ທນບ ສືບຕໍ່ນຳໃຊ້ແຫຼ່ງທຶນມີຜົນຕາມເປົ້າໝາຍ ປີນີ້ກຽມປ່ອຍ 295,2 ຕື້ກີບ

  ກອງປະຊຸມສະພາບໍລິຫານທະນາຄານນະໂຍບາຍ (ທນບ) ໄດ້ຈັດຂຶ້ນໃນວັນທີ 5 ພຶດສະພາ 2020 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ປະທານສະພາບໍລິຫານທນບ; ພ້ອມນີ້, ກໍ່ມີບັນດາຄະນະກຳມະການສະພາບໍລິຫານ ທນບ, ບັນດາຄະນະອໍານວຍການ ທນບ ແລະພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ວຸດທິ ເລື່ອນວິໄລວົງ ຜູ້ອໍານວຍການ ທນບ ລາຍງານຜົນການຈັດຕັ້ງປະຕິບັດການສະໜອງສິນເຊື່ອມາຮອດປະຈຸບັນມີຍອດສິນເຊື່ອຮອດທ້າຍປີ 2019 ຈຳນວນ 2.936,51 ຕື້ກີບ, ເທົ່າກັບ 103% ຂອງແຜນປີ ( 2.859,6 ຕື້ກີບ) ໃນນີ້ຍອດສິນເຊື່ອລາຍກຸ່ມຈຳນວນ 1.927,01 ຕື້ກີບ ກວມເອົາ 18 ແຂວງ, 125 ເມືອງ, 3.340 ບ້ານ, 53.193 ກຸ່ມ 190.234 ຄອບຄົວ ໃນນີ້ເປັນຄອບຄົວທຸກຍາກ 40.203 ຄອບຄົວ ເທົ່າກັບ 21% ແລະຍອດສິນເຊື່ອລາຍບຸກຄົນຈຳ ນວນ 1.009,50 ຕື້ກີບ, 2.484 ລາຍ, ໄລຍະສັ້ນ 266,17 ຕື້ກີບ, ໄລຍະກາງ 765,02 ຕື້ກີບ, ໄລຍະຍາວ1.905,31 ຕື້ກີບ.

