ຄວາມຄືບໜ້າໃນການປະຕິບັດຂອງໜ່ວຍງານນະໂຍບາຍດ້ານເງິນຕາ

  ທ່ານ ພຸດທະໄຊ ສີວິໄລ ຮອງຜູ້ວ່າການທະນາຄານແຫ່ງ ສປປ ລາວ (ທຫລ), ຫົວໜ້າໜ່ວຍງານນະໂຍບາຍດ້ານເງິນຕາໄດ້ລາຍງານຄວາມຄືບໜ້າໃນການຈັດຕັ້ງປະຕິບັດວຽກງານຂອງໜ່ວຍງານນະໂຍບາຍດ້ານເງິນຕາ, ຄະນະສະເພາະກິດດ້ານເສດຖະກິດຕໍ່ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ, ຫົວໜ້າຄະນະສະເພາະກິດດ້ານເສດຖະກິດເມື່ອບໍ່ດົນມານີ້ໂດຍປະຕິບັດຕາມຂໍ້ຕົກລົງວ່າດ້ວຍການແບ່ງຄວາມຮັບຜິດຊອບຂອງຄະນະຕິດຕາມຜົນກະທົບ ແລະ ຜັນຂະຫຍາຍມາດຕະການດ້ານເສດຖະກິດເພື່ອແກ້ໄຂຜົນກະທົບຂອງການລະບາດພະຍາດ COVID-19 ສະບັບເລກທີ 001/ສພກ, ລົງວັນທີ 8 ເມສາ 2020 ໜ່ວຍງານນະໂຍບາຍດ້ານເງິນຕາ, ໄດ້ດໍາເນີນການປະຊຸມປຶກສາຫາລືກັນເພື່ອແບ່ງຄວາມຮັບຜິດຊອບພາຍໃນໜ່ວຍງານ ແລະຕິດຕາມຄວາມຄືບໜ້າຂອງວຽກງານທີ່ໄດ້ຮັບມອບໝາຍມີຜົນສໍາເລັດເປັນກ້າວໆ.

  ທຫລ ໄດ້ປະກາດນໍາໃຊ້ຂໍ້ຕົກລົງວ່າດ້ວຍນະໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດ COVID-19 ສະບັບເລກທີ 238/ທຫລ, ລົງວັນທີ 26 ມີນາ 2020 ເພື່ອແກ້ໄຂຜົນກະທົບຈາກການລະບາດຂອງພະຍາດດັ່ງກ່າວເປັນບ່ອນອີງໃຫ້ແກ່ທະນາຄານທະນາຄານທຸລະກິດ ແລະສະຖາບັນການເງິນຜ່ອນຜັນຕໍ່ລູກໜີ້ທີ່ ໄດ້ຮັບຜົນກະທົບຄື: (1) ການເລື່ອນ ເວລາຊຳລະໜີ້ທັງຕົ້ນທຶນແລະດອກເບ້ຍ, (2) ການປັບຫຼຸດອັດຕາດອກເບ້ຍ ແລະ ຄ່າທຳນຽມໃຫ້ລູກໜີ້ຂອງຕົນບົນພື້ນຖານການປຶກສາຫາລືເພື່ອຮ່ວມກັນແກ້ໄຂ, (3) ການສະໜອງເງິນກູ້ບ້ວງໃໝ່ໃຫ້ແກ່ລູກໜີ້ ແລະຜູ້ທີ່ໄດ້ຮັບຜົນກະທົບຈາກພະຍາດດັ່ງກ່າວເພື່ອຟື້ນຟູການຜະລິດແລະ (4) ປັບປຸງໂຄງສ້າງເງິນກູ້ຄືນໃໝ່ໃຫ້ແກ່ລູກໜີ້ທີ່ໄດ້ຮັບຜົນກະທົບໂດຍກຳນົດອາຍຸສັນຍາ ຫຼື ງວດຊຳລະຕົ້ນທຶນ ແລະດອກເບ້ຍຄືນໃໝ່ໃຫ້ສອດຄ່ອງກັບຄວາມສາມາດຂອງລູກໜີ້, ໃນນີ້ໃຫ້ມີໄລຍະປອດໜີ້ຕົ້ນທຶນ ແລະດອກເບ້ຍເປັນເວລາ 1 ປີ ຫຼືຕາມການຕົກລົງລະຫວ່າງເຈົ້າໜີ້ ແລະລູກໜີ້, ຄຽງຄູ່ກັນນີ້ທະນາ ຄານທຸລະກິດ ແລະສະຖາບັນການເງິນໃດທີ່ປະຕິບັດມາດຕະການ, ນະໂຍບາຍທີ່ ທຫລ ກຳນົດໄວ້ແມ່ນໄດ້ຮັບການຍົກເວັ້ນການປະຕິບັດຕາມຂໍ້ຕົກລົງວ່າດ້ວຍການຊັ້ນໜີ້ ແລະການຫັກເງິນແຮໜີ້ທີ່ຖືກຈັດຊັ້ນຂອງ ທທກ (ສະບັບເລກທີ 512/ທຫລ, ລົງວັນທີ 29 ມິຖຸນາ2018) ແລະສະຖາບັນການເງິນ (ເລກທີ 02/ທຫລ, ລົງວັນທີ 4 ກຸມພາ 2015).

