ຜົນແກ້ໄຂຫຍໍ້ທໍ້ຢູ່ບໍ່ຄຳ ຄຳເກີດ-ແສນອຸດົມ

  ຄະນະສະເພາະກິດແກ້ໄຂປະກົດການຫຍໍ້ທໍ້ຂັ້ນແຂວງ, ຂັ້ນເມືອງທີ່ປະຈໍາຢູ່ບໍ່ຄໍາຄໍາເກີດ-ແສນອຸດົມ ເມືອງຄໍາເກີດ ແຂວງບໍລິຄໍາໄຊ ໄດ້ສະຫຼຸບຕີລາຄາຄືນການຈັດຕັ້ງປະຕິບັດວຽກງານແກ້ໄຂປາກົດການຫຍໍ້ທໍ້ທີ່ເກີດຂຶ້ນຢູ່ບໍ່ຄໍາຄໍາເກີດ-ແສນອຸດົມ, ຂຶ້ນໃນວັນທີ 5 ພຶດສະພາ 2020, ໂດຍການເປັນປະທານຂອງ ທ່ານ ພັນໂທ ຄໍາແພງ ນໍາພາວັນປະທານກວດກາຄະນະພັກຮອງຫົວໜ້າກອງບັນຊາການ ປກສ ແຂວງ, ມີທ່ານ ພັນໂທ ລໍາເງິນ ພະບາດໄຊ ກໍາມະການພັກເມືອງເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງຄໍາເກີດ ຄະນະສະເພາະກິດແກ້ໄຂປາກົດການຫຍໍ້ທໍ້ຂັ້ນແຂວງ, ມີຄະນະສະເພາະກິດຈາກກອງບັນຊາການທະຫານແຂວງ, ກໍາລັງກອງບັນຊາການ ປກສ ແຂວງ, ຄະນະສະເພາະກິດຂັ້ນເມືອງ, ຕະຫຼອດຮອດພະນັກງານວິຊາສະເພາະທີ່ປະຈໍາຢູ່ບໍ່ຄໍາຄໍາເກີດ-ແສນອຸດົມເຂົ້າຮ່ວມ.

