ໂຄງການກໍ່ສ້າງຕ້ານເຈື່ອນແຄມແມ່ນໍ້າຂອງມີຄວາມຄືບໜ້າກວ່າ 60%

  ປະຈຸບັນໂຄງການກໍ່ສ້າງຕ້ານເຈື່ອນແຄມແມ່ນໍ້າຂອງທີ່ຂຶ້ນກັບນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ມີຄວາມຄືບໜ້າຫຼາຍພໍສົມຄວນຊຶ່ງປະຕິບັດໄດ້ແລ້ວ 64,5% ຂອງແຜນການ ແລະຄາດວ່າຈະໃຫ້ສຳເລັດ 100% ໃນປີ 2021.
ມາໃນວັນທີ 28 ເມສາຜ່ານມານີ້, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງທັງເປັນປະທານຊີ້ນຳໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງ (ໂຄງການ GMS) ພ້ອມຄະນະນຳໂຄງການ ແລະທີ່ປຶກສາໂຄງການ GMS ພ້ອມດ້ວຍພາກສ່ວນກ່ຽວຂ້ອງໄດ້ລົງຢ້ຽມ ຢາມ ແລະຕິດຕາມເບິ່ງຄວາມຄືບໜ້າການຈັດຕັ້ງປະຕິບັດໂຄງການກໍ່ສ້າງຕ້ານເຈື່ອນແຄມແມ່ນໍ້າຂອງ.


  ທ່ານ ຄຳຟອງ ວໍລະບຸດ ຮອງຜູ້ອຳນວຍການບໍລິສັດລາວມີໄຊກໍ່ສ້າງໄດ້ໃຫ້ສຳພາດວ່າ: ໂຄງການຕ້ານເຈື່ອນແຄມແມ່ນໍ້າຂອງແມ່ນ 1 ໃນ 7 ກິດຈະກຳຂອງໂຄງການ GMS ທີ່ໄດ້ເລີ່ມລົງມືກໍ່ ສ້າງມາແຕ່ເດືອນກໍລະກົດ 2019 ເປັນ ຕົ້ນມາ, ມີມູນຄ່າການກກໍ່ສ້າງທັງໝົດ 4,5 ລ້ານກວ່າໂດລາສະຫະລັດ ໂດຍ ແມ່ນບໍລິສັດລາວມີໄຊກໍ່ສ້າງຈຳກັດເປັນ ຜູ້ຮັບເໝົາການກໍ່ສ້າງ, ປະກອບມີ 2 ວຽກໃຫຍ່ຄື: ວຽກກໍ່ສ້າງກັນເຈື່ອນແຄມ ຂອງໃນລວງຍາວທັງໝົດ 980 ແມັດ ເລີ່ມຈາກທ່າບັກເກົ່າລຽບລົງໄປຕາມລຳແມ່ນໍ້າຂອງໂດຍຈະໄດ້ມີການຖົມດິນຊາຍອອກຈາກຂອບທາງອອກໄປ 50 ແມັດ ແລະລຽງຫີນລຽບຕາມແມ່ນໍ້າຂອງຊຶ່ງມີບໍລິມາດຊາຍຖົມທັງໝົດ 246.7 17 ແມັດກ້ອນ ພ້ອມວຽກຕົບແຕ່ງຄວາມງາມໜ້າເດີ່ນດ້ວຍເບຕົງ ລວດລາຍ ແລະສວນດອກໄມ້ຈຳນວນໜຶ່ງຈາກນີ້ກໍ່ມີບ່ອນຫັດກາຍ, ມີຈຸດນັ່ງຊົມວິວ-ນັ່ງເບິ່ງເຮືອຊ່ວງ ແລະຮ້ານຄ້າຊຶ່ງໜ້າວຽກນີ້ແມ່ນໄດ້ສຳເລັດໄປແລ້ວ 64,55%; ສ່ວນໜ້າວຽກທີ 2 ແມ່ນການກໍ່ສ້າງເສັ້ນທາງເບຕົງເສີມເຫຼັກຄວາມຍາວ 980 ແມັດ ຕາມຄວາມ ຍາວຂອງກັນເຈື່ອນ, ມີໜ້າທາງກວ້າງ 7 ແມັດ, ມີທາງຍ່າງສອງຂ້າງທາງ ແລະ ມີບ່ອນຈອດລົດສະເພາະປະຈຸບັນໄດ້ສຳເລັດການກໍ່ສ້າງແລ້ວ 92,49% ສຳລັບວຽກທີ່ຍັງຄ້າງຄາແມ່ນການຕົບແຕ່ງປະດັບປະດາ, ປູກຫຍ້າ ແລະ ລະບົບໄຟຟ້າຕ່າງໆຄາດວ່າຈະສຳເລັດຕາມແຜນທີ່ວາງໄວ້ກໍ່ຄືຮອດປີ 2021 ໃຫ້ສຳເລັດ 100%.


 ໂອກາດນີ້,ທ່ານຮອງເຈົ້າແຂວງກໍ່ໄດ້ລົງສຳຫຼວດເບິ່ງຄວາມຄືບໜ້າຕົວຈິງຂອງການກໍ່ສ້າງໃນແຕ່ລະໜ້າວຽກຫຼັກຊຶ່ງເຫັນວ່າທາງໂຄງການໄດ້ມີຄວາມເອົາໃຈໃສ່ໃນການຈັດຕັ້ງປະຕິບັດການກໍ່ສ້າງຕາມແຜນການຊຶ່ງມີພຽງຂໍ້ຫຍຸ້ງຍາກບາງດ້ານເທົ່ານັ້ນທີ່ກຳລັງແກ້ໄຂແນໃສ່ເພື່ອເຮັດໃຫ້ການຈັດຕັ້ງປະຕິບັດໂຄງການກໍ່ສ້າງຕ້ານເຈື່ອນແຄມແມ່ນ້ຳຂອງສຳເລັດຕາມແຜນການທີ່ວາງໄວ້ ທັງນີ້ກໍ່ເພື່ອເຮັດໃຫ້ສະຖານທີ່ແຫ່ງນີ້ເປັນບ່ອນພັກຜ່ອນຢ່ອນອາລົມ, ເປັນບ່ອນອອກກຳລັງກາຍຂອງປະຊາຊົນ ແລະກາຍເປັນແຫຼ່ງທ່ອງທ່ຽວອີກຈຸດໜຶ່ງຂອງນະຄອນ ໄກສອນ ພົມວິຫານ ກໍຄືແຂວງສະຫວັນນະເຂດພວກເຮົາ. ຈາກນັ້ນ, ທ່ານຮອງເຈົ້າແຂວງພ້ອມຄະນະກໍໄດ້ລົງຕິດຕາມເບິ່ງການກໍ່ສ້າງໂຄງການບຳບັດນ້ຳເປື້ອນຫ້ວຍລົງກົງ ແລະໂຄງການກໍ່ສ້າງສະໜາມຂີ້ເຫຍື້ອຕື່ມອີກ.

------------------

ໜັງສືພິມເສດຖະກິດ-ສັງຄົມ

แชร์