ຜ່ອນຄາຍໂຄວິດໄປທ່ຽວຊົມຕາດຮ້ອຍຄົວກັນບໍ

  ເມື່ອເວົ້າເຖິງສະຖານທີ່ທ່ອງທ່ຽວເປີດຫູເປີດຕາສູດດົມອາກາດສົດໆ ຈາກຕົ້ນໄມ້ໃຫຍ່ອີກແຫ່ງທັດຈາກຕາດກວາງຊີແລ້ວກໍຕ້ອງແມ່ນນໍ້າຕົກຕາດຮ້ອຍຄົວເມືອງຈອມເພັດ ແຂວງຫຼວງພະບາງ, ຊຶ່ງມີກິດຈະກໍາຫຼາຍຢ່າງທີ່ກຽມໄວ້ຄອຍບໍລິການລູກຄ້າທີ່ເຂົ້າໄປທ່ຽວຊົມໃຫ້ປະທັບໃຈ ແລະມີຮອຍຍີ້ມເມື່ອໄດ້ມາສໍາພັດສະຖານທີ່ແຫ່ງນີ້.

 ທ່ານ ອາຄົມ ພົມມະຫານ ປະທານບໍລິສັດຜູ້ສໍາປະທານຕາດຮ້ອຍຄົວໄດ້ໃຫ້ສໍາພາດຕໍ່ສື່ຂ່າວເສດຖະກິດ-ສັງຄົມປະຈໍາ ແຂວງຫຼວງພະບາງ ວ່າງບໍ່ດົນນີ້ວ່າ: ຕາດຮ້ອຍຄົວແມ່ນໜຶ່ງສະຖານທີ່ທ່ອງທ່ຽວທາງທໍາະມຊາດທີ່ສວຍສົດງົດງາມອີກແຫ່ງໜຶ່ງຂອງເມືອງຈອມເພັດຊຶ່ງຕັ້ງຢູ່ຫ່າງຈາກເທສະບານເມືອງຈອມເພັດ ໄປທາງທິດຕາ ເວັນຕົກປະມານ 18 ກວ່າກິໂລແມັດ (ໄປຕາມເສັ້ນທາງເຊື່ອມຕໍ່ຫາແຂວງໄຊຍະບູລີ) ປະຈຸບັນທາງບໍລິສັດພວກເຮົາໄດ້ປັບປຸງໃຫ້ມີຫຼາຍກິດຈະກໍາ, ເພື່ອໃຫ້ຜູ້ມາທ່ຽວຊົມພັກຜ່ອນໄດ້ສໍາພັດກັບບັນຍາກາດອັນສົດຊື່ນຂອງທໍາມະຊາດຕາດຮ້ອຍຄົວຢ່າງຫຼາກຫຼາຍສີສັນ ແລະພ້ອມນັ້ນສໍາລັບກິດຈະກໍາທີ່ຕາດຮ້ອຍຄົວມີກຽມໄວ້ຄອຍບໍລິການບັນດານັກທ່ອງທ່ຽວແຂກທັງພາຍໃນ ແລະຕ່າງປະເທດນັ້ນກໍຄື: ຂີ່ສະລິ້ງສໍາລັບຄົນທ້າທາຍກັບຄວາມສູງທີ່ແຂວນໄຕ່ໄປຕາມເຊືອກມັດຈ່ອງກັບຕົ້ນໄມ້ໃຫຍ່-ສູງ, ສ່ວນທາງພາກພື້ນດິນກໍມີສວນດອກໄມ້ໃຫຍ່ທີ່ປະດັບຕົບແຕ່ງຫລາຍສີສັນໄປຕາມລະດູການທີ່ສວຍງາມຕະການຕາໄວ້ຄອຍໃຫ້ທ່ຽວຊົມ ແລະຖ່າຍພາບໄວ້ເປັນທີ່ລະນຶກຕິດກ້ອງໄວ້ເບີ່ງເວລາກັບບ້ານ ແລະ ຫຼາຍຄົນທີ່ໄດ້ໄປທ່ຽວຕາດຮ້ອຍຄົວຕ່າງກໍເວົ້າວ່າມ່ວນທີ່ໄດ້ໄປສໍາພັດພາບບັນຍາກາດຂອງທໍາມະຊາດເຂດດັ່ງກ່າວເພາະເປັນເຂດປ່າໄມ້ໃຫຍ່, ມີອາກາດສົດຊື່ນກົມກືນກັບທໍາມະຊາດເໝາະແກ່ການໄປພັກຜ່ອນເພື່ອສ້າງສັນກັນກັບເພື່ອນຮັກ ແລະຄອບຄົວ, ພິເສດທາງຕາດຮ້ອຍຄົວຍັງມີໂຮມສະເຕເຮືອນ ພັກຜ່ອນ, ນອນໃນເຕັ້ນທ່າມກາງທຳມະຊາດກາງປ່າຕົ້ນໄມ້ໃຫຍ່ຫາກໃຜໄປນອນຊ່ວງນີ້ຈະໄດ້ຮັບສ່ວນຫຼຸດລາຄາກິດຈະກໍາພິເສດ    ເຖິງ 50%, ສໍາລັບກິດຈະກຳຂີ່ສະລີງແມ່ນຫຼຸດໃຫ້ 30%, ຟຼີ ລານຫຍ້າສຳລັບຫຼີ້ນກິດຈະກຳອອກກຳລັງກາຍຕີດອກປີກໄກ່, ຊ້ອມກອຟ ແລະອື່ນໆ, ພ້ອມນີ້ພວກເຮົາຍັງມີອາຫານ ແລະ ເຄື່ອງດື່ມ ໄວ້ຄອຍບໍລິການທ່ານຕື່ມອີກ.  

