ລະດູແລ້ງແຂວງຜົ້ງສາລີ ຖືກໄຟໄໝ້ປ່າເສຍຫາຍ 16 ພັນກວ່າເຮັກຕາ

  ຕາມການລາຍງານຂອງຂະແໜງປ່າໄມ້, ກອງຄຸ້ມຄອງປ່າສະຫງວນຂອງພະແນກກະສິກຳ-ປ່າໄມ້ແຂວງຜົ້ງສາລີໃນວັນທີ 27 ເມສາ 2020 ນີ້ໃຫ້ຮູ້ວ່າ: ໃນລະວ່າງຕົ້ນເດືອນມິຖຸນາ-ເດືອນເມສາ ປີ 2020 ນີ້ ໄດ້ເກີດມີໄຟໄໝ້ລາມປ່າຢູ່ຕາມຈຸດຕ່າງໆ ແຜ່ລາມອອກເປັນວົງກວ້າງຢູ່ເຂດ 3 ປະເພດປ່າ, ສວນຂອງປະຊາຊົນ ແລະ ທົ່ງຫຍ້າໃນ 7 ເມືອງທົ່ວແຂວງ ເສຍຫາຍ 16.621 ເຮັກຕາ.

  ເຊີງທາງອົງການປົກຄອງທຸກຂັ້ນກໍ່ໄດ້ເປັນເຈົ້າການລະດົມກຳລັງປະຊາຊົນ, ກຳລັງ ປກສ, ປກຊ ແລະພະນັກງານອ້ອມຂ້າງເຂົ້້າດັບມອດໄຟດ້ວຍທຸກວິທີທາງແຕ່ກໍ່ບໍ່ ສາມາດດັບມອດໄດ້ໝົດຍ້ອນສະພາບດີນຟ້າອາກາດທີ່ແຫ້ງແລ້ງແກ່ຍາວ, ເຮັດໃຫ້ຮ້ອນອົບເອົ້າ, ໃບໄມ້ແຫ້ງຫຼົ່ນດົກໜາທີ່ໃຫ້ເກີດ ການຕິດໄຟໄດ້ງ່າຍບວກກັບພູມສັນ ຖານຂອງແຂວງເປັນພູດອຍສູງຊັນ, ເຫວເລິກເປັນອຸປະສັກທີ່ຈະເຂົ້້າໄປເຖິງພື້ນທີ່ເພື່ອດັບມອດໄຟໄດ້ຍາກຫຼາຍຈຶ່ງພາໃຫ້ເກີດມີໄຟໄໝ້ລາມປ່າເປັນວົງກວ້າງເຮັດໃຫ້ປ່າ ໄມ້, ຊັບພະຍາກອນປ່າໄມ້, ສັດປ່າ ແລະຊີວະນາໆພັນຖືກເຜົາໄໝ້ ແລະສູນເສຍຢ່າງມະຫາສານ.

 ສາເຫດທີ່ເຮັດໃຫ້ມີປາກົດການໄຟໄໝ້ລາມປ່າຕົ້້ນຕໍ່ກໍ່ແມ່ນມາຈາກການຈູດໄຮ່-ສວນຂອງປະຊາຊົນທີ່ກ່ອນຈະຈູດບໍ່ໄດ້ມີການເຝົ້າລະວັງປ້ອງກັນເປັນຢ່າງດີ, ຖາງແລວປ້ອງກັນໄຟລາມບໍ່ກວ້າງພໍ, ຖືເບົາ ແລະປະມາດຈູດໃນ ຕອນແດດແຮງ, ລົມແຮງ ແລະອີກສາເຫດໜຶ່ງແມ່ນເຈຕະນາຈູດປ່າເພື່ອລ່າສັດປ່າ ແລະຈຳນວນໜຶ່ງແມ່ນຖີ້ມກິດກອກຢາຢ່າງຊະຊາຍຈຶ່ງເຮັດໃຫ້ມີໄຟໄໝ້ປ່າທັງສາມປະເພດປ່າເຊັ່ນ: ປ່າສະຫງວນ, ປ່າປ້ອງກັນ ແລະ ປ່າຜະລິດຖືກໄຟເຜົາໄໝ້ເສຍຫາຍທັງໝົດ 16 ພັນເຮັກ ຕາໃນນີ້ໄຟໄໝ້ເນື້ອທີ່ປ່າສະຫງວນແຫ່ງຊາດ,ຂອງແຂວງ,ເມືອງ ແລະບ້ານ 5.176 ເຮັກຕາ; ເນື້ອທີ່ປາປ້ອງກັນແຫ່ງຊາດເສຍຫາຍ 9.069 ເຮັກຕາ; ປ່າຜະລິດ ແລະປ່າຊົມໃຊ້ຂອງບ້ານ 1.849 ເຮັກຕາ ແລະມີປ່າອື່ນ 136 ເຮັກຕາ.

  ນອກນີ້ໄຟຍັງໄດ້ໄໝ້ລຸກລາມເຂົ້າສວນປະຊາຊົນເສຍຫາຍ 318,51 ເຮັກຕາ ໃນນັ້ນໄໝ້ສວນຢາງພາລາ 18,16  ເຮັກຕາ; ສວນໝກາແໜ່ງ 249,5 ເຮັກຕາ; ສວນໝາກຂ່າ 6 ເຮັກຕາ; ຕົ້້ນຍານ 23,9 ເຮັກຕາ; ຕົ້ນຊາປ່າ 21 ເຮັກຕາ; ທົ່ງຫຍ້າ 80,1 ເຮັກຕາ.

__________

ຂຽນໂດຍ: ສົມຄິດ ແກ້ວນວນລາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์