ເຈົ້າແຂວງໄຊຍະບູລີຊຸກຍູ້ ຂະບວນການປູກ-ການລ້ຽງ ຢູ່ເມືອງແກ່ນທ້າວ ແລະເມືອງບໍ່ແຕນ

  ເພື່ອຮັບປະກັນດ້ານສະບຽງອາຫານໃຫ້ພຽງພໍໃນໄລຍະການແຜ່ລະບາດຂອງພະຍາດໂຄວິດ 19 ນັ້ນ, ໃນລະຫວ່າງວັນທີ 28- 29 ເມສາ 2020 ນີ້ ທ່ານ ພົງສະ ຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະຂອງແຂວງໄດ້ລົງຊຸກຍູ້ຂະບວນການປູກ-ການລ້ຽງຂອງປະຊາຊົນເຂດບ້ານ ຫ້ວຍເລິກ-ວັງປາ ເມືອງແກ່ນທ້າວ ແລະເຂດບ້ານບໍ່ສານ-ຕົ້ນຕານ ເມືອງບໍ່ແຕນ ແຂວງໄຊຍະບູລີ, ກ່ອນອື່ນທີມງານຂອງທ່ານເຈົ້າແຂວງແມ່ນໄດ້ຮັບຟັງການງາຍງານສະພາບການເກັບກ່ຽວຜົນຜະລິດ

ລະດູແລ້ງ ແລະການກະກຽມຜະລິດລະດູປີ, ພ້ອມທັງໄດ້ຮັບຟັງການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຂອງແຕ່ລະບ້ານ, ໂດຍລວມແລ້ວ ການເກັບກູ້ຜົນຜະລິດພືດລະດູແລ້ງແມ່ນສໍາເລັດເກືອບ 100%, ພືດທີ່ປະຊາຊົນປູນສ່ວນໃຫຍ່ແມ່ນ: ເຂົ້ານາແຊງ, ສາລີຫວານ, ຖົ່ວດິນ, ໝາກແຕງ, ໝາກເຜັດ-ໝາກເຂືອ ແລະພືດຜັກຕ່າງໆ, ນອກນີ້ປະຊາ ຊົນຍັງໄດ້ລ້ຽງສັດປະເພດ, ໝູ, ປາ, ເປັດ-ໄກ່ ແລະກົບ ເພື່ອຈໍາໜ່າຍໃຫ້ ປະຊາຊົນໃນຊ່ວງວິກິດໂຄວິດ-19, ສາມາດເວົ້າໄດ້ວ່າປະຊາຊົນໃນຂົງເຂດບ້ານດັ່ງກ່າວແມ່ນສາມາດກຸ້ມຕົນເອງ, ມີເຂົ້າ, ປາ-ອາຫານໄວ້ບໍ ລິໂພກຢ່າງພຽງພໍ, ສ່ວນການກະກຽມສູ່ການຜະລິດລະດູປີໆນີ້, ປະຊາ ຊົນແມ່ນໄດ້ກະກຽມດິນສໍາ ເລັດ 100%, ໄດ້ລົງມືປູກພືດສະບຽງອາຫານສໍາເລັດຈໍານວນໜຶ່ງເຊັ່ນ: ເຂົ້ານາປີແມ່ນຕົກກ້າສໍາເລັດ 50-60%, ສາລີຫວານ, ໝາກຖົ່ວດິນ,ພືດຜັກ ແລະອື່ນໆ, ພືດເປັນສິນຄ້າແມ່ນປູກສໍາເລັດເກືອບ 100% ສ່ວນຫຼາຍປະຊາຊົນແມ່ນປູກມັນຕົ້ນ, ສາລີຫົວອາຫານສັດ, ໝາກງາ ແລະອື່ນໆ, ນອກນີ້ປະຊາຊົນຍັງໄດ້ຫັນຈາກການປູກຫຍ້າລ້ຽງສັດໃຫຍ່ປະເພດງົວ-ຄວາຍແບບເປັນເດີ່ນ, ເປັນທົ່ງມາເປັນການປູກຫຍ້າລ້ຽງແບບທອມເອົາ.