  ຜ່ານການຕິດຕາມ ແລະປະເມີນຜົນກະທົບຂອງການແຜ່ລະບາດຂອງພະຍາດ COVID-19 ຕໍ່ກັບຂະແໜງເງິນຕາ, ສະຖາບັນການເງິນແລະຜູ້ປະກອບການເຫັນວ່າ: ທະນາຄານທຸລະກິດ ແລະ ສະຖາບັນການເງິນຈຳນວນໜຶ່ງໄດ້ມີນະ ໂຍບາຍຜ່ອນຜັນໃຫ້ແກ່ລູກຄ້າ, ແຕ່ກໍ່ຍັງ ມີຈຳນວນໜຶ່ງກຳລັງຢູ່ໃນຂັ້ນຕອນຄົ້ນຄວ້າດໍາເນີນການ, ໃນວັນທີ 20 ມີນາ 2020 ທຫລ ໄດ້ມີການດັດປັບເຄື່ອງມື ນະໂຍບາຍເງິນຕາໂດຍສະເພາະໄດ້ຫຼຸດອັດຕາສ່ວນເງິນແຮຝາກບັງຄັບທີ່ເປັນສະກຸນເງິນກີບລົງຈາກ 5% ມາເປັນ 4% ແລະສະກຸນເງິນຕາຕ່າງປະເທດລົງຈາກ10% ເປັນ 8% ຊຶ່ງໃຫ້ທະນາຄານທຸ ລະກິດໄດ້ມີແຫຼ່ງທຶນຫຼາຍຂຶ້ນໃນການສະໜອງສິນເຊື່ອເພື່ອຊຸກຍູ້ຂະແໜງການເສດຖະກິດທີ່ໄດ້ຮັບຜົນກະທົບ ແລະໃນວັນທີ 30 ມີນາ 2020 ທຫລ ໄດ້ປັບຫຼຸດອັດຕາດອກເບ້ຍພື້ນຖານຂອງ ທຫລ ລົງ 1% ທັງ 3 ໄລຍະເວລາຄື: ໄລຍະບໍ່ເກີນ 7 ວັນຈາກ 4% ມາເປັນ 3% ຕໍ່ປີ,ໄລຍະ 7–14 ວັນຈາກ 5% ມາເປັນ 4% ຕໍ່ປີ ແລະໄລຍະເກີນ 14 ວັນ-1 ປີຈາກ 10% ມາເປັນ 9% ຕໍ່ປີ) ແລະພ້ອມດຽວນັ້ນ, ກໍ່ສົມທົບຂະແໜງການທີ່ກ່ຽວຂ້ອງກວດກາຂໍ້ມູນເພື່ອດໍາເນີນການຈ່າຍໜີ້ຕາມການຕົກລົງຂອງລັດຖະບານ.

