ກະຊວງສືກສາແຈ້ງການສືບຕໍ່ພັກການຮຽນ ແລະຈະເປີດສອນກາງເດືອນບາງຊັ້ນ

  ຈາກສະພາບການແຜ່ລະບາດຂອງເຊື້ຶອພະຍາດ COVID-19 ຍັງສືບຕໍ່ເພີ່ມຂຶ້ນຕໍ່ເນື່ອງກວມເອົາເກືອບທຸກປະເທດໃນໂລກ, ຈຳນວນຜູ້ຕິດເຊື້ອ ແລະເສຍຊີວິດຈາກພະຍາດຍັງສືບຕໍ່ເພີ່ມຂຶ້ນທຸກມື້, ຢູ່ ສປປ ລາວ ເຖິງວ່າບໍ່ມີກໍລະນີຜູ້ຕິດເຊື້ອໃໝ່ເປັນເວລາ 20 ກວ່າວັນ ແລ້ວແຕ່ຍັງເຫັນວ່າພວກເຮົາຍັງມີຄວາມສ່ຽງໂດຍສະເພາະຜູ້ຕິດເຊື້ອຈຳນວນໜຶ່ງຍັງບໍ່ທັນປິ່ວປົວຫາຍຂາດ, ມີຄວາມສ່ຽງຈາກການສືບຕໍ່ເຂົ້າມາຂອງແຮງງານລາວແຕ່ຕ່າງປະເທດຈຳນວນໜຶ່ງ ແລະສະພາບການຕິດເຊື້ອໃໝ່ຂອງປະເທດໃກ້ຄຽງແມ່ນຍັງມີຢູ່ສະນັ້ນເພື່ອເຝົ້າລະວັງການລະບາດ ແລະປະຕິບັດຕາມຄຳແນະນຳຂອງຄະນະສະເພາະກິດແຫ່ງຊາດ.

   ລັດຖະມົນຕີກະຊວງສຶກສາທິການ ແລະກີລາອອກແຈ້ງການ: ເລກທີ 443/ ສສກ ນະຄອນຫຼວງວຽງຈັນ ວັນທີ 4 ພຶດສະພາ 2020 ການຜັນຂະຫຍາຍແຈ້ງ ການຂອງສຳນັກງານນາຍົກລັດຖະມົນຕີໃຫ້ທຸກພາກສ່ວນໃນຂະແໜງການສຶກສາແລະກີລາສືບຕໍ່ຍົງສູງຄວາມຮັບຜິດຊອບໃນການຕິດຕາມ,ເຝົ້າລະວັງໃນການປ້ອງກັນ, ຄວບຄຸມ,ສະກັດກັ້ນ ແລະແກ້ໄຂການລະບາດຂອງພະຍາດ COVID-19 ດ້ວຍຄວາມເປັນເຈົ້າການໂດຍສືບຕໍ່ປະຕິບັດຄຳສັ່ງຂອງທ່ານນາຍົກລັດຖະມົນຕີເລກທີ 06/ນຍ, ແຈ້ງການຂອງຫ້ອງວ່າການສຳນັກງານນາຍົກ ລັດຖະມົນຕີ, ແຈ້ງການ ແລະລະບຽບຂອງຄະນະສະເພາະກິດ, ແຈ້ງການຂອງກະຊວງສຶກສາທິການ ແລະກີລາ, ແຈ້ງການຂອງອົງການປົກຄອງທ້ອງຖິ່ນ ແລະນິຕິກຳຂອງພາກສ່ວນທີ່ກ່ຽວຂ້ອງຢ່າງເຂັ້ມງວດດັ່ງລຸ່ມນີ້.

  ຊຶ່ງໃຫ້ພະນັກງານ, ຄູ-ອາຈານ ແລະລັດຖະກອນຂະແໜງການສຶກສາ ແລະກີລາຈັດການໝູນວຽນມາເຮັດວຽກເປັນປົກກະຕິແຕ່ຕ້ອງໃຫ້ຮັບປະກັນມາດຕະການປ້ອງກັນການຕິດເຊື້ອຖ້າຫາກສຳນັກງານ ແລະສະຖານການສຶກສາ ແລະກີລາໃດມີເງື່ອນໄຂເຮັດວຽກຜ່ານລະບົບສື່ສານແບບເອເລັກໂຕຣນິກ ແລະເຄືອຂ່າຍອິນເຕີເນັດແມ່ນໃຫ້ປະຕິບັດຕາມຄວາມເໝາະສົມ.

 ໃຫ້ກະກຽມເປີດການຮຽນ-ການສອນໃນໂຮງຮຽນຄືນສຳລັບຊັ້ນປະຖົມສຶກສາປີທີ 5, ຊັ້ນມັດທະຍົມສຶກສາປີທີ 4 ແລະຊັ້ນມັດທະຍົມສຶກສາປີທີ 7 ໃນ ວັນທີ 18 ພຶດ ສະພາ 2020, ສຳລັບຂັ້ນຮຽນອື່ນ ແລະການສຶກສາອື່ນນອກຈາກນີ້ແມ່ນໃຫ້ໂຈະການຮຽນໄປກ່ອນຈົນກວ່າຈະມີແຈ້ງການຂອງລັດຖະບານ ແລະຄະນະສະເພາະກິດໃໝ່ຕື່ມ.

