ໂຄງການກໍ່ສ້າງ ແລະສ້ອມແປງຊົນລະປະທານ ດົງສະຫວ່າງທົ່ງ ເມືອງສອງຄອນ ຄືບໜ້າ 95%

  ໃນວັນທີ 24 ເມສາ 2020 ຜ່ານມາ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ບຸນເລດ ຈັນທອງທິບ ຮັກສາການຫົວໜ້າພະແນກກະສິກຳ ແລະປ່າໄມ້ແຂວງ, ທ່ານ ພັທ ລຳຄູນ ວໍລະວົງ ເຈົ້າເມືອງສອງຄອນພ້ອມດ້ວຍບັນດາທ່ານຫົວໜ້າພະແນກການຕ່າງໆຂອງແຂວງໄດ້ລົງຕິດຕາມຄວາມຄືບໜ້າໂຄງ ການກໍ່ສ້າງ ແລະສ້ອມແປງຊົນລະປະທານດົງສະຫວ່າງທົ່ງເມືອງສອງຄອນ ແຂວງສະຫວັນນະເຂດ ຊຶ່ງເປັນໜຶ່ງໃນໂຄງການຍ່ອຍຂອງການພັດທະນາພື້ນຖານໂຄງລ່າງກະສິກຳຕາມແລວເສດຖະກິດຕາເວັນອອກ-ຕາເວັນຕົກ.

  ໂຄງການດັ່ງກ່າວແມ່ນໄດ້ລົງມືຈັດຕັ້ງປະຕິບັດມາແຕ່ວັນທີ 23 ພະຈິກ 2018, ຕາມສັນຍາແມ່ນຈະໃຫ້ສຳເລັດໂຄງການໃນເດືອນກໍລະກົດ 2020 ໃນກຳນົດເວລາ 18 ເດືອນ, ແຕ່ຜ່ານການຈັດຕັ້ງປະຕິບັດຕົວຈິງມາຮອດປະຈຸບັນເຫັນວ່າໂຄງການດັ່ງກ່າວສາມາດກໍ່ສ້າງສຳເລັດໄປແລ້ວ 95% ຄາດວ່າຈະໃຫ້ສຳເລັດກ່ອນກຳນົດເວ ລາໃນທ້າຍເດືອນພຶດສະພາ 2020 ນີ້,ໂດຍແມ່ນບໍລິສັດລາວມີໄຊ ເປັນຜູ້ຮັບເໝົາກໍ່ສ້າງໃນມູນຄ່າ 2,38 ລ້ານໂດລາ, ໜ້າວຽກທີ່ເຮັດແມ່ນໄດ້ກໍ່ສ້າງຄອງຊອຍເບຕົງຈຳນວນ 24 ຄອງ, ມີຄວາມຍາວເກືອບ 20 ກິໂລແມັດ, ກໍ່ສ້າງເຮືອນປ້ຳ ຫຼືຈັກສູບນ້ຳທີ່ມີຂະໜາດໃຫຍ່ທີ່ສຸດຂອງແຂວງຈຳນວນ 3 ເຄື່ອງ, ຊຶ່ງສາມາດສູບນໍ້າໄດ້ສູງເຖິງ 1.300 ລິດຕໍ່ວິນາທີໂດຍການນຳໃຊ້ນ້ຳຈາກອ່າງເກັບນ້ຳໜອງຫຼວງ.

  ພາຍຫຼັງທີ່ສຳເລັດການກໍ່ສ້າງຊົນລະປະທານດົງສະຫວ່າງທົ່ງ ເມືອງສອງຄອນ ແຫ່ງນີ້ຈະມີປະຊາຊົນຈຳນວນ 4 ບ້ານທີ່ຈະໄດ້ນຳໃຊ້ນ້ຳດັ່ງກ່າວເຂົ້າໃນການຜະລິດກະສິກຳຄື: ບ້ານສອງຄອນ, ວິໄຊສົງ, ດົງສະຫວ່າງ ແລະບ້ານດອນຍາໂນງ ທີ່ສາມາດນຳໃຊ້ເຂົ້າໃນການຜະລິດເຂົ້ານາປີໃນເນື້ອທີ່ 800 ເຮັກຕາ ແລະຜະລິດເຂົ້ານາ ແຊງໃນເນື້ອທີ່ 550 ເຮັກຕາ.

_____________

ໜັງສືພິມເສດຖະກິດ-ສັງຄົມ

แชร์