  ທ່ານຫົວໜ້າໜ່ວຍງານນະໂຍບາຍດ້ານເງິນຕາໄດ້ໃຫ້ຮູ້ກ່ຽວກັບການຊຸກຍູ້ຕິດຕາມການຈັດຕັ້ງປະຕິບັດກອງທຶນ SME ຊຶ່ງ ທຫລ ໄດ້ຈັດຕັ້ງປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກສະບັບເລກທີ 967/ຫສນຍ, ລົງວັນທີ 27 ມິຖຸນາ 2018 ອະນຸມັດໃຫ້ ທຫລ ສະໜອງທຶນ 200 ຕື້ກີບ ເພື່ອສະໜັບສະໜູນ SME; ໃນນີ້ໄດ້ແບ່ງອອກ ເປັນ 2 ງວດໆລະ 100 ຕື້ກີບ, ໃນງວດທຳອິດ ທຫລ ສະໜອງ100 ຕື້ກີບ ໃຫ້ກອງທຶນ SME, ກະຊວງອຸດສາຫະກຳ ແລະ ການຄ້າ ແລະກອງທຶນປ່ອຍກູ້ໃຫ້ທະນາຄານທຸລະກິດ 4 ແຫ່ງ ເພື່ອປ່ອຍ ສິນເຊື່ອໃຫ້ແກ່ SME ໃນອັດຕາດອກເບ້ຍຕໍ່າບໍ່ເກີນ 3% ໂດຍຈະສຸມໃສ່ 4 ຂະແໜງການຕົ້ນຕໍຄື: 1) ປູກຝັງ ແລະ ລ້ຽງສັດ, 2) ປຸງແຕ່ງກະສິກໍາ, 3) ຫັດຖະກຳ ແລະ 4) ທ່ອງທ່ຽວໃນໄລຍະທີ່ມີການແຜ່ລະບາດພະຍາດໂຄວິດ-19, ກອງທຶນສົ່ງເສີມ SME ອອກແຈ້ງການໃຫ້ 4 ທະນາຄານສຸມໃສ່ປ່ອຍເງິນກູ້ໃຫ້ຂະແໜງການຜະລິດກະສິກຳເປັນສິນຄ້າກ່ອນເຊັ່ນ: ຂະແໜງປູກຝັງ-ລ້ຽງສັດ ແລະຂະແໜງການປຸງແຕ່ງກະສິກໍາຊຶ່ງມາຮອດປະຈຸບັນມີ SME ຈຳນວນໜຶ່ງທີ່ປະສານກັບທະນາຄານແລ້ວ, ແຕ່ທະນາຄານບໍ່ສາມາດລົງປະເມີນລູກຄ້າໄດ້ເທື່ອ,ມາຮອດປະຈຸບັນກໍາລັງກະກຽມເບີກ ຖອນເງິນງວດທີ 2 ເພີ່ມຈໍານວນ 100 ຕື້ກີບ ເພື່ອສືບຕໍ່ປ່ອຍກູ້ໃຫ້ SME ໂດຍຈະເລັ່ງໃສ່ວິສາຫະກິດຂະໜາດນ້ອຍ ແລະຈຸນລະວິສາຫະກິດໃຫ້ຫຼາຍຂຶ້ນ.