  ສະຖານການສຶກສາໃດທີ່ໄດ້ຈັດການຮຽນ-ການສອນຜ່ານຮູບແບບການສຶກສາທາງໄກໃນໄລຍະຜ່ານມາແມ່ນໃຫ້ສືບຕໍ່ຈັດການຮຽນ-ການສອນຈົນຈົບຫຼັກສູດ ແລະໃຫ້ຕີລາຄາຜົນການຈັດຕັ້ງຂອງຕົນ.

 ລາຍລະອຽດໃນການກະກຽມເປີດການຮຽນ-ການສອນໃນໂຮງຮຽນ ແລະການສອບເສັງຕ່າງໆຂອງຊັ້ນ ປ.5, ມ.4 ແລະມ.7 ແມ່ນມອບໃຫ້ກົມວິຊາການທີ່ກ່ຽວຂ້ອງອອກຄຳແນະນຳເປັນອັນສະເພາະ.

  ສຳລັບນັກສຶກສາລາວທີ່ຕ້ອງການກັບໄປຮຽນຄືນຢູ່ຕ່າງປະເທດແມ່ນສາມາດເດີນທາງໄປໄດ້ແຕ່ຕ້ອງປະຕິບັດຕາມລະບຽບການຂອງ ສປປ ລາວ ແລະຂອງປະເທດທີ່ໄປຮຽນຢ່າງເຂັ້ມງວດ, ອະນຸຍາດໃຫ້ສາມາດຈັດປະຊຸມທາງການ ແລະຈັດການຝຶກອົບຮົມຂອງຂະແໜງການສຶກສາ ແລະກີລາພາຍໃນນະຄອນຫຼວງ ແລະພາຍໃນແຂວງແຕ່ໃຫ້ຈຳກັດຜູ້ເຂົ້າຮ່ວມໂດຍຮັກສາໄລຍະຫ່າງ 1 ແມັດຂຶ້ນໄປ, ມີບ່ອນລ້າງມືດ້ວຍນໍ້າສະອາດໃສ່ສະບູ ແລະເຈວລ້າງມື, ໃສ່ຜ້າອັດປາກ-ດັງ, ວັດແທກອຸນຫະພູມແລະອະນາໄມສະຖານທີ່ຕາມຕຳແນະນຳຂອງຄະນະສະເພາະກິດວາງອອກ, ການຈັດກິດຈະກຳກີລາກາງແຈ້ງໃຫ້ປະຕິບັດຕາມຄຳແນະນຳຂອງຄະນະສະເພາະກິດ.

vvໃນກໍລະນີພໍ່ແມ່ຜູ້້ປົກຄອງນັກຮຽນພົບຄວາມຫຍຸ້ງຍາກໃນການຊຳລະຄ່າຮຽນບໍ່ທ່ວງທັນມອບໃຫ້ພະແນກສຶກສາທິການ ແລະກີລາແຂວງນະຄອນຫຼວງ, ຫ້ອງການສຶກສາທິການ ແລະກີລາເມືອງ, ສະມາຄົມການສຶກສາພາກເອກະຊົນ, ສະມາຄົມພໍ່ແມ່ນັກຮຽນ ແລະ ພໍ່ແມ່ຜູ້້ປົກຄອງປຶກສາຫາລືກັນເພື່ອຊອກຫາວິທີທາງອອກທີ່ເໝາະສົມເພື່ອໃຫ້ທຸກພາກສ່ວນຜ່ານພົ້ນວິກິດການຄັ້ງນີ້ໄປພ້ອມກັນ.

  ກົມວິຊາການພະແນກສຶກສາທິການ ແລະກີລາແຂວງນະຄອນຫຼວງ ແລະ ພາກສ່ວນທີ່ກ່ຽວຂ້ອງຜັນຂະຫຍາຍ ແລະ ປະຕິບັດແຈ້ງການນີ້ໃຫ້ໄດ້ຮັບຜົນດີພ້ອມໃຫ້ລາຍງານຜົນຕໍ່ກະຊວງສຶກສາທິການ ແລະກີລາທຸກອາທິດສຳລັບມັກຕິກອງປະຊຸມເປັນການຄົ້ນຄວ້າພາຍໃນຖ້າວ່າແຈ້ງການອອກທາງການຖືວ່າບໍ່ໃຫ້ຈັດຕັ້ງປະຕິບັດເທື່ອ.

    ແຈ້ງການນີ້ມີຜົນສັກສິດແຕ່ງລົງລາຍເຊັ່ນຕົ້ນໄປໃນພາກປະຕິບັດຕົວຈິງຖ້າພາກສ່ວນໃດຕ້ອງການຄວາມກະຈ່າງແຈ້ງເພີ່ມເຕີມແມ່ນໃຫ້ປະສານໄປທາງຄະນະສະ ເພາະກິດຂອງກະຊວງສຶກສາທິການ ແລະກີລາຜ່່ານສາຍດ່ວນ 1520 ຫຼື ຄະນະສະເພາະກິດ 165 ຫຼື 166.

____________

ຂຽນໂດຍ: ບຸນນິກ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์