ຍທຂ ອອກຄຳແນະນຳກ່ຽວກັບການບໍລິການຂົນສົ່ງໂດຍສານ ຊ້ວງໂຄວິດ-19

   ເພື່ອຜ່ອນຜັນຄໍາສັ່ງຂອງທ່ານນາຍົກລັດຖະມົນຕີສະບັບເລກທີ 06/ ນຍ, ລົງວັນທີ 29 ມີນາ 2020 ໃຫ້ມີປະສິດທິຜົນ ແລະປ້ອງກັນການແຜ່ລະບາດຂອງພະຍາດໂຄວິດ-19, ກະຊວງໂຍທາທິການ ແລະຂົນສົ່ງ, ຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ- 19 ອອກຄໍາແນະນໍາເລກ ທີ 292/ຍທຂ ລົງວັນທີ 3 ພຶດສະພາ 2020 ເພື່ອອະນຸຍາດໃຫ້ດໍາເນີນການບໍລິການຂົນສົ່ງໂດຍສານຢູ່ພາຍໃນນະຄອນຫຼວງວຽງຈັນ ແລະຢູ່ພາຍໃນບັນດາແຂວງ, ຊຶ່ງລວມມີລົດເມ, ລົດຕູ້, ລົດຮັບສົ່ງພະນັກງານ, ລົດຮັບສົ່ງກໍາມະກອນ, ລົດຕັກຊີ, ລົດສອງແຖວ, ລົດຕຸກໆ ແລະລົດຈໍາໂບ້ໃຫ້ຈັດຕັ້ງປະຕິບັດມາດຕະການລຸ່ມນີ້.


ສຳລັບຢູ່ສະຖານີລົດຂົນສົ່ງຜູ້ໂດຍສານ ແລະບ່ອນລໍຖ້າລົດເມຕ້ອງຈັດສັນບ່ອນນັ່ງ ຫຼືຢືນລໍຖ້າໂດຍໃຫ້ຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ, ຕ້ອງມີການວັດແທກອຸນຫະພູມ, ເຈວລ້າງມື ຫຼືເຫຼົ້າສໍາລັບຂ້າເຊື້ອຢູ່ໃນສະຖານີ, ຕ້ອງມີສະບູລ້າງມື ແລະເຈ້ຍເຊັດມືຢູ່ໃນຫ້ອງນໍ້າຂອງສະຖານີ; ຕ້ອງໃຫ້ມີຖັງໃສ່ຂີ້ເຫຍື້ອທີ່ມີຝາປິດ ແລະເໝາະສົມກັບປະລິມານຂອງຂີ້ເຫຍື້ອ, ຕ້ອງມີການອະນາໄມຂ້າເຊື້ອກ່ອນໃຫ້ການບໍລິການປະຈໍາວັນໃນສະຖານີໂດຍການສີດຢາຂ້າເຊື້ອ ຫຼືເຊັດຖູດ້ວຍນໍ້າແຟັບ ຫຼືໄຮເຕີຕາມຕັ່ງນັ່ງ, ຮາວຈັບ ແລະບ່ອນອື່ນໆທີ່ມີຄົນສໍາຜັດເລື້ອຍໆ.
   ຊຶ່ງຜູ້ຂັບລົດ ແລະຜູ້ຊ່ວຍຕ້ອງໄດ້ວັດແທກອຸນຫະພູມກ່ອນຂຶ້ນລົດຖ້າພົບວ່າມີອຸນຫະພູມສູງກວ່າ 37,5 ອົງສາແມ່ນເດັດຂາດບໍ່ໃຫ້ຂຶ້ນລົດ ແລະ ໃຫ້ໂທປຶກສາດ່ວນ 165 ຫຼື 166, ຕ້ອງໃສ່ຜ້າອັດປາກ-ດັງ ຕະຫຼອດເວລາຖ້າບໍ່ປະຕິບັດແມ່ນບໍ່ອະນຸຍາດໃຫ້ບໍລິການຂົນສົ່ງເດັດຂາດ, ຕ້ອງໝັ່ນລ້າງມືດ້ວຍເຈວລ້າງມື ຫຼືສະບູ ແລະນໍ້າສະອາດທຸກຄັ້ງທີ່ໄດ້ສໍາຜັດບ່ອນຕ່າງໆ; ແລະຜູ້ໂດຍສານຕ້ອງນັ່ງຕາມບ່ອນທີ່ໄດ້ກໍານົດໄວ້ຢູ່ໃນລົດໂດຍຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ; ຕ້ອງຮັກສາມາລະ ຍາດໃນການໄອ-ຈາມ ຕ້ອງອັດປາກ ແລະຖິ້ມຂີ້ເຫຍື້ອຕ້ອງຮັບປະກັນ (ບໍ່ໃຫ້ຖິ້ມຊະຊາຍ); ຕ້ອງຮັກສາໄລຍະຫ່າງ 1 ແມັດ ຂຶ້ນໄປໃນເວລາຢືນ ຫຼືນັ່ງລໍຖ້າຢູ່ສະຖານີ ແລະບ່ອນລໍຖ້າຂຶ້ນລົດ.


  ສຳລັບຍານພາຫະນະຂົນສົ່ງຕ້ອງມີການອະນາໄມຂ້າເຊື້ອກ່ອນໃຫ້ການບໍລິການປະຈໍາວັນໂດຍການຂ້າເຊື້ອ ຫຼືເຊັດຖູດ້ວຍນໍ້າແຟັບ, ໄຮເຕີຕາມຕັ່ງນັ່ງ, ຮາວຈັບ, ບ່ອນໄຂປະຕູລົດ, ພວງມະໄລ ແລະບ່ອນອື່ນໆທີ່ມີການສໍາຜັດເລື້ອຍໆ ຕ້ອງມີເຈວລ້າງມື ຫຼື ເຫຼົ້າຂ້າເຊື້ອປະຈໍາລົດ; ຕ້ອງກໍານົດ ແລະໝາຍບ່ອນນັ່ງຜູ້ໂດຍສານໂດຍຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ; ຕ້ອງເປີດປະຕູ ຫຼືແວ່ນຂ້າງເພື່ອລະບາຍອາກາດເວລາຈອດລົດຖ້າບໍ່ປະຕິບັດຕາມຄໍາແນະນໍາທີ່ຄະນະສະເພາະກິດວ່າງອອກຈະບໍ່ອະນຸຍາດໃຫ້ດໍາເນີນການຂົນສົ່ງໂດຍສານ ແລະໃສ່ວິໄນຕາມລະບຽບກົດໝາຍຂອງ ສປປ ລາວ.

-------------

ຂຽນໂດຍ: ບຸນນິກ   

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์