ທ່ານ ພັນໂທ ລໍາເງິນ ພະບາດໄຊ ຫົວໜ້າກອງບັນຊາການ ປກສ ເມືອງຄໍາເກີດ ໄດ້ຜ່ານບົດລາຍງານການຈັດຕັ້ງເຄື່ອນໄຫວຂອງຄະນະສະເພາະກິດແກ້ໄຂປາກົດການຫຍໍ້ທໍ້ຢູ່ບໍ່ຄໍາ ຄໍາເກີດ-ແສນອຸດົມເລີ່ມແຕ່ວັນທີ່ 22 ເມສາ ຫາ ວັນທີ 5 ພືດສະເພາະ 2020 ພາຍຫຼັງໄດ້ຮັບການແຕ່ງຕັ້ງຈາກຂັ້ງເທິງຄະນະສະເພາະກິດກໍ່ໄດ້ເປີດກອງປະຊຸມປຶກສາຫາລື ແລະແບ່ງໜ້າວຽກໃຫ້ແຕ່ລະສະຫາຍຮັບຜິດຊອບ, ຫຼັງຈາກນັ້ນກໍ່ໄດ້ປະສານສົມທົບກັບບໍລິສັດເພື່ອເອົາຂໍ້ມູນການເສຍຫາຍ, ພ້ອມທັງຂຶ້ນບັນຊີຄັດຈ້ອນເປົ້າໝາຍ, ລົງກວດກາສະຖານທີ່ເກີດເຫດ, ຂຶ້ນບັນຊີກວດກາວັດຖຸສິ່ງຂອງທີ່ຄົນຮ້າຍລັກໄປ, ໄດ້ສົມທົບກັບກໍາລັງຂອງເຈົ້າໜ້າທີ່ທະຫານ ແລະຄະນະຮັກສາຄວາມປອດໄພຂອງບໍລິສັດລົງເກັບກູ້ຂອງກາງຄະດີລັກຂຸດແຮ່ຄໍາເຂດຍອດຫ້ວຍນໍ້າໄຫຼພູນໍ້າປານໄດ້ຈັກປັ່ນໄຟຟ້າຂະໜາດນ້ອຍ 7 ເຄື່ອງ, ອຸປະກອນທີ່ໃຊ້ໃນການຂຸດແຮ່ຄໍາ 12 ລາຍການ,ນໍາກໍາລັງເຂົ້າກວດຄົ້ນເຄຫາສະຖານຂອງ 10 ເປົ້າໝາຍທີ່ຜ່ານການຄັດຈ້ອນພົບເຫັນຂອງກາງປະເພດໂທລະພາບຈໍານວນ 12 ໜ່ວຍ,ສາຍທອງໄຟຟ້າ, ແຜ່ນທອງເຫຼືອງ, ອຸປະກອນການໃຊ້ໄຟຟ້າ ຈໍານວນ 487 ກິໂລກຼາມ, ພ້ອມ ກັກຜູ້ຖືກຫາໄດ້ 9 ຄົນມາດໍາເນີນຄະດີ,ນອກນັ້ນຍັງໄດ້ນໍາກໍາລັງເຂົ້າກວດຄົ້ນ ເຄຫາສະຖານທ້າວ ມາຍຫົງຟູ ອາຍຸ 46 ປີ, ຄົນສັນຊາດຫວຽດນາມ ທີ່ມາພັກເຊົາຢູ່ບ້ານແສນອຸດົມ ເມືອງຄໍາເກີດ ແຂວງບໍລິຄໍາໄຊ ທີ່ມີເຈດຕະນາຊຸກເຊື່ອງ,ຊື້-ຂາຍຊັບທີ່ບໍ່ຖືກຕ້ອງຕາມລະບຽບກົດໝາຍພົບເຫັນເຄື່ອງຂອງກາງປະເພດສາຍທອງໄຟຟ້າ, ແຜ່ນທອງ ແລະ ອຸປະກອນຮັບໃຊ້ການໄຟຟ້ານໍ້າໜັກລວມ 1.573 ກິ ໂລກຼາມ, ສົມທົບກັບກໍາລັງທະຫານແຂວງເຂົ້າກັກຕົວເປົ້າໝາຍລັກຂຸດແຮ່ຄໍາ ເຂດສໍາປະທານຂອງບໍລິສັດສາມາດກັກເປົ້າໝາຍໄດ້ 2 ຄົນ ພ້ອມຂອງກາງແຮ່ທາດ 5 ກິ ໂລກຼາມ, ຜ່ານການຈັດຕັ້ງປະຕິບັດຕົວຈິງກັກຕົວຜູ້ຖືກຫາໄດ້ 12 ຄົນ, ຄົນສັນຊາດຫວຽດນາມ 1 ຄົນ, ໃນນັ້ນຂໍ້ຫາລັກຊັບພົນລະເມືອງ 08 ຄົນ, ຂໍ້ຫາຊຸກເຊື່ອງ, ຊື-ຂາຍຊັບບໍ່ຖືກຕ້ອງ 2 ຄົນ, ຂໍ້ຫາລັກຂຸດແຮ່ຄໍາ 2 ຄົນ, ລວມຂອງກາງທີ່ເກັບກູ້ໄດ້ມີຄື: ໂທລະພາບ 12 ໜ່ວຍ,ໜ້າຈໍຄອມພິວເຕີ 01 ໜ່ວຍ, ສາຍໄຟຟ້າ, ອຸປະ ກອນໄຟຟ້າ, ສາຍທອງແດງ, ແຜ່ນທອງເຫຼືອງຈໍານວນ 2.062 ກິໂລກຼາມ, ແຮ່ຄໍາ 92 ກິໂລກຼາມ ມາສືບສວນ-ສອບສວນ ຕາມລະບຽບກົດໝາຍ.

ຂຽນໂດຍ: ພອນສະຫວັນ

แชร์