ປທສ ເຂົ້າ ຮ່ວມ.
ກະຊວງ ປທສ ໃນນາມເປັນຜູ້ຄຸ້ມຄອງມະຫາພາກດ້ານວຽກງານຫັນໃຫ້ເປັນທັນສະໄໝ ແລະດິຈິຕອລຂອງລັດຖະບານເຫັນໄດ້ຄວາມສຳຄັນຕໍ່ວຽກງານການລາຍງານຕົວເລກສະຖິຕິດ້ານວຽກງານໂທລະຄົມມະນາຄົມ ແລະການສື່ສານຈຶ່ງໄດ້ຮ່ວມມືກັບບໍລິສັດເອັສເທັກ ພັດທະນາ ຈຳກັດ ໃນປີ 2018 ພັດທະນາລະບົບລາຍງານທັນສະ ໄໝຮັບໃຊ້ການນຳ ຫຼື Minister Dashboard ເພື່ອອຳນວຍຄວາມສະດວກໃຫ້ແກ່ຄະນະນຳຂອງກະຊວງ ປທສ ໃນການຕິດຕາມອັດຕາການນຳໃຊ້ລະບົບເຕັກໂນ ໂລຊີການສື່ສານຂໍ້ມູນຂ່າວສານເຊັ່ນ: ການນຳໃຊ້ອິນເຕີເນັດ, ໂທລະສັບ ແລະອື່ນໆ ເພື່ອເປັນຂໍ້ມູນໃນການວາງແຜນ ແລະຕັດສິນໃຈ ຫຼືສາມາດນຳເອົາຂໍ້ມູນດັ່ງກ່າວໄປຜັນຂະຫຍາຍ ແລະນຳໃຊ້ຕໍ່ໄດ້ລະບົບດັ່ງກ່າວຍັງໄດ້ມີການພັດທະນາໃຫ້ຮອງຮັບກັບວຽກງານການປ້ອງກັນ ແລະຕ້ານການແຜ່ລະບາດຂອງເຊື້ອພະຍາດ CO VID-19 ທີ່ໄດ້ມີການລາຍງານຂໍ້ມູນສະຖິຕິຈຳນວນຜູ້ຕິດເຊື້ອພະຍາດໂຄວິດ19 ຢູ່ ສປປ ລາວ, ອາຊຽນ ແລະ ສາກົນໂດຍສາມາດເຂົ້າເບິ່ງໄດ້ຜ່ານເວັບໄຊ www.covid19.gov.la.


  ສຳລັບແຜນການໃນຕໍ່ໜ້າກະຊວງ ປທສ ກໍ່ຈະສືບຕໍ່ຜັນຂະຫຍາຍ ແລະພັດທະນາລະບົບດັ່ງກ່າວໃຫ້ກາຍເປັນລະບົບຕົວແບບໃຫ້ແກ່ຂະແໜງການຕ່າງໆ ເຊັ່ນ: ບັນ ດາກະຊວງ ແລະອົງການຈັດຕັ້ງພາກລັດໃນການອຳນວຍຄວາມສະດວກສ້າງລະບົບລາຍງານຂໍ້ມູນສະຖິຕິໃນຂະແໜງການຂອງຕົນ.

--------------

ຂຽນໂດຍ: ສູນບໍລິຫານລັດດ້ວຍເອເລັກໂຕຣນິກ    

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์