ດ່ານພາສີສາກົນພູເກືອສຸມໃສ່ທຸກມາດຕະການເກັບລາຍຮັບ

  ດ່ານພາສີສາກົນພູເກືອຕັ້ງຢູ່ເມືອງພູວົງ ແຂວງອັດຕະປື, ຫ່າງຈາກເທສະບານແຂວງອັດຕະປືປະມານ 113 ກິ ໂລແມັດ, ຕິດກັບດ່ານພາສີສາກົນເບີອີ ສສ ຫວຽດ ນາມ, ສໍາລັບແຜນການເກັບລາຍຮັບໃນປີ 2020 ໄດ້ຮັບຕົວເລກແຜນການທັງໝົດ 35,5 ຕື້ກວ່າກີບ, ເພື່ອເຮັດໃຫ້ລາຍຮັບບັນລຸຕາມແຜນການດ່ານພາສີສາກົນພູເກືອຈະສຸມໃສ່ທຸກມາດຕະການ, ເຂັ້ມງວດການກວດກາສິນຄ້າ-ເຄື່ອງຂອງການນຳເຂົ້າ-ສົ່ງອອກໃຫ້ຖືກຕ້ອງຕາມລະບຽບກົດໝາຍ, ບໍລິການສະດວກວ່ອງໄວ, ໂປ່ງໃສ, ສາມາດກວດສອບໄດ້.

 ອີງຕາມການລາຍງານຂອງທ່ານ ເຄນໄຊ ທອງພຸດ ຫົວໜ້າດ່ານພາສີສາກົນພູເກືອໃຫ້ຮູ້ວ່າ: ດ່ານພາສີສາກົນພູເກືອປະກອບມີ 3 ໜ່ວຍງານຄື: ໜ່ວຍງານການຄຸ້ມ ຄອງການແຈ້ງພາສີ, ໜ່ວຍງານກວດກາພາຫະນະ ແລະ ຜູ້ໂດຍສານ ແລະ ໜ່ວຍງານຄຸ້ມຄອງສາງ-ກວດກາສິນຄ້າ, ປະກອບມີພະນັກງານ-ເຈົ້າໜ້າທີ່ພາສີທັງໝົດ 32 ສະຫາຍ, ຍິງ 6 ສະຫາຍ.

  ໃນປີ 2019 ທີ່ຜ່ານມາດ່ານພາສີສາກົນພູເກືອເກັບລາຍຮັບເຂົ້າງົບປະມານແຫ່ງລັດໄດ້ທັງໝົດ 23,91 ຕື້ກວ່າກີບ ທຽບໃສ່ແຜນການປີເທົ່າກັບ 74,74%, ຊຶ່ງລາຍຮັບສ່ວນໃຫຍ່ໄດ້ຈາກຄ່າຊັກພິເສດສົ່ງອອກ, ພາສີຂາເຂົ້ານໍ້າມັນເຊື້ອໄຟ, ນໍ້າມັນເຄື່ອງ, ພາຫະນະ, ສິ້ນສ່ວນອາໄຫຼ່ຕ່າງໆ, ເຄື່ອງກໍ່ສ້າງ, ເຄື່ອງໃຊ້ ໄຟຟ້າ, ເຄື່ອງອຸປະໂພກ-ບໍລິໂພກ, ປະເພດສິນຄ້າອື່ນໆ ແລະຄ່າທໍານຽມຕ່າງໆ.

  ສາເຫດເຮັດໃຫ້ການຈັດເກັບລາຍຮັບຍັງບໍ່ລຸຕາມແຜນການຍ້ອນການກໍານົດແຜນລາຍຮັບປີ 2019 ສູງກວ່າຖານຂໍ້ມູນຕົວຈິງ, ຖ້າອີງໃສ່ບົດແນະນໍາເລກທີ 1670/ກງ, ລົງວັນທີ 30 ມິຖຸນາ 2019, ການນໍາເຂົ້ານໍ້າມັນເຊື້ອໄຟມີພຽງ 2 ບໍລິສັດນໍາເຂົ້ານໍ້າມັນເຊື້ອໄຟປົກກະຕິ, ການສົ່ງອອກສ່ວນຫຼາຍແມ່ນຍົກເວັ້ນຄ່າຊັກພິເສດເປັນຕົ້ນ: ການຜະລິດກະສິກໍາ, ການຈົດຮັບ-ຈົດຈ່າຍບໍ່ມີຍ້ອນການອ່ວຍເງິນລາຍຮັບບໍລິສັດຮວ່າງແອັງກັບກົມງົບປະມານແຫ່ງລັດບໍ່ທັນກັບກໍານົດເວລາເຮັດໃຫ້ລາຍຮັບບໍ່ໄດ້ຕາມແຜນ.

