ສະຫວັນ ພ້ອມດ້ານສະຖານທີ່ຮອງຮັບຜູ້ຕິດເຊື້ອ

  ໃນວັນທີ 30 ເມສາຜ່ານມານີ້, ທ່ານ ບຸນແຝງ ພູມມະໄລສິິດ ຮອງລັດຖະມົນຕີກະຊວງສາທາລະນະສຸກທັງເປັນຫົວໜ້າຄະນະກະກຽມສະຖານທີ່ຮອງຮັບການແຍກປ່ຽວ ແລະ ປິ່ນປົວພະຍາດໂຄວິດ-19 ພ້ອມຄະນະໄດ້ເດີນທາງລົງມາເຮັດວຽກທີ່ແຂວງສະຫວັນນະເຂດເພື່ອເກັບກຳຂໍ້ມູນ ແລະ ຮ່ວມປຶກສາຫາລືກັບແຂວງກ່ຽວກັບການກະກຽມສະຖານທີ່ຮອງຮັບຫາກພົບມີກໍລະນີຕິດເຊື້ອພະຍາດໂຄວິດ-19 ໃຫ້ກຽດຕ້ອນຮັບ ແລະຮ່ວມປຶກສາຫາລືໃນຄັ້ງນີ້ຂອງ ທ່ານ ປອ ໂພໄຊ ໄຊຍະສອນຮອງເຈົ້າ ແຂວງສະຫວັນນະເຂດ ທັງເປັນປະທານຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂສະພາບການລະບາດຂອງພະຍາດໂຄວິດ-19 ຂັ້ນແຂວງຈາກນີ້ກໍ່ມີພະແນກການກ່ຽວຂ້ອງ ແລະໂຮງໝໍແຂວງເຂົ້າຮ່ວມ.

  ໂອກາດນີ້, ທ່ານຮອງລັດຖະມົນຕີກະຊວງສາທາລະນະສຸກກ່າວວ່າ: ໃນການລົງມາເຄື່ອນໄຫວວຽກງານທີ່ແຂວງສະຫວັນນະເຂດໃນຄັ້ງນີ້ກໍເພື່ອມາຮ່ວມປຶກສາຫາລືກັບແຂວງໃນການກະກຽມຄວາມພ້ອມດ້ານສະຖານທີ່ຮອງຮັບຄົນຕ່າງປະເທດກໍຄືແຮງງານລາວທີ່ຈະເດີນທາງກັບມາຈາກຕ່າງປະເທດຕະຫຼອດເຖິງສະຖານທີ່ໆ ຈະຮອງຮັບເມື່ອເກີດມີການລະບາດຂອງພະຍາດໂຄວິດ-19 ເກີດຂຶ້ນພາຍໃນແຂວງຊຶ່ງຈະຕ້ອງໄດ້ມີທັງສະຖານທີ່ຮອງຮັບຄົນເຈັບ, ແພດໝໍ ແລະຜູ້ໃກ້ສິດຄົນເຈັບໂດຍຈຸດທີ່ຈະກຳນົດເປັນສະຖານທີ່ຮອງຮັບນັ້ນຕ້ອງໄດ້ຕາມມາດຕະຖານ ແລະຖືກຕາມຫຼັກວິຊາການຢ່າງຄັກແນ່ທັງນີ້ກໍເພື່ອສະກັດກັ້ນບໍ່ໃຫ້ເກີດມີກໍລະນີໃໝ່ເພີ່ມຂຶ້ນ.