  ສໍາລັບການຕ້ານ ແລະສະກັດກັ້ນພະຍາດໂຄວິດ-19 ແຕ່ລະບ້ານແມ່ນໄດ້ປະຕິບັດຕາມຄໍາສັ່ງ 06 ແລະຄໍາສັ່ງຂອງທ່ານຢ່າງເຂັ້ມງວດ, ໂດຍໄດ້ນໍາເອົາປະຊາຊົນພາຍ ໃນບ້ານທີ່ກັບຈາກການໄປ ອອກແຮງງານຢູ່ປະເທດໄທ ແລະ ຕ່າງແຂວງເຂົ້າສູນກັກກັນເພື່ອກັ່ນ ກອງຊອກຫາເຊື້ອພະຍາດດັ່ງກ່າວ, ຜ່ານການຕິດຕາມ ແລະເຂົ້າສູນຂອງປະຊາຊົນແຕ່ລະບ້ານຄົບຕາມກໍານົດເວລາທີ່ຂັ້ນເມິງໄດ້ກໍານົດໃຫ້ນັ້ນແມ່ນບໍ່ມີກໍລະນີຫຍັງ ແລະໄດ້ອອກຈາກສູນກັບສູ່ຄອບຄົວທັງໝົດ.

  ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ກໍ່ໄດ້ຍ້ອງຍໍຊົມເຊີຍຕໍ່ປະຊາຊົນແຕ່ລະບ້ານທີ່ໄດ້ເອົາໃຈໃສ່ໃນການຜະລິດພືດສະບຽງອາຫານເພື່ອກຸ້ມຕົນເອງໃນຊ່ວງໄລຍະການລະບາດຂອງພະຍາດໂຄວິດ 19 ແລະໄດ້ພ້ອມກັນເປັນເຈົ້າການ, ເຂັ້ມງວດ ແລະຈັດຕັ້ງປະຕິບັດຕາມຄໍາສັ່ງ 06 ຢ່າງມີປະສິດທິຜົນໃນການຕ້ານ ແລະສະກັດກັ້ນພະຍາດໂຄວິດ-19 ແລະໄດ້ຮຽກຮ້ອງໃຫ້ປະຊາຊົນແຕ່ລະບ້ານຈົ່ງສືບຕໍ່ທໍາການຜະລິດດ້ວຍການປູກພືດສະບຽງອາຫານ, ພືດອຸດສາຫະກໍາເປັນສິນຄ້າ, ລ້ຽງສັດ, ສືບຕໍ່ເກັບກູ້ຜົນຜະລິດລະດູແລ້ງໃຫ້ ສໍາເລັດ ແລະກະກຽມສູ່ການຜະລິດລະດູປີໃຫ້ທ່ວງທັນກັບລະດູການ, ພ້ອມດຽວກັນກໍ່ຕ້ອງວາງແຜນປູກໄມ້ໃຫ້ເປັນປ່າໃນຂອບເຂດປ່າຕົ້ນນໍ້າເພື່ອຮັກສາແຫຼ່ງນໍ້າຕາມຫ້ວຍຕ່າງໆບໍ່ໃຫ້ບົກແຫ້ງ, ເອົາໃຈໃສ່ຕໍ່ບັນຫາປາກົດການຫຍໍ້ທໍ້ພາຍໃນບ້ານເປັນຕົ້ນແມ່ນສຶກສາອົບຮົມລູກຫຼານໃຫ້ຫ່າງໄກຈາກຢາເສບຕິດ, ຈາກນັ້ນທ່ານເຈົ້າແຂວງກໍ່ໄດ້ລົງຢ້ຽມຢາມເບິ່ງການປູກຫຍ້າທອມງົວ ແລະສະຖານທີ່ຜະລິດຂອງປະຊາຊົນຕື່ມອີກ.

______________

ຂຽນໂດຍ:  ອຸ່ນເຮືອນ ໂພທິລັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์