  ທ່ານ ເຄນໄຊ ທອງພຸດ ຫົວໜ້າດ່ານພາສີສາກົນພູເກືອໃຫ້ຮູ້ອີກວ່າ: ແຜນການຈັດເກັບລາຍຮັບປີ 2020 ດ່ານພາສີສາກົນພູເກືອໄດ້ຮັບຕົວເລກທັງໝົດ 35,5 ຕື້ກວ່າກີບ, ສະນັ້ນເພື່ອໃຫ້ລາຍຮັບບັນລຸຕາມລະດັບຄາດໝາຍ, ໄດ້ວາງຫຼາຍມາດຕະການໂດຍຖືເອົາການສຶກສາອົບຮົມການເມືອງແນວຄິດໃຫ້ອ້າຍນ້ອງພະນັກງານ-ເຈົ້າໜ້າທີ່ພາສີເປັນຫຼັກ, ແບ່ງຄວາມຮັບຜິດຊອບໃຫ້ບຸກຄົນຈັດຕັ້ງປະຕິບັດການເກັບລາຍຮັບເຂົ້າງົບປະມາຕາມຕົວເລກແຜນການທີ່ຂັ້ນເທິງມອບໝາຍ, ເຂັ້ມງວດກວດກາສິນຄ້າ-ເຄື່ອງຂອງສົ່ງອອກ-ນໍາເຂົ້າໃຫ້ຖືກຕ້ອງຕາມລະ ບຽບກົດໝາຍເນັ້ນການບໍລິການໃຫ້ມີ ຄວາມສະດວກວ່ອງໄວ, ຫັນເປັນທັນສະໄໝ, ໂປ່ງໃສ, ສາມາດກວດສອບໄດ້, ປຸກ ລະດົມຂົນຂວຍຜູ້ປະກອບການໃຫ້ມາ ເຄື່ອນໄຫວໃນການນໍາເຂົ້າ-ສົ່ງອອກສິນ ຄ້າເຄື່ອງຂອງຜ່ານດ່ານພາສີສາກົນພູ ເກືອຢ່າງເປັນປົກກະຕິ, ຮັບປະກັນຄວາມຖືກຕ້ອງສອດຄ່ອງກັບລະບຽບກົດໝາຍ,  ນໍາໃຊ້ລາຄາຕົວຈິງເພື່ອເປັນພື້ນຖານໃນ ການຄິດໄລ່ຈັດເກັບພາສີ-ອາກອນຈາກ ການນໍາເຂົ້າສິນຄ້າເຄື່ອງຂອງທຸກປະ ເພດ, ເພີ່ມທະວີການຄຸ້ມຄອງກວດກາການນໍາເຂົ້າ,ວັດຖຸອຸປະກອນ, ນໍ້າມັນເຊື້ອໄຟ,ພາຫະນະນໍາເຂົ້າໂດຍຮູບການຍົກເວັ້ນຂອງໂຄງການລົງທຶນເພື່ອໃຫ້ນໍາໃຊ້ຖືກເປົ້າ ໝາຍ, ເອົາໃຈໃສ່ຄຸ້ມຄອງ ແລະກວດກາສົ່ງອອກໄມ້, ແຮ່ທາດ, ຊັບພະຍາກອນທໍາມະຊາດ, ເພີ່ມທະວີວຽກງານຕ້ານ ແລະ ສະກັດກັ້ນການລັກລອບໜີພາສີພາຍໃນດ່ານ-ນອກດ່ານ, ຂຸດຄົ້ນແຫຼ່ງລາຍຮັບທີ່ບົ່ມຊ້ອນ ແລະອື່ນໆ.


  ແນວໃດກໍຕາມເຖິງແມ່ນວ່າຄະນະດ່ານພາສີສາກົນພູເກືອ, ໄດ້ມີມາດຕະການໃນການຈັດເກັບລາຍຮັບເຂົ້າງົບປະມານໃນປີ 2020 ແຕ່ຍັງສິ່ງທ້າຍທ້າຍໂດຍສະເພາະສໍາລັບການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່(COVID-19) ຄາດຄະເນໜົດປີດ່ານພາສີສາກົນພູເກືອອາດເກັບລາຍຮັບບໍ່ບັນລຸຕາມລະດັບຄາດໝາຍ, ເນື່ອງຈາກດ່ານພາສີສາກົນພູເກືອຕິດພັນກັບ ສສ ຫວຽດນາມ ເຮັດໃຫ້ການເຂົ້າ-ອອກຂອງຜູ້ໂດຍສານ ແລະຜູ້ປະກອບບການສົ່ງອອກ-ນໍາເຂົ້າຫຼຸດ ລົງ ແລະອື່ນໆ.   

----------------

ໜັງສືພິມເສດຖະກິດ-ສັງຄົມ

แชร์