ເມືອງຕົ້ນເຜິ້ງ ຕິດຕາມຈຸດກັ່ນຕອງ ແລະຈຸດລາດຕະເວນຕາມຊາຍແດນ

 ໃນລະຫວ່າງວັນທີ 7-8 ພຶດສະພາຜ່ານມາຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການແຜ່ລະບາດພະຍາດໂຄວິດ-19 ເມືອງຕົ້ນເຜິ້ງ ແລະພະລາທິການກອງບັນຊາການ ປກສ ເມືອງນຳໂດຍທ່ານນາງ ສາຍຊົນ ອຸ່ນອົກ ຄະນະປະຈຳພັກເມືອງຮອງເຈົ້າເມືອງໆຕົ້ນເຜິ້ງທັງເປັນຫົວໜ້າຄະນະສະເພາະກິດຂັ້ນເມືອງໄດ້ລົງຊຸກຍູ້ຕິດຕາມພ້ອມທັງມອບເຂົ້າສານ ແລະນໍ້າດື່ມໃຫ້ທີມງານແພດໝໍ-ສາທາລະນະສຸກ, ປກຊ-ປກສ ທີ່ປະຈຳຢູ່ບັນດາຈຸດກວດກາ-ກັ່ນກອງຂອງເມືອງຕົ້ນເຜິ້ງເພື່ອສືບຕໍ່ປະຕິບັດມາດຕະການກັ່ນກອງຄົນເຂົ້າ-ອອກເມືອງຕາມແຈ້ງການຂອງທ່ານເຈົ້າເມືອງເລກທີ 004 ວ່າດ້ວຍມາດຕະການປ້ອງກັນ, ຄວບຄຸມ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ເປັນຕົ້ນແມ່ນດ່ານກວດຄົນເຂົ້າ-ອອກ ເມືອງເຂດທາງຫຼວງບ້ານມ່ວງຄຳ, ຈຸດກວດເຂດທາງຫຼວງນໍ້າເກິ່ງເກົ່າ, ຈຸດລາດຕະເວນ ຂອງກອງຫຼອນບ້ານຕາມຊາຍແດນເພຶ່ອປ້ອງກັນການລັກລອບນໍາເຂົ້າສິນຄ້າ ແລະລັກລອບຂ້າມຊາຍແດນຈຸດບ້ານໃຫຍ່ຕົ້ນເຜິ້ງ, ບ້ານຮົ່ມເຢັນ, ບ້ານໃຫຍ່ສີເມືອງງາມ ແລະສູນກັກກັນກຸ່ມສ່ຽງເຮືອນໂຊກດີ.


 ໂອກາດລົງຊຸກຍູ້ຕິດຕາມດັ່ງກ່າວທ່ານ ນາງ ສາຍຊົນ ອຸ່ນອົກ ຮອງເຈົ້າເມືອງໆຕົ້ນເຜິ້ງກໍ່ໄດ້ເນັ້ນໜັກໃຫ້ທີມງານແພດໝໍ-ສາທາລະນະສຸກ, ປກຊ-ປກສ, ກອງຫຼອນບ້ານທີ່ປະຈຳຢູ່ຈຸດກວດກາ-ກັ່ນກອງແຕ່ລະຈຸດທຸກສະຫາຍສືບຕໍ່ປະຕິບັດໜ້າທີ່ກວດກາ-ກັ່ນກອງຄົນເຂົ້າ-ອອກເມືອງລາດຕະເວນຕາມຊາຍແດນໂດຍສະເພາະ ແມ່ນໃຫ້ເອົາໃຈໃສ່ປ້ອງກັນບໍ່ໃຫ້ມີການເຂົ້າ-ອອກເມືອງຕົ້ນເຜິ້ງຂອງຄົນທີ່ມາຈາກແຂວງ ແລະປະເທດທີ່ມີການລະບາດຂອງພະຍາດໂຄວິດ-19 ຕາມແຈ້ງການເລກທີ 380 ຂອງຫ້ອງວ່າການແຂວງກໍ່ຄືແຈ້ງເລກທີ 004 ຂອງທ່ານເຈົ້າເມືອງວ່າດ້ວຍການສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະແກ້ໄຂການແຜ່ລະບາດພະ ຍາດໂຄວິດ-19 ໃນໄລຍະແຕ່ວັນທີ 4-17 ພຶດສະພາ ຈົນກວ່າຈະມີແຈ້ງການສະບັບສະບັບໃໝ່.

แชร์