ຍົກລະດັບຄວາມຮູ້ດ້ານສຸຂະນາໄມໃຫ້ຄູ-ອາຈານ 2 ກຸ່ມ

  ໃນລະຫວ່າງ ວັນທີ 6-7 ພຶດສະພາ 2020 ນີ້ໂຄງການສົ່ງເສີມດ້ານນໍ້າ ແລະສຸຂະນາໄມໂດຍໄດ້ຮ່ວມການສະໜັບສະໝູນຈາກມູນນິທິ East Meets West ແລະ Charity Water ໄດ້ຈັດອົບຮົມສຸຂະນາໄມໃຫ້ຄູອາຈານ 2 ກຸ່ມຂຶ້ນທີ່ຫ້ອງປະຊຸມພະແນກໂຍທາທິການ ແລະ ຂົນສົ່ງແຂວງຫຼວງພະບາງ ໂດຍການເປັນປະ ທານຮ່ວມຂອງ ທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະຂົນສົ່ງແຂວງຫຼວງພະບາງ, ທ່ານ ຂອນແກ້ວ ອາດຜາສຸກ ຫົວໜ້າມູນນິທິ East MeetsWest ປະຈໍາລາວ, ມີວິທະຍາກອນຈາກກະຊວງສາທາລະນະສຸກ, ຕາງຫ້ອງສຶກສາທິການເມືອງປາກແຊງ, ຄູອາຈານຈາກກຸ່ມເມືອງຂາຍ ແລະ ກຸ່ມຫາດຮວາຍ-ປາກເກງ ແລະນະຄອນຫຼວງພະບາງເຂົ້າຮ່ວມ.

  ທ່ານ ຂອນແກ້ວ ອາດຜາສຸກ ຫົວໜ້າມູນນິທິ East Meets West ປະຈໍາລາວກ່າວວ່າ: ເພື່ອເປັນການສົ່ງເສີມໃຫ້ຜູ້ບໍລິຫານຄູອາຈານກໍຄືກຸ່ມເມືອງຂາຍ ແລະກຸ່ມຫາດຮວາຍ-ປາກເກງທີ່ຮັບຜິດຊອບວຽກງານສຸຂະອະນະໄມນັກຮຽນໃຫ້ມີຄວາມຮູ້, ຄວາມເຂົ້າໃຈໃນການນຳໃຊ້ແລະປົກປັກຮັກສາລະບົບນໍ້າ, ຫ້ອງນໍ້າ (ວິດຖ່າຍ) ຢູ່ພາຍໃນໂຮງຮຽນໃຫ້ຖືກຕ້ອງ ແລະ ມີຄວາມຍືນຍົງ ແລະ ອີກບັນຫາໜຶ່ງກໍເປັນການຕອບໂຕ້, ຕ້ານ ແລະ ສະກັດກັ້ນການແຜ່ລະບາດຂອງພະຍາດອັກເສບປອດສາຍ ພັນໃໝ່ ຫຼືໂຄວິດ19 ທີ່ກຳລັງລະບາດເປັນວົງກວ້າງໄປໃນທົ່ວໂລກຢູ່ປະຈຸບັນນີ້ ແລະເປັນການຮັກສາໄດ້ຄວາມສະອາດພາຍໃນໂຮງຮຽນທີ່ຕົນເອງຮັບຜິດຊອບ, ພ້ອມນີ້ຜູ້ເຂົ້າຮ່ວມແມ່ນຍັງໄດ້ຮຽນຮູ້ສະພາບຄວາມເປັນມາຂອງໂຄງການ, ບັນຫາທີ່ພົບພໍ້ໃນໄລຍະຜ່ານມາ ແລະຄວາມສຳຄັນຂອງວຽກງານຮັກສາອະນາໄມໃນໂຮງຮຽນ ແລະຊຸມຊົນ,ການບໍາບັດນໍ້າດື່ມ-ນໍ້າໃຊ້, ການນໍາໃຊ້ ແລະປົກປັກຮັກສາລະບົບນໍ້າ, ຮັກສາສ້ອມແປງຫ້ອງນໍ້າ (ວິດຖ່າຍ) ທີ່ເປ່ເພ, ການຖູແຂ້ວ ແລະລ້າງມື, ການຕິດຕາມ-ກວດກາ, ແກ້ໄຂບັນຫາລະບົບນໍ້າ ແລະວິດຖ່າຍໃນໂຮງຮຽນ.

  ພາຍຫຼັງຝຶກອົບຮົມສຳເລັດແລ້ວຍັງໄດ້ມີການປະເມີນເບິ່ງຄວາມຮັບຮູ້ຂອງສຳມະນາກອນຕື່ມອີກ, ໃນໂອກາດນີ້ທາງໂຄງການກໍ່ຄືມູນນິທິ East Meets West ປະ ຈຳລາວ ແລະCharity Wa ter ຍັງໄດ້ມອບອຸປະກອນເຊັ່ນ: ອ່າງລ້າງມືຈຳນວນ 15 ຊຸດ, ໃຫ້ກຸ່ມເມືອງຂາຍ ນະຄອນຫຼວງພະຍາງ 9 ຊຸດ ແລະກຸ່ມຫາດຮວາຍ-ປາກເກງເມືອງປາກແຊງ 6 ຊຸດ, ນອກນັ້ນຍັງມີສະບູ, ໄມ້ຖູແຂ້ວ, ຢາສີແຂ້ວ ແລະຈອກໃຫ້ 15 ໂຮງຮຽນເພື່ອໄປແຈກຢາຍໃຫ້ນ້ອງນັກຮຽນຈຳນວນ 2.000 ກວ່າຊຸດຕື່ມອີກ, ລວມມູນຄ່າທັງໝົດ 20 ພັນໂດລາສະຫະລັດ.

____________

ຂຽນໂດຍ: ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์