ປັງປຸງສິ່ງແວດລ້ອມນໍ້າເຂດບ້ານມະໂນມູນຄ່າ 1 ຕື້ກວ່າກີບ

ນະຄອນຫຼວງພະບາງໄດ້ຮັບເງິນຊ່ວຍເຫຼືອລ້າ 1.782 ລ້ານກວ່າກີບ (182.600 ຢູໂຣ) ຈາກອົງການຝຣັ່ງເພື່ອການພັດທະນາເຂົ້າໃນໂຄງການປັບປຸງສິ່ງແວດລ້ອມນໍ້າເຂດບ້ານມະໂນ ໂດຍແມ່ນບໍລິສັດສຸລິຍະວົງ ແລະສ້ອມແປງຈໍາກັດຜູ້ດຽວ(ຢູ່ນະຄອນຫຼວງວຽງຈັນ) ເປັນຜູ້ຮັບເໝົາກໍ່ສ້າງຈາກການປັບປຸງສິ່ງແວດລ້ອມເຂດດັ່ງກ່າວມາຮອດປະຈຸບັນແມ່ນເຫັນຜົນດີສິ່ງແວດລ້ອມສະອາດຂຶ້ນ.

 ໂຄງການທົດລອງປັບປຸງສິ່ງແວດລ້ອມນໍ້າເຂດບ້ານມະໂນແມ່ນໂຄງການໜຶ່ງຕັ້ງຢູ່ເຂດມໍລະດົກກວມເອົາສ່ວນໜຶ່ງຂອງບ້ານມະໂນ ແລະບ້ານປ່ອງຄຳ, ມີເນື້ອທີ່ທັງໝົດ 50 ເຮັກຕາ, ຈຸດປະສົງຂອງໂຄງການແມ່ນເພື່ອເປັນໂຄງການຕົວແບບໃນການຟື້ນຟູໜອງນໍ້າທຳມະຊາດທີ່ສົ່ງກິ່ນເໜັນມາຊ່ວຍບຳບັດນໍ້າເປື້ອນໄປພ້ອມກັບການສ້າງຮ່ອງລະບາຍນໍ້າໃຫຍ່ເພື່ອແກ້ໄຂບັນຫານໍ້າຖ້ວມຂັງ ແລະ ເຮັດໃຫ້ພື້ນທີ່ດັ່ງກ່າວມີອາກາດທີ່ດີ ແລະຊີວິດຊີວາ, ມີສະພາບແວດລ້ອມທີ່ດີຂຶ້ນ, ໂຄງການນີ້ມີໜ້າວຽກຫຼັກຄື: ປັບປຸງໜອງນໍ້າທະມະຊາດທີ່ຂຶ້ນບັນຊີມໍລະດົກຈຳນວນ 21 ໜອງ, ປັບປຸງໜອງສ່ວນລວມຢູ່ຫ້ອງການບ້ານໆ ມະໂນເປັນບ່ອນບຳບັດນໍ້າເປື້ອນທີ່ໄຫຼມາຈາກຮ່ອງ ນໍ້າໃຫຍ່, ກໍ່ສ້າງຮ່ອງລະບາຍນໍ້າໃຫຍ່, ກໍ່ສ້າງທໍ່ລອດທາງເສັ້ນທາງບ້ານມະໂນ, ກໍ່ສ້າງທາງຢ່າງລຽບແຄມຮ່ອງນໍ້າ, ອະນາໄມຮ່ອງນໍ້າເກົ່າຢູ່ເບື້ອງເທິງ, ຕິດຕັ້ງຕະແກງດັກຂີ້ເຫຍື້ອໃສ່ຮ່ອງນໍ້າ ແລະຕິດຕັ້ງປະຕູຄວບຄຸມນໍ້າໃສ່ຈຸດເຊື່ອມຕໍ່ລະຫວ່າງໜອງກັບຮ່ອງ.  

  ຈາກການໃຫ້ສໍາພາດປະຊາຊົນຫຼາຍຄອບຄົບທີ່ຢູ່ຕິດກັບບໍລິເວນດັ່ງກ່າວໃນວັນທີ 29 ເມສາ 2020 ນີ້ເວົ້າເປັນສຽງດຽວກັນຕໍ່ທີມຂ່າວສັງຄົມປະຈໍາແຂວງຫຼວງພະບາງພວກເຮົາວ່າ: ນັບແຕ່ໄດ້ມີການປັບປຸງບໍາບັດນໍ້າເປື້ອນໄດ້ເຮັດໃຫ້ອາກາດແລະສະພາບແວດລ້ອມດີຂຶ້ນຫຼາຍເພາະວ່າໃນກ່ອນທີ່ບໍ່ມີໂຄງການບໍາບັດນໍ້າເປື້ອນນີ້ອາກາດເປັນພິດ, ມີກິ່ນເໜັ່ນຕະຫຼອດ, ເວລາຝົນຕົກນໍ້າກໍຍືງຖ້ວມເຮືອນເຮັດໃຫ້ການດໍາລົງຊີວິດພົບຄວາມລໍາບາກຫຼາຍ, ປະຈຸບັນນີ້ໂຄງການເພິ່ນໄດ້ເຮັດສໍາເລັດກິ່ນເໜັນກໍ່ຫາຍໄປມີແຕ່ອາກາດສົດແບບທໍາມິຊາດເໜືອນກັບວ່າໄດ້ມີຊີວິດໃໝ່.

______________

ຂຽນໂດຍ:  ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์