 ສໍາລັບວຽກກອງທຶນເງິນກູ້ທະນາຄານພັດທະນາແຫ່ງຊາດຈີນກໍ່ໄດ້ຈັດຕັ້ງປະຕິບັດສັນຍາເງິນກູ້ບ້ວງ 100 ລ້ານໂດລາສະຫະລັດ ທີ່ໄດ້ລົງນາມໄປໃນຄັ້ງວັນທີ 9 ກໍລະ ກົດ 2019, ທຫລ ໄດ້ເປັນເຈົ້າການດໍາເນີນການກະກຽມຄວາມພ້ອມເພື່ອຂໍອະນຸມັດຂໍເບີກຖອນເງິນກູ້ບ້ວງດັ່ງກ່າວເປັນຕົ້ນໄດ້ຈັດກອງປະຊຸມວິຊາການເຜີຍແຜ່ວຽກ ງານກອງທຶນເງິນ ກູ້ທະນາຄານພັດທະນາແຫ່ງຊາດຈີນໃຫ້ແກ່ທະນາຄານທຸລະກິດ, ຄັດເລືອກເອົາ ບັນດາທະນາຄານທຸລະກິດໃນ ສປປ ລາວ ທີ່ຄົບເງື່ອນໄຂມາດຖານ ແລະມີເຈດຈຳນົງເຂົ້າຮ່ວມໂຄງການເງິນກູ້ດັ່ງກ່າວພ້ອມລົງນາມບົດບັນທຶກຄວາມເຂົ້າໃຈລະຫວ່າງ ທຫລ ແລະທະນາຄານທຸລະກິດໄດ້ທັງໝົດ 12 ແຫ່ງ, ມາຮອດປະຈຸບັນບັນດາທະນາຄານທຸລະກິດດັ່ງກ່າວໄດ້ສັງລວມຂໍ້ມູນລູກຄ້າ SMEs ເບື້ອງຕົ້ນມາຍັງ ທຫລ ເພື່ອກະກຽມຖອນເງິນກູ້ບ້ວງ 100 ລ້ານໂດລາ ບ້ວງທໍາອິດຊຶ່ງມີທັງໝົດ 7 ທະນາຄານ 23 ລູກຄ້າທີ່ທະນາຄານທຸລະກິດເຫັນວ່າສອດຄ່ອງຕາມເປົ້າໝາຍ ແລະຄົບເງື່ອນໄຂມາດຖານລວມເປັນວົງເງິນຂໍກູ້ຢືມທັງໝົດ 371 ຕື້ກີບ ຫຼື ເທົ່າກັບ 41,91 ລ້ານໂດລາສະຫະລັດ.

  ປະຈຸບັນ, ທຫລ ກຳລັງທົບທວນຄືນເງື່ອນໄຂການເຂົ້າຮ່ວມໂຄງການຂອງທະນາຄານທຸລະກິດ ແລະຫົວໜ່ວຍ SME ໃຫ້ມີຄວາມເໝາະສົມກັບສະພາບຄວາມເປັນຈິງຂອງ ສປປ ລາວ ແລະມີແຜນທີ່ຈະປຶກສາຫາລືກັບຄະນະຮັບຜິດຊອບໂຄງການຂອງທະນາຄານພັດທະນາຈີນຄືນໃນທ້າຍເດືອນເມສານີ້.

  ກ່ຽວກັບຂັ້ນຕອນການດຳເນີນໂດຍສະພາອຸດສາຫະກຳ ແລະການຄ້າແຫ່ງຊາດໄດ້ຈັດຕັ້ງຄະນະກຳມະການເພື່ອຄົ້ນຄວ້າ, ສໍາຫຼວດ, ເກັບກໍາສະຖິຕິຂອງຜົນກະທົບຈາກການແຜ່ລະບາດພະຍາດ COVID-19 ໃນ ສປປ ລາວຈາກ 160 ບໍລິສັດ ແລະ ຜູ້ປະກອບການ (ເປັນການສໍາຫຼວດຜ່ານລະບົບອອນລາຍໃນເວລາ 3 ວັນຈາກຕົ້ນເດືອນເມສາ 2020 ທີ່ຜ່ານມາ) ເພື່ອເປັນແນວທາງການແກ້ໄຂດ້ານສະພາບຄ່ອງ, ຫຼຸດຜ່ອນການປົດປ່ອຍພະນັກງານ ແລະຫຼີກເວັ້ນການປິດກິດຈະການຊຶ່ງຜົນສໍາຫຼວດເບື້ອງຕົ້ນຊີ້ໃຫ້ເຫັນວ່າ 52% ໃນ 160 ບໍລິສັດຈະໄດ້ປິດກິດຈະການພາຍໃນ 3 ເດືອນ ຂ້າງໜ້າ, ຫຼາຍກວ່າ 30% ກຳລັງຄິດລັ່ງເລວ່າຈະປິດກິດຈະການ ຫຼືບໍ່ປິດ ແລະມີພຽງ 5% ທີ່ຈະສືບຕໍ່ດຳເນີນກິດຈະການ, ການຄົ້ນຄວ້າເບື້ອງຕົ້ນສາມາດແບ່ງອອກເປັນ 2 ໄລະຍະທີ່ຈະໄດ້ຮັບຜົນກະທົບຈາກວິກິດການຄື: 1) ໄລ ຍະລະບາດຄາດວ່າໃຊ້ເວລາ 6–12 ເດືອນ ແລະ 2) ໄລຍະຟື້ນຟູຄາດວ່າໃຊ້ເວລາ 18–24 ເດືອນ, ປະຈຸບັນຄະນະສະເພາະກິດຂອງສະພາອຸດສາຫະກໍາ ແລະການຄ້າກໍາລັງເລັ່ງສັງລວມລາຍງານຜົນກະທົບ ແລະຜົນການສໍາຫຼວດຜົນກະທົບໃຫ້ສໍາເລັດພາຍໃນທ້າຍເດືອນເມສາ 2020.