  ສ່ວນຈຸດທີ່ນໍ້າຕົກໂຕຕາດຮ້ອຍຄົວໃນໄລຍະລະດູແລ້ງແມ່ນຈະມີນໍ້າໜ້ອຍເຮັດໃຫ້ເຫັນໂງ່ນຫີນທີ່ມີຄວາມສູງຊັນ ເກືອບ 100 ກວ່າແມັດຢືນອວດໂສມສະລັບສັບຊ້ອນກັນລົງມາຕາມຮອຍນໍ້າຕົກຈົນເຖິງຈຸດນໍ້າໂຕນໃສ່ຕີນຕາດ ແລະ ໃນຍາມລະດູຝົນຈະມີນໍ້າໂຕນຕາດຫຼາຍເຮັດໃຫ້ສີສັນຂອງຕາດບວກກັບທໍາມະຊາດມີຄວາມສວຍງາມຍິ່ງຂຶ້ນທ່າມກາງສາຍໝອກຂອງອາຍນໍ້າພັດກະຈາຍໄປທົ່ວບໍລິເວນຈຸດນໍ້າໂຕນສຸດກ່ອນໄຫຼກ້ຽວໄປຕາມຮ່ອມພູສູ່ສວນດອກໄມ້ໃຫຍ່, ປະຈຸບັນຕາດຮ້ອຍຄົວໄດ້ກາຍເປັນທີ່ນິຍົມໄປທ່ຽວຢາມວັນພັກຂອງຊາວຫຼວງພະບາງນອກຈາກຕາດກວາງຊີເພາະໄລຍະທາງກໍບໍ່ໄດ້ໄກປານໃດສາມາດໄປໄດ້ສອງທາງຄືທາງລົດ ແລະທາງເຮືອສະນັ້ນຫາກທ່ານໃດຍັງບໍ່ທັງໄດ້ໄປເບິ່ງ, ໄປສໍາພັດກັບບັນຍາກາດທີ່ນໍ້າຕົກຕາດຮ້ອຍຄົວເມື່ອຂ້າມຂອງໄປເມືອງຈອມເພັດກໍຢ່າລືມຫາໂອກາດໄປແວ່ຊົມໃຫ້ໄດ້ຮັບຮອງວ່າບັນຍາກາດທີ່ນັ້ນຈະສ້າງຄວາມປະທັບໃຈໃຫ້ກັບທ່ານຜູ້ທ່ຽວຊົມບໍ່ຫຼາຍກະນ້ອຍຢ່າງແນ່ນອນແຖມຂອດການບໍລິການທີ່ນີ້ກໍດີເປັນກັນເອງ ແລະອົບອຸ່ນ.

_____________

ຂຽນໂດຍ: ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์