ອຸດົມໄຊໄດ້ຮັບເຄື່ອງຊ່ວຍເຫຼືອຈາກ 2 ພາກສ່ວນ

  ນັບຕັ້ງແຕ່ຄະນະສະເພາະກິດປ້ອງກັນສະກັດກັ້ນ ແລະຄວບຄຸມເຊື້ອພະຍາດໂຄວິດ-19 ຂອງ ແຂວງອຸດົມໄຊ ໄດ້ຮັບການແຕ່ງຕັ້ງຂຶ້ນແລະເຄື່ອນໄຫວວຽກງານຕາມພາລະບົດບາດຂອງຕົນເອງຢ່າງເປັນປົກກະຕິ ແລະຕໍ່ເນື່ອງຈົນຮອດປະຈຸບັນນີ້ເຫັນວ່າມີຫຼາຍພາກສ່ວນໄດ້ນຳເອົາເຄື່ອງອຸປະໂພກ-ບໍລິໂພກ ລວມທັງເຄື່ອງມື ແລະອຸປະ ກອນທາງການແພດຕ່າງໆມາມອບໃຫ້ກັບຄະນະສະເພາະກິດຂັ້ນແຂວງຢ່າງຕໍ່ເນື່ອງເພື່ອນຳໃຊ້ເຂົ້າໃນການເຄື່ອນໄຫວວຽກງານປ້ອງກັນສະກັດກັ້ນ ແລະ ຄວບຄຸມເຊື້ອພະຍາດໂຄວິດ-19.

ທ້າຍອາທິດຜ່ານມາກໍໄດ້ມີທະນາຄານຮ່ວມທຸລະກິດລາວຫວຽດນາມສາຂາອຸດົມໄຊໄດ້ນຳເອົານໍ້າດື່ມ, ເຈວລ້າງມື ແລະຜ້າອັດປາກຈຳນວນໜຶ່ງລວມເປັນມູນຄ່າທັງໝົດ 10 ລ້ານກີບ ພ້ອມ ທັງບໍລິສັດ ພອນມະລິ ກໍ່ສ້າງຄົບ ວົງຈອນ ນຳເອົານ້ຳດື່ມຈຳນວນ 40 ແກັດ ເຂົ້າມອບໃຫ້ກັບຄະນະສະເພາະກິດຂັ້ນແຂວງ ແລະ ຮັບໂດຍທ່ານ ດຣ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກແຂວງລວມທັງຄະນະສະເພາະກິດຈຳນວນໜຶ່ງ.

  ໂອກາດດັ່ງກ່າວທາງຄະນະສະເພາະກິດຂັ້ນແຂວງໄດ້ກ່າວຂອບໃຈຕໍ່ກັບທຸກພາກສ່ວນໂດຍສະເພາະກໍຄືທະນາຄານຮ່ວມທຸລະກິດລາວຫວຽດສາຂາອຸດົມໄຊ ແລະບໍລິສັດພອນມະລິກໍ່ສ້າງຄົບວົງຈອນທີ່ໄດ້ໃຫ້ການອຸປະຖຳ ແລະຊ່ວຍເຫຼືອໃນຄັ້ງນີ້ ແລະຫວັງວ່າຈະໄດ້ຮັບການຊ່ວຍເຫຼືອແບບນີ້ອີກໃນຕໍ່ໜ້າ.

ສ່ວນເຄື່ອງຈໍານວນດັ່ງກ່າວແມ່ນຈະໄດ້ນໍາໄປແຈກຢາຍໃຫ້ກັບພະນັກງານ, ບຸກຄະລາກອນທຸກພາກສ່ວນທີ່ເຄື່ອນໄຫວຮັບຜິດຊອບວຽກງານປ້ອງກັນ, ຄວບຄຸມເຊື້ອພະຍາດໂຄວິດ-19 ຢູ່ແຕ່ລະຈຸດໂດຍສະເພາະແມ່ນໂຮງໝໍ, ຈຸດກວດກາຕ່າງໆໄດ້ນຳໃຊ້ຢ່າງທົ່ວເຖິງ.

____________

ຂຽນໂດຍ: ຄານມະນີ ຮຽນດໍຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์