ຄັງເງິນແຫ່ງຊາດປະຈຳແຂວງອັດຕະປື ເອົາການເບີກຈ່າຍເງິນເດືອນເປັນບຸລິມະສິດ

  ເພື່ອເຮັດໃຫ້ການຄຸ້ມຄອງລາຍຮັບງົບປະມານແຫ່ງລັດລວມສູນໃນລະບົບຄັງເງິນແຫ່ງຊາດ, ການມອບລາຍຮັບພັນທະຕ່າງໆຜ່ານລະບົບທະນາຄານ, ເພື່ອຫຼຸດຜ່ອນການຮັບ, ການເຄື່ອນຍ້າຍເງິນສົດ, ຫຼີກລ່ຽງການຕົກເຮ່ຍເສຍຫາຍ, ຖືກຕ້ອງຕາມລະບຽບກົດໝາຍຂອງງົບປະມານໄປຕາມແຜນການທີ່ສະພາຮັບຮອງ ແລະຮັບປະ ກັນການເບີກຈ່າຍເງິນເດືອນ,ເງິນນະໂຍບາຍ, ເງິນອຸດໜູນ, ເງິນບໍລິຫານ, ດັດສົມອື່ນໆ, ຊຶ່ງຄັງເງິນແຫ່ງຊາດປະຈຳແຂວງອັດຕະປືໄດ້ຖືເປັນບູລິມະສິດສໍາຄັນອັນດັບໜຶ່ງທ່ານ ນາງ ວັດຖາວອນ ວົງໄຊ ຫົວໜ້າຄັງເງິນແຫ່ງຊາດປະຈຳແຂວງອັດຕະປື ໃຫ້ສຳພາດ ກັບຂ່າວການເງິນໃຫ້ຮູ້ວ່າ: ຄັງເງິນແຫ່ງຊາດປະຈໍາແຂວງອັດຕະປື, ປະກອບມີພະນັກງານ-ລັດຖະກອນທັງໝົດ 49 ຄົນ, ຍິງ 31 ໃນນັ້ນ, ມີພະນັກງານ-ລັດຖະກອນ 43 ຄົນ ຍິງ 25 ຄົນ, ພະນັກງານອາສາສະໝັກ 6 ຄົນ, ຍິງ 6 ຄົນ, ໃນການຈັດຕັ້ງປະຕິບັດວຽກງານວິຊາສະເພາະຄັງເງິນແຫ່ງຊາດປະຈຳແຂວງອັດຕະປື ໄດ້ຖືເອົາການເບີກຈ່າຍເງິນເດືອນ-ເງິນນະໂຍບາຍຕ່າງໆເປັນບູລິມະສິດສຳຄັນ, ຊຶ່ງສະແດງອອກໃນການຈັດຕັ້ງປະຕິບັດໄລຍະ 2 ເດືອນຜ່ານມາສາມາດຈັດຕັ້ງປະຕິບັດດ້ານລາຍຈ່າຍງົບປະມານທັງໝົດ 39,06 ຕື້ກີບ ເທົ່າກັບ 11% ຂອງແຜນການປີ,ໃນນີ້ລາຍຈ່າຍງົບປະມານປົກກະຕິປີ 2020 ໃນເດືອນກຸມພາ 2020 ເທົ່າກັບ 28,72 ຕື້ກີບ ທຽບໃສ່ແຜນການປີປະຕິບັດໄດ້ 8% ແລະລາຍຈ່າຍເຄື່ອນຍ້າຍສູນກາງເທົ່າກັບ 10,34 ຕື້ກີບ,

