ກອງບັນຊາການທະຫານແຂວງລາວກາຍ ມອບເຄື່ອງຊ່ວຍແຂວງບໍ່ແກ້ວ

  ວັນທີ 01 ພຶດສະພາ 2020 ທີ່ບໍລິສັດ 705 ຂອງກອງບັນຊາການທະຫານເຂດ II ກອງທັບແຫ່ງ ສສ ຫວຽດນາມ ໄດ້ມີພິທີມອບ-ຮັບເຄື່ອງຊ່ວຍເຫຼືອຈາກກອງບັນຊາການທະຫານແຂວງລາວກາຍມອບໃຫ້ແກ່ກອງບັນຊາການທະຫານແຂວງບໍ່ແກ້ວເພື່ອປ້ອງກັນ ແລະຕ້ານພະຍາດໂຄວິດ-19 ຢູ່ພາຍກອງບັນຊາການ.
  ເຄື່ອງຊ່ວຍເຫຼື່ອດັ່ງກ່າວລວມມີ 31 ແກັດລາຍລະອຽດມີ 3 ລາຍການດັ່ງນີ້ຜ້າປິດປາກກັນຈຸລິນຊີຈຳນວນ 10.000 ອັນ, ໂມງວັດແທກຄວາມຮ້ອນ 100 ເຄື່ອງ ແລະນໍ້າຢາຂ້າເຊື້ອແບກທີເຮຍຈຳນວນ 500 ຂວດ ລວມມູນຄ່າ 250.000.000 ດົງ ຊຶ່ງໃຫ້ກຽດຕາງໜ້າມອບໂດຍ ສະຫາຍ ພັນເອກ ເກືອງ ຮອງອໍານວຍການບໍລິສັດ 705 ຂອງກອງບັນຊາການທະຫານເຂດ II ກອງທັບແຫ່ງ ສສ ຫວຽດນາມ ແລະຕາງໜ້າຮັບໂດຍສະຫາຍ ພັນໂທ ທອງໄຂ ສີຍາລາດ ຄະນະພັກກອງບັນຊາ ການຫົວໜ້າຫ້ອງການເມືອງກອງບັນຊາການທະຫານແຂວງບໍ່ແກ້ວ.
  ໂອກາດນີ້ສະຫາຍ ພັນໂທ ທອງໄຂ ສີຍາລາດ ໄດ້ຕາງໜ້າໃຫ້ແກ່ຄະນະພັກ-ຄະນະບັນຊາສະແດງຄວາມຂອບໃຈ ແລະຮູ້ບຸນຄຸນມາຍັງກອງບັນຊາການທະຫານແຂວງລາວກາຍທີ່ໄດ້ມອບເຄື່ອງຊ່ວຍເຫຼືອທີ່ຈຳເປັນໃນຄັ້ງນີ້ເພື່ອມາຊ່ວຍເຫຼືອກອງທັບເວົ້າລວມ ເວົ້າສະເພາະກໍ່ຄືກອງບັນຊາການຂອງພວກເຮົາໃນການປ້ອງກັນ ແລະຕ້ານພະຍາດໂຄວິດ-19. ພ້ອມໃຫ້ຄໍາໝັ້ນສັນຍາວ່າຈະນໍາເອົາເຄື່ອງຊ່ວຍເຫຼືອດັ່ງກ່າວນໍາໃຊ້ໃຫ້ຖືກເປົ້າໝາຍ, ມີປະສິດທິຜົນສູງສຸດ ແລະທົ່ວເຖິງ.


ຈາກນັ້ນທາງກອງບັນຊາການທະຫານແຂວງບໍ່ແກ້ວກໍ່ໄດ້ມອບໜັງສືຂອບໃຈໃຫ້ແກ່ກອງບັນຊາການທະຫານ ແຂວງລາວກາຍ ແລະບໍລິສັດ 705 ຂອງກອງບັນຊາການທະຫານເຂດ II ກອງທັບແຫ່ງ ສສ ຫວຽດນາມ.

----------------

ຂຽນໂດຍ: ສົມໄຊ ສີລາຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์