ຫຼວງພະບາງ ວາງເປົ້າຮອດປີ 2030 ຈະໃຫ້ປະຊາຊົນມີຊີວິດທີ່ດີຂື້ນ

  ແຂວງຫຼວງພະບາງໄດ້ວາງວິໄສທັດຮອດປີ 2030 ຈະໃຫ້ກາຍເປັນສູນກາງການທ່ອງທ່ຽວທີ່ມີຄຸນນະພາບລະດັບໂລກ, ຕິດພັນກັບການປົກປັກຮັກສາມໍລະດົກໂລກທີ່ຍືນຍົງ, ການຜະລິດກະສິກຳປອດສານຜິດ, ກາຍເປັນສູນກາງທາງດ້ານວັດທະນະທຳການຮຽນຮູ້ ແລະຈະໃຫ້ປະຊາຊົນມີອາຊີບທີ່ໝັ້ນທ່ຽງ, ຊີວິດການເປັນຢູ່ອີ່ມໜຳສຳລານດີຂຶ້ນກວ່າເກົ່າ.
  ທ່ານ ສາຍສະຫມອນ ຄົມທະວົງ ຮອງເລຂາພັກແຂວງໆຫຼວງພະບາງ ໄດ້ກ່າວໃຫ້ຮູ້ວ່າງບໍ່ດົນນີ້ວ່າ: ເພື່ອໃຫ້ວິໄສທັດທີ່ວາງໄວ້ປະກົດຜົນເປັນຈິງນັ້ນທາງອໍານາດການປົກຄອງແຂວງຫຼວງພະບາງຈະໄດ້ເລັ່ງໃສ່ 7ເປົ້າໝາຍຫຼັກທີ່ວາງອອກຄື: 1. ຕ້ອງຮັກສາສະຖຽນລະພາບທາງດ້ານການເມືອງ,ຮັບປະກັນໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະຍຸຕິທຳປະຊາຊົນມີຄວາມສາມັກຄີປອງດອງເປັນປຶກແຜ່ນແໜ້ນໜາ. 2. ພັດທະນາອຸດສາຫະກຳການທ່ອງທ່ຽວໃຫ້ກາຍເປັນເສດ ຖະກິດເສົາຄໍ້າ ແລະເຮັດໃຫ້ຫຼວງພະບາງກາຍເປັນຈຸດໝາຍປາຍທາງການທ່ອງທ່ຽວຂອງນັກທ່ອງທ່ຽວໃນທົ່ວໂລກ. 3. ຖືເອົາການປົກປັກຮັກສາ ແລະສົ່ງເສີມວັດທະອນາທຳ, ຮີດຄອງປະເພນີອັນດີງາມຂອງເມືອງມໍລະດົກໂລກ ແລະການພັດທະນາຊັບພະຍາກອນມະນຸດ ເປັນປັດໄຈສໍາຄັນ, ເອົາການພັດທະນາເສດຖະກິດເປັນໃຈກາງ ແລະການຮັກສາສິ່ງແວດລ້ອມເປັນເງື່ອນໄຂທີ່ຈຳເປັນຂອງການພັດທະນາ. 4. ຕັ້ງໜ້າບູລະນະສົ່ງເສີມການປູກໄມ້ເປັນປ່າ, ການຜະລິດກະສິກຳສະອາດ ແລະນໍາໃຊ້ຊັບພະຍາກອນທໍາມະຊາດຢ່າງປະຍັດ, ມີປະສິດທິຜົນເພື່ອເຮັດໃຫ້ຫຼວງພະບາງເປັນເມືອງສີຂຽວ, ສະອາດ, ມີສິ່ງແວດລ້ອມທີ່ດີ ແລະ ໜ້າຢູ່. 5. ພັດທະນາເສດຖະກິດ ໃຫ້ຂະຫຍາຍຕົວຢ່າງຕໍ່ເນື່ອງ, ຍູ້ແຮງການຫັນປ່ຽນໂຄງປະກອບເສດຖະກິດໃຫ້ໄປຕາມທິດຫັນເປັນການບໍລິການ; ອຸດສາຫະກຳ ແລະກະສິກຳ-ປ່າໄມ້ທີ່ສະອາດ, ເຮັດໃຫ້ລວມຍອດຜະລິດຕະພັນພາຍໃນສະເລ່ຍໃສ່ຫົວຄົນບັນລຸໄດ້ 5.500 ໂດລາສະຫະລັດຕໍ່ຄົນຕໍ່ປີ, ມີລະບົບການເງິນ-ເງິນຕາທີ່ທັນສະໄໝ, ມີປະສິດທິພາບ, ສະດວກຄ່ອງຕົວໃນການເອື້ອອຳນວຍໃຫ້ແກ່ການບໍລິການດ້ານການເງິນ, ການລົງທຶນ ແລະການຜະລິດ-ທຸລະກິດ. 6. ພັດທະນາການສຶກສາໃຫ້ມີຄຸນນະພາບໃກ້ຄຽງກັບພາກພື້ນ ແລະ ສາກົນກາຍເປັນກຳລັງການຜະລິດແຮງງານທີ່ເຂັ້ມແຂງຕອບສະໜອງຄວາມຕ້ອງການພັດທະນາເສດຖະກິດ-ສັງຄົມ ໃນໄລຍະໃຫມ່ ແລະ ເປົ້າໝາຍທີ 7 ແມ່ນການພັດທະນາພະລັງງານໄຟຟ້ານໍ້າຕົກໃຫ້ກາຍເປັນຕ່ອງໂສ້ທີ່ສຳຄັນໃນການນຳພາເສດຖະກິດພາກສ່ວນອື່ນໆໃຫ້ສະດວກ.


  ຢ່າງໃດກໍຕາມເພື່ອໃຫ້ວິໄສທັດຮອດປີ 2030 ພະບາງຈະໃຫ້ປະຊາຊົນມີຊີວິດການເປັນຢູ່ດີຂຶ້ນ,ຈະໃຫ້ແຂວງຫຼວງພະບາງກາຍເປັນສູນກາງການທ່ອງທ່ຽວທີ່ມີຄຸນນະ ພາບລະດັບໂລກ,ກາຍເປັນສູນກາງທາງດ້ານວັດທະນະທຳການຮຽນຮູ້ ແລະໃຫ້ປະຊາຊົນມີຊີວິດການເປັນຢູ່ອີ່ມໜຳສຳລານຄຽງຄູ່ຢູ່ກັບການປົກປັກຮັກສາເມືອງມໍລະດົກໂລກຫຼວງພະບາງໃຫ້ຍືນຍົງຢູ່ກັບຊາວລາວກໍຄືຊາວຫຼວງພະບາງຕະຫຼອດໄປນັ້ນແມ່ນຂື້ນຢູ່ກັບທຸກພາກສ່ວນຂອງໜ່ວຍງານລວມທັງພາກລັດ ແລະ ເອກະຊົນທຸກຄົນຕ້ອງເປັນເຈົ້າການໃນການຮ່ວມກັນພັດທະນາໃຫ້ບ້ານເມືອງມີຄວາມສີວິໄລຂຶ້ນໄປເທື່ອລະກ້າວ.

-------------------

ຂຽນໂດຍ: ສີສຸວັນ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์