  ໃນນັ້ນລາຍຈ່າຍເງິນເດືອນເທົ່າກັບ 26,81 ຕື້ກວ່າກີບ ທຽບໃສ່ແຜນການປີປະຕິບັດໄດ້ 12%, ລາຍຈ່າຍເງິນນະໂຍບາຍເທົ່າກັບ 1,52 ຕື້ກີບທຽບໃສ່ແຜນການປີປະຕິບັດໄດ້ 4%, ເງິນບໍລິຫານເທົ່າກັບ 0,24 ຕື້ກີບ ທຽບໃສ່ແຜນການປີປະຕິບັດໄດ້ 1%, ລາຍຈ່າຍເງິນດັດສົມສົ່ງເສີມເທົ່າ 0,15 ຕື້ກີບ ທຽບໃສ່ແຜນການປີປະ ຕິບັດໄດ້ 1%, ສ່ວນ ລາຍຈ່າຍເງິນແຮ, ເງິນຊື້ໃໝ່ ແລະພາກລາຍຈ່າຍເງິນລົງທຶນຍັງບໍ່ທັນໄດ້ຈັດຕັ້ງປະຕິບັດ,ສຳລັບການປະຕິບັດເບີກຈ່າຍເງິນເດືອນທົ່ວແຂວງ ແລະເມືອງໃນ ງວດທີ 1 ຄາດວ່າຈະສາມາດປະຕິບັດໄດ້ 100% ສົມທຽບໃສ່ການຈັດຕັ້ງປະຕິ ບັດໃນໄລຍະດຽວປີກ່ອນປີ 2019 ເພີ່ມ ຂຶ້ນ 17%, ການຈັດຕັ້ງປະຕິບັດ

ລາຍຮັບທົ່ວແຂວງອັດຕະປືໝົດປີ 2020 ບໍ່ສາມາດຕອບສະໜອງລາຍຈ່າຍໄດ້ (ຂາດດຸ່ນງົບປະມານ 65% ຂອງແຜນລາຍຈ່າຍທັງໝົດ), ພ້ອມນັ້ນ, ທ່ານນາງ ວັດຖາວອນ ວົງໄຊ ໃຫ້ຮູ້ອີກວ່າ: ສຳລັບທິດທາງແຜນຈຸດສຸມສູ້ຊົນໃນຕໍ່ໜ້ານີ້ເພື່ອເຮັດໃຫ້ການຈັດຕັ້ງປະຕິບັດໃຫ້ບັນ ລຸໄດ້ຕາມລະດັບຄາດໝາຍທີ່ວາງໄວ້, ຈະສືບຕໍ່ເພີ່ມທະວີໃນການປະສານງານ ກັບບັນດາຂະແໜງການທີ່ກ່ຽວຂ້ອງ ໂດຍຖືເອົາຂໍ້ກຳນົດ, ກົດໝາຍຕ່າງໆເປັນບ່ອນອີງໃນການເຄື່ອນໄຫວຈັດຕັ້ງປະຕິບັດໃນໜ້າທີ່ວຽກງານວິຊາສະເພາະຂອງຕົນໃຫ້ມີປະສິດທິຜົນ, ສືບຕໍ່ຊຸກຍູ້, ຕິດຕາມ, ກວດກາວຽກງານວິຊາສະເພາະພາຍໃນຂະແໜງຄັງເງິນທັງຂັ້ນແຂວງ ແລະຄັງເງິນປະຈຳເມືອງຢ່າງ ເຂັ້ມງວດ, ສືບຕໍ່ປະຕິບັດລາຍຈ່າຍງົບປະມານປົກກະຕິແຕ່ລະພາກອື່ນໆໃຫ້ທັນກັບກຳນົດເວລາ, ສືບຕໍ່ເລັ່ງທວງໜີ້ສີນເງິນຢືມລ່ວງໜ້າໃນລະບົບຄັງເງິນຂອງບັນດາບໍລິ ສັດ, ບັນດາພະແນກການອ້ອມຂ້າງແຂວງທີ່ຍັງຄ້າງຊຳລະເພື່ອສະສາງ, ປັບປຸງວຽກງານແຕ່ລະຂັ້ນໃຫ້ມີຄວາມໜັກແໜ້ນເຂັ້ມແຂງຂຶ້ນເລື້ອຍໆ, ຍົກສູງປະສິດທິຜົນໃນການຄຸ້ມຄອງກວດກາ-ກວດການ, ການບໍລິຫານເງິນງົບປະມານແຫ່ງລັດ, ຄຸ້ມຄອງເງິນສົດຄຸ້ມຄອງໜີ້ສິນໃຫ້ມີຄວາມປອດໄພ ແລະມີປະສິດທິຜົນໃຫ້ດີຂຶ້ນເລື້ອຍໆ.

______________

ຂຽນໂດຍ:  ອາພັດສະລາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์