ຄຳມ່ວນ ກຳນົດສູນກັກກັນໃໝ່ຮອງຮັບແຮງງານຈາກຕ່າງປະເທດ

  ແຂວງຄຳມ່ວນໄດ້ກຳນົດເອົາອາຄານຂອງໂຮງຮຽນການເມືອງ-ການປົກຄອງແຂວງເປັນສູນກັກກັນຊົ່ວຄາວເພື່ອຮອງຮັບແຮງງານທີ່ກັບຈາກຕ່າງປະເທດ ແລະເຂດທີ່ມີຄວາມສ່ຽງສ່ວນຂັ້ນເມືອງຕ້ອງມີສູນກັກກັນ ແລະສູນແຍກປ່ຽວປິ່ນປົວເມືອງລະ 1 ແຫ່ງ.

 ທ່ານ ດຣ ພາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກທັງເປັນຫົວໜ້າກອງເລຂາສະເພາະກິດຄວບຄຸມ ແລະສະກັດກັ້ນພະຍາດໂຄວິດ-19 ແຂວງຄຳມ່ວນກ່າວວ່າ: ເຖິງວ່າສະພາບການແຜ່ລະບາດຂອງພະຍາດໂຄວິດ-19 ຢູ່ໃນ ສ ປປ ລາວ ຈະມີທ່າທີຢູ່ຕົວ ແລະບໍ່ຂະຫຍາຍອອກເປັນວົງກວ້າງກໍ່ຕາມແຕ່ການເຝົ້າລະ ວັງຄວບຄຸມ ແລະສະກັດກັ້ນກໍ່ບໍ່ໄດ້ລົດລະຍັງສືບຕໍ່ຕິດຕາມຢ່າງເຂັ້ມງວດ, ສະເພາະຢູ່ຂັ້ນແຂວງຄຳມ່ວນແມ່ນໄດ້ກຳນົດເອົາອາຄານຂອງໂຮງຮຽນການເມືອງ-ການ ປົກ ຄອງເປັນສູນກັກກັນຊົ່ວຄາວໃໝ່ຕາມແຈ້ງການໄລຍະ 2 ເລກທີ 507/ຫສນຍ ເພື່ອຮອງຮັບແຮງງານທີ່ກັບຈາກຕ່າງປະເທດ, ຊຶ່ງໃນຕອນບ່າຍວັນທີ 4 ພຶດສະພາ ບັນດາອົງການຈັດຕັ້ງມະຫາຊົນປະກອບມີ: ກຳມະບານ, ຊາວໜຸ່ມ ແລະແມ່ຍິງໄດ້ພ້ອມກັນອະນາໄມອາຄານໃຫ້ມີຄວາມສະອາດ ແລະເປັນລະບຽບຮຽບຮ້ອຍແລ້ວຈະໄດ້ຈັດສັນອຸປະກອນຕ່າງໆປະກອບເຂົ້າໃນສູນເພື່ອກະກຽມຄວາມພ້ອມໃນສູນດັ່ງກ່າວ, ສຳລັບຊ່ຽວຊານສະເພາະດ້ານໃດໜຶ່ງທີ່ມາ ຈາກຕ່າງປະເທດແມ່ນໄດ້ກຳນົດເອົາໂຮງແຮມພອນປະດິດເປັນສູນກັກກັນຊຶ່ງທຸກໆ ກໍລະນີທີ່ເຂົ້າສູນແມ່ນຈະຕ້ອງໄດ້ຜ່ານການກວດກາ ແລະ ກັກໂຕເປັນໄລຍະເວລາ14 ວັນຈຶ່ງອະນຸຍາດໃຫ້ອອກໄປເຮັດວຽກ ຫຼືກັບໄປຫາຄອບຄົວໄດ້, ສຳລັບສູນແຍກປ່ຽວປິ່ນປົວແມ່ນໄດ້ກຳນົດເອົາພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວຫຼັງເກົ່າ, ໂຮງໝໍທະຫານແຂວງແລະໂຮງໝໍເມືອງຍົມມະລາດເປັນສູນແຍກປ່ຽວປິ່ນປົວສຳລັບຜູ້ທີ່ມີອາການສົງໃສແລະຕິດເຊື້ອ,ສະເພາະໃນຂັ້ນເມືອງແມ່ນຕ້ອງໄດ້ກຳນົດເອົາສູນກັກກັນ 1 ແຫ່ງ ແລະສູນແຍກປ່ຽວປິ່ນປົວເມືອງລະ 1 ແຫ່ງ.

______________

ໜັງສືພິມເສດຖະກິດ-ສັງຄົມ

แชร์