ກະຊວງ ຖວທ ເນັ້ນພາກທຸລະກິດທີ່ໃຫ້ເປີດບໍລິການຕ້ອງເຂັ້ມງວດປ້ອງກັນໂຄວິດ-19

   ພາກທຸລະກິດບໍລິການທ່ອງທ່ຽວເປັນຕົ້ນໂຮງແຮມ, ຣີສອດ, ເຮືອນພັກ, ຮ້ານອາຫານ, ຮ້ານກາເຟ ແລະ ຮ້ານເສີມຄວາມງາມພາຍຫຼັງທີ່ລັດຖະບານມີນະໂຍບາຍຜ່ອນຜັນໃຫ້ເປີດບໍລິການຕາມຄວາມຮຽກຮ້ອງຂອງສັງຄົມ ແລະຜູ້ປະ ການ ຕ້ອງເອົາໃຈໃສ່ຢ່າງເຂັ້ມງວດຕໍ່ມາດຕະການປ້ອງກັນພະຍາດໂຄວິດ-19 ຂະນະທີ່ຜ່ານມາຍັງມີຜູ້ປະກອບການຈຳນວນໜຶ່ງຍັງຖືເບົາໂດຍສະເພາະແມ່ນຂາດການວັດແທກອຸນຫະພູມຮ່າງກາຍ ແລະອື່ນໆຊຶ່ງເປັນຄວາມສ່ຽງຕໍ່ໃຫ້ບໍລິການລວມທັງຜູ້ໃຊ້ບໍລິການ.


  ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງທະແຫຼງຂ່າວວັດຖະນະທຳ ແລະທ່ອງທ່ຽວທັງເປັນຄະນະສະເພາະກິດຖະແຫຼງໃຫ້ຮູ້ວ່າ: ວັນທີ 3 ພຶດສະ ພາມາຜ່ານມານີ້ກະຊວງ ຖວທ ໄດ້ອອກຄຳແນະນຳ ແລະ ແຈ້ງການກ່ຽວກັບການສືບຕໍ່ປະຕິບັດມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ໜຶ່ງໃນນັ້ນແມ່ນອະນຸຍາດໃຫ້ໂຮງແຮມ,ຣີສອດ, ເຮືອນພັກ, ຮ້ານອາຫານ, ຮ້ານກາເຟ, ຮ້ານຕັດຜົມ ແລະຮ້ານເສີມຄວາມງາມເປີດບໍລິການໄດ້ແຕ່ຕ້ອງປະຕິບັດການປ້ອງກັນຢ່າງເຂັ້ມງວດ.
 ຢ່າງໃດກໍຕາມນັບແຕ່ນັ້ນມາໜ່ວຍງານທີ່ກ່ຽວຂ້ອງໃນຂະແໜງ ຖວທ ກໍໄດ້ມີຄວາມເອົາໃຈໃສ່ລົງຕິດຕາມກວດກາການຈັດຕັ້ງປະຕິບັດເຫັນວ່າຫຼາຍຫົວໜ່ວຍທຸລະກິດແມ່ນມີຄວາມເອົາໃຈໃສ່ດີແຕ່ຍັງມີຈຳນວນໜຶ່ງຍັງປະຕິບັດບໍ່ທັນເຂັ້ມງວດເປັນຕົ້ນແມ່ນບາງຮ້ານຍັງຂາດອຸປະກອນກວດອຸນຫະພູມຮ່າງກາຍ ແລະ ອື່ນໆ ທີ່ຈຳເປັນຊຶ່ງຈະເປັນຄວາມສ່ຽງທັງຜູ້ໃຫ້ບໍລິການ ແລະໃຊ້ບໍລິການ.


