ກອງຄຸ້ມຄອງພາສີ VII ປະຕິບັດວຽກງານຢ່າງຕັ້ງໜ້າ

  ກອງຄຸ້ມຄອງພາສີ VII ຊຶ່ງກວມເອົາ 4 ແຂວງ, ສ້າງຕັ້ນຂຶ້ນໃນວັນທີ 10 ຕຸລາ 2017 ຕາມຂໍ້ຕົກລົງຂອງລັດຖະມົນຕີກະຊວງການເງິນສະບັບເລກທີ 2826/ກງ, ລົງວັນທີ 22 ສິງຫາ 2017.
  ຊຶ່ງນັບແຕ່ມື້ສ້າງຕັ້ງເປັນຕົ້ນມາການຈັດຕັ້ງປະຕິບັດວຽກງານວິຊາສະເພາະຂອງພະນັກງານ-ເຈົ້າໜ້າທີ່ພາສີທີ່ຂຶ້ນກັບກອງຄຸ້ມຄອງພາສີ VII ມີລັກສະນະຕັ້ງໜ້າ, ສະແດງອອກໃນການປະຕິບັດລາຍເຂົ້າງົບປະມານເພີ່ມຂຶ້ນທຸກປີໂດຍສະເພາະໃນປີ 2019 ຜ່ານມາສາມາດປະຕິບັດລາຍຮັບໄດ້ທັງໝົດ 789 ຕື້ກວ່າກີບ, ສ່ວນປີ 2020 ໄດ້ຮັບຕົວເລກແຜນການທັງໝົດ 850,7 ຕື້ກີບ.
  ທ່ານ ແກ້ວອຸດອນ ພາລີຈັນ ຮອງຫົວໜ້າກອງຄຸ້ມຄອງພາສີ VII ໃຫ້ສໍາພາດຂອງກັບຂ່າວການເງິນໃນຫວ່າງບໍ່ດົນນີ້ວ່າ: ກອງຄຸ້ມຄອງພາສີ VII ປະກອບມີ 4 ແຂວງພາກໃຕ້ຂຶ້ນກັບ (ແຂວງຈຳປາສັກ, ແຂວງສາລະວັນ, ແຂວງເຊກອງ, ແຂວງອັດຕະປື), ມີຂະແໜງສັງກັດກອງຄຸ້ມຄອງ, ດ່ານພາສີສາກົນ 5 ດ່ານ, ດ່ານ ພາສີທ້ອງຖິ່ນ 2 ດ່ານ, ດ່ານພາສີປະເພນີ 9 ດ່ານ.
  ສຳລັບປີ 2020 ກອງຄຸ້ມຄອງພາສີ VII ໄດ້ຮັບຕົວເລກແຜນການທັງໝົດ 850,7 ຕື້ກວ່າກີບ ໃນນັ້ນ, ໄດ້ແບ່ງແຜນການເກັບລາຍຮັບແຕ່ລະງວດ,ແຕ່ຜ່ານການຈັດຕັ້ງປະຕິບັດນັບແຕ່ວັນທີ 1 ມັງກອນ ຫາ ວັນທີ 23 ມີນາ 2020, ສາມາດເກັບລາຍຮັບໄດ້ 186,29 ຕື້ກີບ ເທົ່າກັບ 21,90% ຂອງແຜນການປີຊຶ່ງໝວດສິນຄ້າລາຍຮັບຕົ້ນຕໍໄດ້ຈາກຄ່າຊັກພິເສດ, ນໍ້າມັນເຊື້ອໄຟ, ພາຫະນະ, ຊິ້ນສ່ວນ-ອາໄຫຼ່, ວັດສະດຸກໍ່ສ້າງ, ເຄື່ອງໃຊ້ໄຟຟ້າ, ເຄື່ອງອຸປະໂພກ-ບໍລິໂພກ, ຄ່າທຳນຽມ, ການນໍາເຂົ້າເພື່ອສົ່ງອອກ, ກະແສໄຟຟ້າ ແລະສິນຄ້າອື່ນໆ.
  ແນວໃດກໍຕາມສຳລັບແຜນງົບປະມານປີ 2020 ເຖິງແມ່ນວ່າເປັນຕົວເລກທີ່ສູງພໍສົມຄວນບວກກັບສະພາບເສດຖະກິດມີການຊໍລໍຕົວ, ການລະບາດຂອງເຊື້ອພະຍາດໂຄວິດ-19 ສົ່ງຜົນກະທົບຕໍ່ການເກັບຄ່າທຳນຽມຜູ້ໂດຍສາຍໂດຍສະເພາະຢູ່ບັນດາດ່ານທ້ອງຖິ່ນ, ດ່ານປະເພນີ, ແຕ່ຄະນະກອງກອງຄຸ້ມຄອງພາສີ VII, ເຈົ້າໜ້າທີ່ໝົດທຸກຄົນໄດ້ວາງຄາດໝາຍສູ້ຊົນເກັບລາຍຮັບໂດຍຈະສຸມໃສ່ທຸກທ່າແຮງທີ່ບົ່ມຊ້ອນ, ເພື່ອໃຫ້ບັນລຸຕາມແຜນການທີ່ໄດ້ຮັບມອບໝາຍ.


  ນອກນັ້ນ, ຍັງເພີ່ມທະວີການນໍາໃຊ້ເຄື່ອງມືທີ່ທັນສະໄໝນໍາໃຊ້ເຂົ້າໃນການຄຸ້ມຄອງຈັດເກັບລາຍຮັບເປັນຕົ້ນລະບົບແຈ້ງພາສີຜ່ານທາງເອເລັກໂຕຼນິກ (ASYCUDA) , ການສໍາລະພາສີຜ່ານທະນາຄານ (Smart Tax), ມີເຄື່ອງມືກວດນັບນໍ້າມັນ (E-Meter), ເຄື່ອງມືກວດກາດ້ວຍລະບົບສາຍແສງ (Scanner), ປະສານສົມທົບກັບອໍານາດການປົກຄອງທ້ອງຖິ່ນ ແລະຂະແໜງການທີ່ກ່ຽວຂ້ອງ, ເພື່ອເຮັດໃຫ້ການຈັດເກັບລາຍຮັບມີຄວາມໂປ່ງໃສ, ວ່ອງໄວ, ສາມາດກວດສອບໄດ້.

แชร์