ພາບຂ່າວ
  ຍອດສິນເຊື່ອກວມເອົາບັນດາຂະແໜງການຜະລິດມີປູກຝັງຈຳນວນ 944,02 ຕື້ກີບ, ລ້ຽງສັດ 1.712,18 ຕື້ກີບ, ຫັດຖະກໍາ 35,77 ຕື້ກີບ, ອຸດສາຫະກຳປຸງແຕ່ງ 83,70 ຕື້ກີບ,ການບໍລິການ160,81 ຕື້ກີບ. ຍອດສິນເຊື່ອແຍກຕາມຂົງເຂດໃຫ້ບໍລິການໃນເມືອງເປົ້າໝາຍຈຳນວນ 1.903,10 ຕື້ກີບ,ຈຸດສຸມລັດຖະບານ-ທ້ອງຖິ່ນ 320,28 ຕື້ກີບ ແລະບ້ານ 3 ສ້າງ 296,38 ຕື້ກີບ; ໂຄງການຜະລິດ ສິນຄ້າ 416,75 ຕື້ກີບ.
 ຜ່ານການຈັດຕັ້ງປະຕິບັດຕົວຈິງສາມາດປະເມີນປະສິດທິຜົນສິນເຊື່ອເປົ້າໝາຍຕ່າງໆຄື:ເປົ້າໝາຍລ້ຽງງົວຈຳນວນ 1.026,30 ຕື້ກີບກວມເອົາ 52,552 ຄອບຄົວ, ຊື້ງົວ 193.916 ໂຕ, ເປົ້າໝາຍລ້ຽງແບ້ 75,63 ຕື້ກີບ, 4.009 ຄອບຄົວ, ຊື້ແບ້ມາລ້ຽງ 21.443 ໂຕ, ເປົ້າໝາຍລ້ຽງໝູ 271,80 ຕື້ກີບ, 10.853 ຄອບ ຄົວ, ຊື້ໝູມາລ້ຽງ 62.635 ໂຕ, ເປົ້າໝາຍລ້ຽງຄວາຍ 18,76 ຕື້ກີບ, 929 ຄອບຄົວ, ຊື້ຄວາຍມາລ້ຽງ2.839ໂຕ, ປູກໝາກແໜ່ງ 74,78 ຕືກີບ, 3.670 ຄອບຄົວ,ເນື້ອທີ່ການຜະລິດ 450 ຮຕ, ຜົນຜະລິດ200 ໂຕນ, ປູກມັນຕົ້ນ 152,95 ຕືກີບ ກວມເອົາ 6.461 ຄອບຄົວ, ເນື້ອທີ່ການຜະລິດ 31.900 ຮຕ, ຜົນຜະລິດ127.511 ໂຕນ, ປູກເຂົ້ານາປີ 23,63 ຕື້ກີບກວມເອົາ 6.898 ຄອບຄົວ, ເນື້ອທີ່ການຜະລິດ 3.020 ຮຕ, ຜົນຜະລິດ 12.075 ໂຕນ.
 ສໍາລັບໃນໄລຍະປີ 2019 ໄດ້ເກີດມີຜົນເສຍຫາຍຈາກໄພນໍ້າຖ້ວມ 6 ແຂວງ, 20 ເມືອງ, 156 ບ້ານ, 2.985 ຄອບຄົວວົງເງິນກູ້ຢືມທັງໝົດ 45,59 ຕື້ກີບ,ມູນຄ່າຄວາມເສຍຫາຍຕົວຈິງ 26,79 ຕື້ກີບ ປະຈຸບັນທນບກຳລັງກຳນົດວິທີທາງແກ້ໄຂ, ປະຕິບັດນະໂຍບາຍຕ່າງໆ ແລະສ້າງແຜນຟື້ນຟູຊ່ວຍລູກຄ້າທີ່ຖືກຜົນກະທົບຕາມລະບຽບ, ຂັ້ນຕອນຂອງ ທນບ. ພ້ອມດຽງກັນກໍ່ເກີດມີພະຍາດລະບາດ(ພະຍາດອະຫິວາໝູອາຟຣິກກາ) ຢູ່ 3 ແຂວງ, 6 ເມືອງ, 42 ບ້ານ, 207 ກຸ່ມ, 1.174 ຄອບຄົວມູນຄ່າທີ່ຖືກຜົນກະທົບທັງໝົດ 10,06 ຕື້ກີບ ມີໝູ 7.383 ໂຕ.

 ສະໜັບສະໜູນໂດຍ: HONDA
ທ່ານຜູ້ອໍານວຍການ ທນບ ໄດ້ສະເໜີແຜນວຽກຈຸດສຸມປະຈຳປີ 2020 ໂດຍສືບຕໍ່ປັບປຸງກົງຈັກການຈັດຕັ້ງພາຍໃນ ແລະປັບປຸງກົງຈັກການຈັດຕັ້ງບາງຂະແໜງການທີ່ຂຶ້ນກັບພະແນກພາຍໃນສຳນັກງານໃຫຍ່. ສ້າງຍຸດທະສາດການສະໜອງສິນເຊື່ອໃນໄລຍະໃໝ່, ປັບປຸງນິຕິກຳເປັນຕົ້ນລະບຽບການຄຸ້ມຄອງພະນັກງານ, ລະບຽບສະຫວັດດີການ, ລະບຽບອື່ນໆໃຫ້ສອດຄ່ອງ ແລະເໝາະສົມກ່ວາເກົ່າ. ສະເໜີຂໍແຫຼ່ງທຶນຈາກ ທຫລ ເພື່ອສະໜອງສິນເຊື່ອປະຈຳປີ 2020 ຄາດຄະເນແຜນການທັງ ໝົດ295,22 ຕື້ກີບ, ໃນນີ້ໄລຍະສັ້ນ 37,56 ຕື້ກີບ, ໄລຍະກາງ 92,74 ຕື້ກີບ ແລະໄລຍະຍາວ 164,92 ຕື້ກີບ. ສືບຕໍ່ປ່ອຍສິນເຊື່ອແຜນການປີ 2020 ໃຫ້ໄດ້ຕາມແຜນການ 326,76 ກີບ ແລະວຽກສໍາຄັນອື່ນໆອີກຈໍານວນໜຶ່ງ.

_______________

ຂຽນໂດຍ:  ຣັດສະໝີ ດວງສັດຈະ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์