  ທ່ານ ພຸດທະໄຊ ສີວິໄລ ໄດ້ແຈ້ງແຜນການໃນຕໍ່ໜ້າຈະສືບຕໍ່ຕິດຕາມເກັບກໍາຂໍ້ມູນ ແລະປະເມີນຜົນກະທົບຂອງການແຜ່ລະບາດຂອງພະຍາດ COVID-19 ຕໍ່ກັບຂະແໜງເງິນຕາ,ສະຖາບັນການເງິນ ແລະຜູ້ປະກອບການໂດຍການຄົ້ນຄວ້າຊອກຫາຂໍ້ມູນໃນໄລຍະລະບາດຂອງພະຍາດທີ່ມີຜົນກະທົບທາງກົງ ແລະທາງອ້ອມຕໍ່ກັບຜູ້ປະກອບການບໍ່ວ່າຈະເປັນລູກຄ້າທີ່ໄດ້ກູ້ຢືມເງິນຈາກທະນາຄານທຸລະກິດ ແລະລູກຄ້າທີ່ນຳໃຊ້ແຫຼ່ງທຶນຕົນເອງໃນການດຳເນີນທຸລະກິດ. ພ້ອມທັງ,ລົງເລິກເບິ່ງຂະແໜງການໃດທີ່ເປັນບູລິມະສິດຕ້ອງໄດ້ຄົ້ນຄວ້າສ້າງນະໂຍບາຍທີ່ຈະແຈ້ງແລະຊັດເຈນ; ສືບຕໍ່ຕິດຕາມການຜັນຂະຫຍາຍນະໂຍບາຍຜ່ອນຜັນໂດຍການຊຸກຍູ້ທະນາຄານທຸລະ ກິດ ແລະສະຖາບັນການເງິນປະຕິບັດນະໂຍບາຍຜ່ອນຜັນໃຫ້ແກ່ລູກຄ້າເງິນກູ້ຕາມຂໍ້ຕົກລົງວ່າດ້ວຍນະໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດ (COVID-19) ສະບັບເລກທີ 238/ ທຫລ ລົງວັນທີ 26 ມີນາ 2020 ຕາມຄວາມເໝາະສົມໂດຍຈັດກອງປະຊຸມເພື່ອທົບທວນການປະຕິບັດນະໂຍ ບາຍດັ່ງກ່າວ, ພ້ອມທັງຈະຄົ້ນຄວ້າກ່ຽວກັບການອອກນະໂຍບາຍ ແລະມາດຕະການທີ່ເປັນເອກະພາບກັນໃຫ້ແກ່ບັນດາສະຖາບັນການເງິນຕ່າງໆເຊັ່ນ: ບໍລິສັດໃຫ້ເຊົ່າຊື້, ບໍລິສັດຂາຍລົດທີ່ສະເໜີໃຫ້ເລື່ອນໄລຍະການຊໍາລະຜ່ອນລົດອອກໄປອີກ ແລະອື່ນໆ, ສືບຕໍ່ດໍາເນີນການກວດກາໃຫ້ສໍາເລັດການອວ່າຍຫນີ້ສາມແຈເພື່ອຂໍອະນຸມັດໃນການຈັດຕັ້ງປະຕິບັດ; ຮັກສາສະເຖຍລະພາບດ້ານເງິນຕາແຫ່ງຊາດຂອງ ທຫລ: ຈະສືບຕໍ່ນຳໃຊ້ນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດເປັນເຄື່ອງມືຫຼັກໃນການຮັກສະສະເຖຍລະ ພາບເງິນຕາແຫ່ງຊາດ, ສູ້ຊົນດັດສົມເງິນຕາຕ່າງປະເທດໂດຍສະເພາະການນຳເຂົ້ານໍ້າມັນເຊື້ອໄຟໃຫ້ພຽງພໍ; ໄປຄຽງຄູ່ກັບການຊຸກຍູ້ໃຫ້ທະນາຄານທຸລະກິດນຳ ໃຊ້ເຄື່ອງມືປ້ອງກັນຄວາມສ່ຽງດ້ານອັດຕາແລກປ່ຽນກັບລູກຄ້າທີ່ມີການເຮັດທຸລະກິດກັບຕ່າງປະເທດໃຫ້ຫຼາຍຂຶ້ນ, ສືບຕໍ່ຈັດ ຕັ້ງປະຕິບັດມາດຕະການກະຕຸ້ນເສດຖະກິດດ້ວຍການສະໜັບສະໜູນແຫຼ່ງທຶນໃຫ້ທະນາຄານທຸລະກິດເພື່ອປ່ອຍກູ້ໃຫ້ຈຸນລະວິສາຫະກິດ, SME ລວມທັງບໍລິສັດທີ່ມີທ່າແຮງດ້ານການສົ່ງອອກ ແລະມີຕະຫຼາດຮອງຮັບທີ່ແນ່ນອນ;

