ຫຼວງນໍ້າທາ ແຕ່ງຕັ້ງຮອງຫົວໜ້າກອງບັນຊາການທະຫານແຂວງ

  ພິທີປະກາດການແຕ່ງຕັ້ງຮອງຫົວໜ້າກອງບັນຊາການຜູ້ຊີ້ນໍາວຽກງານພາລາທິການທະຫານແຂວງຫຼວງນໍ້າທາ ໄດ້ຈັດຂຶ້ນໃນວັນທີ 7 ພຶດສະພາ 2020 ທີ່ສະໂມ ສອນກອງບັນຊາການທະຫານແຂວງໂດຍການເປັນປະທານ ທ່ານ ພົນຕີ ວົງຄຳ ພົມມະກອນ ຫົວໜ້າກົມໃຫຍ່ພາລາທິການກອງກັບ, ມີທ່ານ ຈັນທອງ ແກ້ວປະເສີດ ຫົວໜ້າຄະນະ ຈັດຕັ້ງແຂວງ, ທ່ານ ພົນຈັດຕະວາ ອີ່ນແກ້ວ ມະນີຈັນ ກຳມະການພັກແຂວງ ຫົວໜ້າກອງບັນຊາການທະຫານແຂວງຫຼວງນໍ້າທາ, ອົງການຈັດຕັ້ງທີ່ກ່ຽວຂ້ອງຂັ້ນແຂວງ, ຮອງຫົວໜ້າກົມແຜນການກົມໃຫຍ່ພາລາທິການກອງທັບ,ຫົວໜ້າພະແນກ-ຮອງຫົວໜ້າພະແນກ 5 ຫ້ອງ ພາຍໃນກອງບັນຊາການເຂົ້າຮ່ວມ.
  ທ່ານ ພົນໂທ ບົວຄຳ ພົມມາໄຊ ຮອງຫົວໜ້າກົມແຜນການກົມໃຫຍ່ພາລາທິການກອງທັບໄດ້ຜ່ານຂໍ້ຕົກລົງຂອງລັດຖະມົນຕີປ້ອງກັນປະເທດສະບັບເລກທີ 1244/ ກປທ, ລົງວັນທີ 25 ກຸມພາ 2020 ວ່າດ້ວຍການແຕ່ງຕັ້ງຄະນະກອງບັນຊາການ ແລະຄະນະຫ້ອງຂອງກອງບັນຊາການທະຫານແຂວງຫຼວງນໍ້າທາໂດຍປະຕິບັດຕາມກົດໝາຍນາຍທະຫານກອງທັບປະຊາຊົນລາວສະບັບປັບປຸງໃນພາກທີ II ໝວດທີ 4 ມາດຕາ 26 ວ່າດ້ວຍການແຕ່ງຕັ້ງ, ຍົກຍ້າຍນາຍທະຫານ, ກະຊວງປ້ອງ ກັນປະເທດຕົກລົງແຕ່ງຕັ້ງ ທ່ານ ພັນໂທ ຄຳເປີງ ໄຊທະວີ ເປັນຮອງຫົວໜ້າກອງບັນຊາການທະຫານແຂວງຮັບຜິດຊອບວຽກງານພາລາທິການທັງເປັນຫົວໜ້າຫ້ອງ ພາລາທິການ, ທ່ານ ພັນໂທ ກໍາມະນີ ມິດລະແສນ ເປັນຮອງຫົວໜ້າຫ້ອງພາລາທິການ ແລະຂໍ້ຕົກລົງຂອງກົມໃຫຍ່ການເມືອງກອງທັບສະບັບເລກທີ 618/ ກມທ, ລົງວັນທີ 11 ກຸມພາ 2020 ວ່າດ້ວຍການແຕ່ງຕັ້ງຮອງຫົວໜ້າພະແນກຂົນສົ່ງກອງບັນຊາການທະຫານແຂວງຫຼວງນໍ້າທາ,ກົມໃຫຍ່ການເມືອງກອງທັບຕົກລົງແຕ່ງ ຕັ້ງທ່ານ ພັນຕີ ຄຳພອນ ລໍຫວັນວົງສາ ເປັນຮອງຫົວໜ້າພະແນກຂົນສົ່ງຂອງກອງບັນຊາການທະຫານແຂວງຫຼວງນໍ້າທາ.


 ໂອກາດນີ້ທ່ານ ພົນຕີ ວົງຄໍາ ພົມມະກອນ ຄະນະປະຈຳພັກກະຊວງຫົວໜ້າກົມໃຫຍ່ພາລາທິການກອງກັບໄດ້ໂອ້ລົມເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຫຼາຍດ້ານຂອງອ້າຍນ້ອງນາຍ ແລະພົນທະຫານທີ່ຍາດມາໄດ້ໃນໄລຍະຜ່ານມາ ແລະທ່ານໄດ້ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງໃນຄັ້ງນີ້ຈົ່ງພ້ອມກັນເຊີດຊູນໍ້າໃຈອັນແຮງກ້າຊີ້ນຳ-ນຳພາອ້າຍນ້ອງໃນຂອບເຂດຄວາມຮັບຜິດຊອບຂອງຕົນໃຫ້ມີປະສິດຕິພາບສູງ ແລະມີຜົນສຳເລັດໃນທຸກດ້ານ.

-----------------

ຂຽນໂດຍ:  ມຸນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์