  ຈາກນັ້ນ, ທ່ານຮອງເຈົ້າແຂວງສະຫວັນນະເຂດ ກໍໄດ້ລາຍງານກ່ຽວກັບການເຝົ້າລະວັງ ແລະການປະຕິບັດມາດຕະການເພື່ອສະກັດກັ້ນ ແລະຕ້ານການແຜ່ລະບາດຂອງພະຍາດໂຄວິດ-19 ພາຍໃນແຂວງຊຶ່ງເຫັນວ່າທຸກພາກສ່ວນສັງຄົມໄດ້ໃຫ້ຄວາມຮ່ວມມືເປັນຢ່າງດີ ແລະໄດ້ເອົາໃຈໃສ່ໃນການປະຕິບັດຕາມຄຳສັ່ງເລກທີ 06 ຂອງນາຍົກລັດຖະມົນຕີວາງອອກຢ່າງເຂັ້ມງວດ, ທົ່ວແຂວງມີສູນກັກກັນທັງໝົດ 481 ແຫ່ງ, ມີຈຳນວນຄົນເຂົ້າສູນ 26.000 ຄົນ, ມາຮອດປະຈຸບັນສູນກັກກັນຍັງເຫຼືອພຽງ 4 ສູນ ແລະຍັງມີແຮງງານຍັງຄ້າງສູນ 50 ກວ່າຄົນ.

  ຫຼັງຈາກນັ້ນ, ທ່ານ ດຣ ນາງ ພູວິໄລ ແກ້ວມຸງຄຸນ ຜູ້ອຳນວຍການໂຮງໝໍແຂວງໄດ້ລາຍງານໃຫ້ຮູ້ວ່າ: ຕາມການຕົກລົງເປັນເອກະພາບຂອງກົມປິ່ນປົວ, ອົງການອະນາໄມໂລກ ແລະທີມຊ່ຽວ ຊານຈາກສູນກາງໄດ້ກຳນົດເອົາບາງ ຕຶກຢູ່ໃນໂຮງໝໍແຂວງເປັນບ່ອນກັກກັນ ແລະປິ່ນປົວພະຍາດໂຄວິດ-19 ໂດຍ ແບ່ງເຂດທີ່ຊັດເຈນ ແລະຈະໄດ້ກຳນົດ ເອົາ 4 ຕຶກ ໃນນັ້ນມີຕຶກໂລກຊາມີຢູ່ 6 ຫ້ອງ ເປັນຫ້ອງແຍກປ່ຽວທີ່ສາມາດປິ່ນປົວພະຍາດໂຄວິດ-19 ໄດ້ 12 ຄົນ ຖ້າເປັນບ່ອນກັກກັນກໍ່ຈະໄດ້ພຽງ 6 ຄົນ, ມີຕຶກພາຍໃນ 1 ແລະພາຍໃນ 2 ລວມ 40 ຕຽງ ແລະຕຶກຊຶມເຊື້ອປະກອບຕຽງເຂົ້າໄດ້ 31 ຕຽງ ສະນັ້ນ, ຢູ່ໂຮງໝໍແຂວງຈະສາມາດປິ່ນປົວຄົນເຈັບໂຄວິດ-19 ໄດ້ຢູ່ 71 ຄົນ, ຖ້າ ຫາກເຫຼືອຈາກ 71 ຄົນ ແມ່ນມີແຜນກໍານົດເອົາບ່ອນພັກຂອງກໍາມະກອນເຂດເສດຖະກິດພິເສດ, ຊຶ່ງຕຶກດັ່ງກ່າວ ມີ 5 ຊັ້ນ ແຕ່ລະຊັ້ນມີ 19 ຫ້ອງສາມາດບັນຈຸໄດ້ 200 ຕຽງ, ຖ້າຫາກວ່າເກີດການລະບາດຫຼາຍແມ່ນຈະໄດ້ຍ້າຍຄົນເຈັບທົ່ວໄປ, ໄປປິ່ນປົວຢູ່ໂຮງໝໍທະຫານແຂວງຊຶ່ງປະຈຸບັນໂຮງໝໍແຂວງແມ່ນຍັງໄດ້ຮັບປິ່ນປົວຄົນເຈັບທົ່ວໄປປົກກະຕິ.

____________

ໜັງສືພິມເສດຖະກິດ-ສັງຄົມ

แชร์