 ສະໜັບສະໜູນໂດຍ: HONDA

  ສໍາລັບວຽກກອງທຶນເງິນກູ້ທະນາຄານພັດທະນາແຫ່ງຊາດຈີນ, ທຫລ ຈະເລັ່ງທົບທວນຄືນບັນດາມາດຖານເງື່ອນໄຂທີ່ໄດ້ກຳນົດໃນສັນຍາເງິນກູ້ໃຫ້ແທດເໝາະເພື່ອໃຫ້ທະນາຄານທຸລະກິດ, ຫົວ ໜ່ວຍ SME ສາມາດເຂົ້າຮ່ວມໂຄງການ, ສະເພາະວຽກງານກອງທຶນສົ່ງເສີມ SME ທຫລ ສືບຕໍ່ຕິດຕາມການປ່ອຍກູ້ເງິນບ້ວງທໍາອິດ 100 ຕື້ກີບ ໃຫ້ 4 ທະນາຄານທຸລະກິດທີ່ໄດ້ເຊັນສັນຍາກັບກອງທຶນສົ່ງເສີມ SME ໃຫ້ມີປະສິດທິພາບ ແລະຫຼີກລ່ຽງບໍ່ໃຫ້ມີໜີ້ເສຍ (NPL) ເກີດຂຶ້ນສູງ; ພ້ອມນີ້, ຈະສືບຕໍ່ຄົ້ນຄວ້າກະກຽມພິມຈຳໜ່າຍເງິນກູ້ບ້ວງທີສອງ 100 ຕື້ກີບໃຫ້ແກ່ກອງທຶນສົ່ງເສີມ SME ຕາມຄວາມເໝາະສົມ; ສືບຕໍ່ຄົ້ນຄວ້າຈັດຫາແຫຼ່ງທຶນເພື່ອຟື້ນຟູສົ່ງເສີມການຜະລິດ; ສືບຕໍ່ຄົ້ນຄວ້າບັນດານະໂຍບາຍ ແລະມາດຕະການທີ່ເໝາະສົມເພື່ອແກ້ໄຂຜົນກະທົບຂອງພະຍາດ COVID-19.

_____________

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์