ໂຮງໝໍແຂວງວຽງຈັນຈຳລອງເຫດການ, ການບໍລິການຄົນເຈັບໂຄວິດ-19

ເພື່ອເປັນການສ້າງຄວາມເຂັ້ມແຂງໃຫ້ແກ່ພະນັກງານແພດຂັ້ນແຂວງ ແລະເມືອງໃຫ້ມີຄວາມຮູ້, ຄວາມສາມາດໃນການຄຸ້ມຄອງກໍລະນີຄົນເຈັບອັກເສບປອດທີ່ເກີດຈາກໂຄວິດ-19 ພ້ອມທັງເປັນການສ້າງລະບົບຄັດກອງ ແລະ ສ້າງແຜນໃນການກະກຽມຈັດລະບົບຮັບຮອງຄົນເຈັບຊຶ່ງຈະຕ້ອງໄດ້ມີຄວາມພ້ອມທາງດ້ານບຸກຄະລາກອນ, ອຸ ປະກອນ ແລະສະຖານທີ່.

  ໃນວັນທີ່ 7 ພຶດສະພາ ຢູ່ທີ່ໂຮງໝໍແຂວງວຽງຈັນ ແລະໂຮງຮຽນພະຍາບານສາດ ຊຶ່ງເປັນ 1 ໃນ 3 ສະຖານທີ່ປິ່ນປົວຄົນເຈັບຈາກໂຄວິດ-19 ຂອງແຂວງວິຊາການຈາກກົມປິ່ນປົວຟື້ນຟູໜ້າທີ່ການກະຊວງສາທາລະນະສຸກ ແລະອົງການອະນາໄມໂລກໄດ້ລົງມາສົມທົບກັບໂຮງໝໍແຂວງວຽງຈັນເພື່ອຝຶກປະຕິບັດຕົວຈິງໃນການໃຫ້ບໍລິ ການຄົນເຈັບຈາກພະຍາດອັກເສບປອດທີ່ເກີດຈາດໂຄວິດ-19 ໃຫ້ແກ່ພະນັກງານຈາດພະແນກສາທາລະນະສຸກແຂວງ, ຄະນະອຳນວຍການໂຮງໝໍແຂວງ, ທີມແພດປິ່ນປົວ,ທີມພະຍາບານ, ທີມວິເຄາະໂດຍໄດ້ມີການຈຳລອງເຫດການໃນການຄັດກອງຢູ່ໂຮງໝໍແຂວງ, ການນຳສົ່ງຄົນເຈັບຈາກຈຸດຄັດກອງໄປສະຖານທີ່ປິ່ນປົວສະເພາະທີ່ທາງແຂວງໄດ້ຈັດໄວ້, ການບັນທຶກອາການ, ການແນະນຳການໃຊ້ຊຸດປ້ອງກັນຂອງແພດ (PPE), ແນະນຳການໃຊ້ອົກຊີ ແລະການສຸຂະສຶກສາແກ່ຄົນເຈັບນອກຈາກນີ້ຍັງໄດ້ລົງເລິກວຽກງານການບໍລິຫານຈັດການເປັນຕົ້ນແມ່ນການວາງແຜນຄວາມຕ້ອງການບຸກຄະລາກອນ, ອຸປະກອນ ແລະການກະກຽມສະຖານທີ່ໃຫ້ໄດ້ຕາມມາດຕະຖານຜ່ານການປະຕິບັດຕົວຈິງເຫັນວ່າພະນັກງາານແພດແມ່ນມີຄວາມເຂົ້າໃຈ ແລະສາມາດປະຕິບັດໜ້າທີ່ຂອງຕົນໄດ້ໃນແຕ່ລະຂັ້ນໄດ້ດີພໍໍສົມຄວນ, ສຳລັບສະຖານ ທີ່ຮອງຮັບຄົນເຈັບແມ່ນໄດ້ປະຕິບັດຕາມມາດຖານທີ່ກຳນົດໄວ້.

  ນອກຈາກການເຄື່ອນໄຫວຢູ່ໂຮງໝໍແຂວງແລ້ວທີມງານຈາກສູນກາງຍັງຈະໄດ້ລົງເຄື່ອນໄຫວຕິດຕາມເບິ່ງການກຽມຄວາມພ້ອມຂອງສູນຮອງຮັບຄົນເຈັບຢູ່ໂຮງໝໍຊຸມ ຊົນເມືອງວັງວຽງເພື່ອວາງແຜນບຸກຄະລາກອນ, ອຸປະກອນ ແລະສະຖານທີ່ໃຫ້ມີຄວາມຮັບປະກັນ ແລະມີຄວາມພ້ອມສູງສຸດໃນການຮັບມືກັບການລະບາດຂອງພະຍາດໂຄວິດ-19.

--------------

ໜັງສືພິມເສດຖະກິດ-ສັງຄົມ

แชร์