ສູນເລືອດຮຽກຮ້ອງສັງຄົມຊ່ວຍບໍລິຈາກເລືອດຮອງຮັບຄົນເຈັບ

 ເນື່ອງຈາກສູນເລືອດແຂວງຫຼວງພະບາງຍັງເຫຼືອເລືອດໜ້ອຍເຕັມທີແລ້ວຍ້ອນໜ່ວຍງານກາແດງທີ່ລົງເຄື່ອນໄຫວຮັບບໍລິຈາກເລືອກຢູ່ຕາມສະຖາບັນການສຶກສາໂຮງ ຮຽນແຫ່ງຕ່າງໆອ້ອມຂ້າງແຂວງໄດ້ຢຸດເນື່ອງຈາກຊ່ວງວິກິດການລະບາດຂອງເຊື້ອພະຍາດໂຄວິດ-19 ນີ້ຈຶ່ງຮຽກຮ້ອງຮ້ອງໃຫ້ສັງຄົມຜູ້ທີ່ມີສຸຂະພາບແຂງແຮງຊ່ວຍໄປບໍລິຈາກເລືອດເພື່ອຊ່ວຍເຫຼືອເພື່ອນມະນຸດດ້ວຍກັນທີ່ສູນເລືອດແຂວງຫຼວງພະບາງໄດ້ທຸກວັນ.
 ທ່ານ ດຣ ໄຊສະໝອນ ພະນາວັນ ຫົວໜ້າສູນເລືອດແຂວງຫຼວງພະບາງ ໃຫ້ສໍາພາດຕໍ່ທີມຂ່າວພວກເຮົາໃນວັນທີ 29 ເມສາ 2020 ນີ້ວ່າ: ເລືອດທີ່ສະສົມໄວ້ຄອຍບໍລິການຄົນເຈັບທີ່ມາປິ່ນປົວຢູ່ໂຮງໝໍແຂວງຫຼວງພະບາງປະຈຸບັນແມ່ນຍັງເຫຼືອໜ້ອຍເຕັມທີ ແລະຖ້າມີຄົນເຈັບເພີ່ມຂຶ້ນຫຼາຍແມ່ນເລືອດຕ້ອງຕອບສະໜອງບໍ່ທັນແນ່ ນອນ ແລະສໍາລັບມື້ນີ້ມີຄົນມາບໍລິຈາກເລືອດໄດ້ທັງໝົດ 9 ຖົງ, ແຕ່ໄດ້ຈ່າຍເລືອດໃຫ້ຄົນເຈັບໄປແລ້ວ 10 ຖົງ ແລະໃນຊ່ວງວິກິດຂອງໂຄວິດນີ້ແມ່ນເລືອດໝວດ 0, B ແລະ AB ເພາະໝວດເລືອດນີ້ມີຄວາມຈໍາເປັນຍິ່ງຫາກຄົນເຈັບເກີດມີອາການເລືອດໄຫຼບໍ່ຢຸດຕ້ອງໄດ້ໃຊ້ໝວດນີ້.
ສະນັ້ນຫາກຜູ້ໃດທີ່ມີຈິດໃຈຢາກບໍລິຈາກເລືອດແມ່ນໃຫ້ໄປບໍລິຈາກເລືອດຢູ່ທີ່ສູນເລືອດໂຮງໝໍແຂວງຫຼວງພະບາງພ້ອມນີ້ທາງສູນບໍລິຈາກເລືອດຍັງຮັບປະກັນຄວາມປອດໄພໃຫ້ກັບທຸກໆຄົນທີ່ເຂົ້າມາບໍລິຈາກເລືອດໂດຍທາງສູນເລືອດຈະມີເຄື່ອງຮອງຮັບສີດພົ່ນຂ້າເຊື້ອໃຫ້ທຸກຄົນກ່ອນເຂົ້າຫ້ອງບໍລິຈາກເລືອດ.


  ສໍາລັບຜູ້ໃດທີ່ຢາກບໍລິຈາກເລືອດແຕ່ຍ້ອນຕວາມບໍ່ສະດວກໃນການເດີນທາງໄປໃຫ້ບໍລິຈາກໄດ້ແມ່ນໃຫ້ຕິດຕໍ່ຫາທາງສູນເລືອດຂອງໜ່ວຍກາແດງແຂວງຫຼວງພະບາງ ພຽງທ່ານບອກສໍານັກງານ, ອົງການບ່ອນຢູ່ຂອງບ້ານ, ເມືອງໃດເທົ່ານັ້ນທາງທີມງານຮັບບໍລິຈາກເລືອດກາແດງຈະໄປຫາເຖິງທີ່ເລີຍ.

_____________

ຂຽນໂດຍ: ສີສຸວັນ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์