ສະຫະກອນສົ່ງເສີມກະສິກຳເມືອງຫົງສາ ຝຶກອົບຮົມປ່ຽນຮູບໝາກເມລ່ອນ

  ຝ່າຍພັດທະນາສັງຄົມບໍລິສັດ ໄຟຟ້າຫົງສາ ຈຳກັດ ຮ່ວມກັບມະຫາວິທະຍາໄລເຕັກໂນໂລຊີມົງ ຄົນລ້ານນານ່ານປະເທດໄທຈັດຝຶກອົບຮົມ “ການປ່ຽນຮູບພະລິດຕະພັນຈາກໝາກເມລ່ອນ” ໃຫ້ກັບສະມາຊິກຜູ້ປຸງແຕ່ງຜະລິດຕະພັນຂອງສະຫະກອນສົ່ງເສີມກະສິກຳເມືອງຫົງສາ ແຂວງໄຊຍະບູລີໃນລະຫວ່າງວັນທີ 3-5 ກຸມພາ 2019 ທີ່ຫ້ອງການພາກສະໝາມຝ່າຍພັດທະນາສັງຄົມບ້ານນາແກ່ນຄຳ ເມືອງຫົງສາ ໂດຍການເປັນວິທະຍາໄລກອນສອນ ດຣ ປິຍະນຸດ ລົດເຄືອ ອາຈານສາຂາວິຊາວິທະຍາສາດ ແລະເຕັກໂນໂລຊີການອາຫານ ພ້ອມດ້ວຍຄະນະ.

  ຫຼັກສູດການຝຶກອົບຮົມໃນຄັ້ງນີ້ແມ່ນເນັ້ນເລື່ອງການນຳເອົາໝາກເມລ່ອນມາປ່ຽນຮູບເປັນຜະລິດຕະ ພັນຕ່າງໆທີ່ມີລົດຊາດແຕກຕ່າງກັນເຊັ່ນ: ນ້ຳໝາກເມລ່ອນ, ໝາກເມລ່ອນອົບແຫ້ງ,  ວຸ້ນໝາກເມລ່ອນອົບແຫ້ງ ແລະກວນເມລ່ອນເພື່ອໃຫ້ສະມາຊິກກຸ່ມມີຄວາມຮູ້ຄວາມສາມາດໃນການປ່ຽນຮູບຜະລິດ ຕະພັນຈາກໝາກເມລ່ອນນຳໄປສູ່ການເປັນອາຊີບທາງເລືອກຂະຫຍາຍພະລິດຕະພັນສິນຄ້າປ່ຽນຮູບປະເພດຕ່າງໆອອກສູ່ຕະຫຼາດພາຍໃນ ແລະ ພາຍນອກ ເມືອງຫົງສາຕໍ່ໄປ ແລະເປັນການເພີ່ມມູນຄ່າໃຫ້ຜະລິດຕະພັນທີ່ມາຈາກໝາກເມລ່ອນໃຫ້ເກີດຄວາມຫຼາກຫຼາຍ ແລະມີຄວາມໜ້າສົນໃຈຂອງຜູ້ບໍລິໂພກຫຼາຍຂຶ້ນ.

 ສໍາລັບສະຫະກອນສົ່ງເສີມກະສິກຳ ເມືອງຫົງສາ ແຂວງໄຊຍະບູລີ ໄດ້ສ້າງຕັ້ງຂຶ້ນໃນປີ 2015 ໂດຍການຮ່ວມມືລະຫວ່າງບໍລິສັດໄຟຟ້າຫົງສາຈຳກັດກັບກົມສົ່ງເສີມກະສິກຳ ແລະສະຫະກອນ (DAEC) ສປປ ລາວ ແລະສະຫະກອນການກະເສດປະຕິຮູບທີ່ດິນທ່າວັງຜາ, ແຂວງນ່ານຣາຊອານາຈັກໄທໃຫ້ແກ່ຜູ້ຖືກຜົນກະທົບຈາກການກໍ່ສ້າງໂຄງການໂຮງໄຟຟ້າພະລັງງານຄວາມຮ້ອນຫົງສາເພື່ອປັບປຸງຊິີວິດການເປັນຢູ່ຂອງປະຊາຊົນທັງເປັນສູນລວບລວມຜົນຜະລິດກະ ສິກຳສົ່ງເສີມລາຍຮັບ ແລະ ເສດຖະກິດຄອບຄົວຂອງສະມາຊິກໃຫ້ມີຄວາມເຂັ້ມແຂງໄປພ້ອມກັບການສົ່ງເສີມດ້ານວິຊາການ ແລະ ການຊ່ວຍເຫຼືອເຊິ່ງກັນ ແລະ ກັນທັງຍັງເປັນການສົ່ງເສີມການຜະລິດ, ການປຸງແຕ່ງໃຫ້ເປັນສິນຄ້າ ແລະ ຕອບສະໜອງໄດ້ຢ່າງຕໍ່ເນື່ອງໂດຍເນັ້ນໃສ່ການຜະລິດແບບປອດສານພິດ ແລະການປຸງແຕ່ງຜົນຜະລິດກະສິກຳ.

  ປະຈຸບັນສະຫະກອນດັ່ງກ່າວມີສະມາຊິກທັງໝົດ 138 ຄອບຄົວໄດ້ແບ່ງອອກເປັນ 10 ກຸ່ມຄື: ກຸ່ມສົ່ງເສີມກະສິກໍາສະອາດ, ພັດທະນາໄມ້ປ່ອງ, ຕັດຫຍິບ, ປຸງແຕ່ງຜົນຜະລິດກະສິກໍາ, ປູກຝ້າຍ, ປູກພືດຜັກສະອາດ, ປູກເຫັດ, ລ້ຽງສັດໃຫຍ່, ລ້ຽງໝູ ແລະກຸ່ມປຸງແຕ່ງຜະລິດຕະພັນແຈ່ວ.

แชร์