 ທັງນີ້ ທ່ານ ສະຫວັນຄອນ ຣາຊມຸນຕີ ໄດ້ແນະນຳໃຫ້ປະຕິບັດເຂັ້ມງວດສຳລັບຜູ້ປະກອບການໂຮງແຮມ, ຣີສອດ, ເຮືອນພັກ, ຮ້ານອາຫານ, ຮ້ານກາເຟ, ຮ້ານຕັດ ຜັກ, ຮ້ານເສີມສວຍ; ຕ້ອງແທກອຸນຫະພູມພະນັກງານກ່ອນເຂົ້າເຮັດວຽກຖ້າພົບວ່າມີອຸນຫະພູມສູງກວ່າ 37,5 ອົງສາ ໃຫ້ໂທຫາສາຍດ່ວນ 165 ຫຼື 166 ເພື່ອຂໍຄຳປຶກສາ; ຕ້ອງໃຫ້ຂໍ້ມູນ, ຄວາມຮູ້ ແລະຄຳແນະນຳກ່ຽວກັບການປ້ອງກັນລະບາດພະຍາດໂຄວິດ-19 ເປັນຕົ້ນການລ້າງມືໃຫ້ຖືກວິທີ, ອາການ ແລະວິທີປ້ອງກັນຕົນ ເອງແກ່ຜູ້ມາໃຊ້ບໍລິການ ແລະ ພະນັກງານທຸກຄົນຕ້ອງໃສ້ຜ້າອັດປາກ-ດັງ; ຈັດອ່າງລ້າງມືພ້ອມສະບູ່ ຫຼືເຈວລ້າງມື ຫຼືເຫຼົ້າ 70% ຂຶ້ນໄປສຳລັບຂ້າເຊື້ອໄວ້ປະຕູທາງ ເຂົ້າຮ້ານ, ຫ້ອງນໍ້າ, ບໍລິເວນໂຕະຈ່າຍເງິນເພື່ອໃຫ້ບໍລິການແກ່ຜູ້ມາໃຊ້ບໍລິການລວມທັງພະນັກງານໃນຮ້ານ; ຕ້ອງຈັດຫາຖົງມື, ນໍ້າຢາຂ້າເຊື້ອ ຫຼືເຫຼົ້າ 70% ຂຶ້ນໄປ ຫຼືນໍ້າແຟັບ ແລະອື່ນໆ ສຳລັບອະນາໄມອຸປະກອນ ແລະເຄື່ອງໃຊ້ທີ່ມີຜູ້ສຳຜັດຈຳນວນຫຼາຍເປັນຕົ້ນປຶ້ມລາຍການອາຫານ, ໂຕະອາຫານ,ບ່ອນຈັບປະຕູເຂົົ້າ-ອອກ, ບ່ອນໄຂປະຕູຫ້ອງນໍ້າ, ອຸປະກອນຕັດຜົມ ແລະເສີມສວຍ; ສຳລັບອຸປະກອນເຄື່ອງໃຊ້ໃນຫ້ອງນອນ, ໃນຫ້ອງນໍ້າ, ອຸປະກອນຕັດຜົມ, ອຸປະກອນເສີມສວຍຕ້ອງໃຫ້ມີການອະນາໄມດ້ວຍນໍ້າຢາຂ້າເຊື້ອກ່ອນ ແລະຫຼັງໃຊ້ທຸກຄັ້ງ.
  ສຳລັບຜູ້ໃຫ້ບໍລິການຕ້ອງແທກອຸນຫະພູມພະນັກງານກ່ອນເຂົ້າເຮັດວຽກຖ້າພົບວ່າມີອຸນຫະພູມສູງກວ່າ 37,5 ອົງສາໃຫ້ໂທຫາສາຍດ່ວນ 165 ຫຼື 165 ເພື່ອຂໍຄຳ ປຶກສາ; ຕ້ອງຮັກສາຫຼັກການອະນາໄມເປັນຕົ້ນໃສ່ຜ້າອັດປາກ-ດັງ, ໃສ່ຖົງມື, ໝວດຄຸມຜົມ, ການນຸ່ງຖືສະອາດ ແລະໝັ່ນລ້າງມືໃສ່ສະບູເປັນປະຈຳ; ຕ້ອງຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ; ຕ້ອງຮັກສາມາລະຍາດໃນການໄອ-ຈາມ.
  ສຳລັບຜູ້ມາໃຊ້ບໍລິການ (ລູກຄ້າ) ທຸກໆຄົນທີ່ເຂົ້າມາໃນຮ້ານຕ້ອງໄດ້ຮັບການແທກອຸນຫະພູມຖ້າພົບວ່າມີອຸນຫະພູມສູງກວ່າ 37,5 ອົງສາແມ່ນບໍ່ອະນຸຍາດໃຫ້ເຂົ້າໃນຮ້ານ ແລະໃຫ້ໂທຫາສາຍດ່ວນ 165 ຫຼື 166 ເພື່ອຂໍຄຳປຶກສາ; ຕ້ອງລ້າງມືດ້ວຍສະບູ ຫຼືເຈວລ້າງມື ຫຼື ເຫຼົ້າສຳລັບຂ້າເຊື້ອທີ່ຮ້ານກະກຽມໄວ້ກ່ອນເຂົ້າ ແລະອອກຈາກຮ້ານ ແລະໃສ່ຜ້າອັດປາກ-ດັງ; ຕ້ອງຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ; ຕ້ອງຮັກສາມາລະຍາດໃນການໄອ-ຈາມ ແລະ ຖິ້ມຂີ້ເຫຍື້ອຕາມບ່ອນທີ່ຮ້ານກຳ ນົດໄວ້.


  ສະຖານທີ່ຕ້ອງໃຫ້ມີອາການຖ່າຍເທດີ ແລະບໍ່ແອອັດ; ການຈັດສະຖານທີ່ຕ້ອງຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ; ຕ້ອງອະນາໄມທຸກມື້ (ເຊົ້າ ແລະແລງ) ເປັນຕົ້ນ: ພື້ນ, ຝາ, ເພດານ, ໂຕະ, ຕັ່ງ, ຫ້ອງນໍ້າດ້ວຍນໍ້າຢາຂ້າເຊື້ອໂຊດຽມຮາຍໂປກໍຣຣິດ (Sodium Hypochlorite) 0,1%, ນໍ້າແຟັບ, ໄຮເຕີ ຫຼືເຫົ້ຼາ 70% ຂຶ້ນໄປ ແລະອື່ນໆ; ກຳນົດໃຫ້ມີທາງອອກ ແລະທາງເຂົ້າຢ່າງຈະແຈ້ງ; ບໍລິເວນໂຕະຈ່າຍເງິນຕ້ອງມີເຈວລ້າງມື ຫຼືເຫົ້ຼາສຳລັບອະນາໄມຂ້າເຊື້ອ.

-------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์