ການລັກໂລບຊີງຊັ່ງມີໂທດຜູ້ຂາຍຕ້ອງລະວັງຜູ້ຊື້ກໍ່ຕ້ອງຮອບຄອບ

  ທ່ານ ພອນສະໄໝ ຈັນສີນາ ຫົວໜ້າພະແນກພະແນກວິທະຍາສາດ ແລະເຕັກໂນໂລຊີ ແຂວງສະຫວັນນະເຂດໃນນາມເປັນເສນາທິການໃຫ້ແກ່ການນຳຂອງແຂວງ ແລະການນຳຂອງກະຊວງວິທະຍາສາດ ແລະເຕັກໂນໂລຊີ, ຂໍຖະແຫຼງການຄືນກ່ຽວກັບປາກົດການຫຍໍ້ທໍ້ທີ່ເກີດຂຶ້ນໃນສັງຄົມ, ໂດຍສະເພາະເລື່ອງ: ການຕິດຊັ່ງບໍ່ໄດ້ມາດຕະຖານຫຼືບໍ່ເຕັມກິໂລຈຶ່ງເກີດມີຂໍ້ຂັດແຍ່ງລະຫວ່າງຜູ້ຂາຍ ແລະຜູ້ຊື້ມີການຖົກຖຽງກັນຢູ່ຕະຫຼາດສະຫວັນໄຊແຂວງສະຫວັນນະເຂດ,ຄັ້ງວັນທີ 20 ເມສາ2020 ແລະມີການໂຟສອອກສື່ອອນລາຍສູ່ສັງຄົມ ແລະມີຄຳຄິດຄຳເຫັນຫຼາກຫຼາຍທັງດ້ານລົບ ແລະດ້ານບວກຕໍ່ການຄຸ້ມຄອງລັດຄຸ້ມຄອງສັງຄົມດ້ວຍລະບຽບ ແລະກົດໝາຍຂອງລັດເຮົາ.

  ຕໍ່ກັບເຫດການດັ່ງກ່າວນັ້ນພາກລັດພວກເຮົາກໍ່ໍບໍ່ໄດ້ນິ້ງນອນໃຈເບື້ອງຕົ້ນພະແນກພວກເຮົາໄດ້ຮັບການປະສານງານຈາກພະແນກອຸດສາຫະກຳ ແລະການຄ້າໃຫ້ແຕ່ງພະນັກງານຂອງພະແນກເຂົ້າຮ່ວມເພື່ອລົງໄປກວດກາເຫດການດັ່ງກ່າວ ແລະ ທາງພະແນກກໍ່ໄດ້ມອບໝາຍໃຫ້ຂະແໜງທີ່ຮັບຜິດຊອບວຽກນີ້ແຕ່ງກັນໄປຮ່ວມນຳຂະ ແໜງການຄ້າ ເພື່ອເກັບກຳຂໍ້ມູນເບື້ອງຕົ້ນດັ່ງທີ່ພວກ ທ່ານເຫັນໃນສື່ສັງຄົມອອນລາຍ, ໃນ ນາມຂະແໜງວິທະຍາສາດ ແລະເຕັກ ໂນໂລຊີຊຶ່ງເປັນຂະແໜງຄຸ້ມຄອງມາດຕະຖານການຊັ່ງ, ການຜອງໄດ້ດຳເນີນການດັ່ງນີ້: ໄດ້ເຊີນເອົາຜູ້ຊື້-ຜູ້ຂາຍມາໃຫ້ຂໍ້ມູນ, ພ້ອມທັງໄດ້ປະສານກັບຝ່າຍຈັດສັນຕະຫຼາດເບິ່ງກ້ອງວົງຈອນປິດ ເຫດ ການຄວາມເປັນຈິງຄືນໃໝ່, ໂດຍເອົາເຫດການໃຫ້ສຳພາດນັກຂ່າວທັງຝ່າຍຊື້ແລະຝ່າຍຂາຍມາປະກອບໃສ່. ແລ້ວສະຫຼຸບດັ່ງນີ້: ຝ່າຍຂາຍເຫັນວ່າຜິດກົດໝາຍວ່າດ້ວຍການວັດແທກການຊັ່ງຜອງ, ກິໂລກໍ່ຄືກິໂລບໍ່ມີກິໂລເຕັມ ແລະກິໂລບໍ່ເຕັມ, ໜຶ່ງກິໂລເທົ່າ 1000 ກະລາມ ຫຼື 10 ຂີດ, ຕາມປະມວນກົດ ໝາຍອາຍາສະບັບເລກທີ 26/ສພຊ, ລົງວັນທີ 17 ພຶດສະພາ 2017 ມາດຕາ 280 ການປອມແປງຕາຊີງ ຫຼືການວັດແທກ: ບຸກຄົນໃດຫາກໄດ້ລັກໂລບການຊັ່ງ, ການຜອງ, ການວັດແທກ ໃນເວລາຊື້ຂາຍ,ແລກປ່ຽນ ຫຼືໃຊ້ຊີງ, ເຄື່ອງຜອງ, ເຄື່ອງວັດແທກທີ່ດັດແປງ ຫຼືທີ່ບໍ່ໄດ້ມາດຕະຖານເພື່ອລັກໂລບເອົາສິນຄ້າ ຫຼືເງິນຈະຖືກລົງໂທດຕັດອິດສະລະພາບແຕ່ຫົກເດືອນຫາສອງປີ ແລະຈະຖືກປັບໄໝແຕ່ 5 ລ້ານກີບ ຫາ 10 ລ້ານກີບ.

  ແຕ່ກໍລະນີດັ່ງກ່າວນີ້ເນື່ອງຈາກວ່າການກະທຳຜິດຂອງຜູ້ກ່ຽວຍ້ອນຄວາມຮູ້ເທົ້າບໍ່ເຖິງການຍ້ອນຄວາມເຄີຍຊິນຢາກຊື້ຢາກຂາຍ ແລະເປັນການກະທຳຜິດຄັ້ງທຳອິດທີ່ສັງຄົມຈັບໄດ້, ອີກປະການໜຶ່ງມູນຄ່າການຊື້ຂາຍແມ່ນບໍ່ຫຼວງຫຼາຍບໍ່ເຖິງ500.000 ກີບ ແລະລາວກໍໄດ້ຈິງໃຈສົ່ງເງິນຜູ້ຊື້ຄືນຈຳນວນໜຶ່ງ, ທາງເຈົ້າໜ້າທີ່ພວກເຮົາຈຶ່ງໄດ້ເຮັດບົດບັນທຶກການກ່າວເຕືອນໃຫ້ຜູ້ກ່ຽວຮັບຮູ້ ແລະຍອມຮັບກ່ຽວກັບການກະທຳຜິດຂອງລາວ ແລະຫ້າມກະທຳຜິດຊໍ້າ ຊ້ອນອີກ, ໃຫ້ຜູ້ກ່ຽວອອກມາຍອມຮັບຕໍ່ການກະທຳຜິດດັ່ງກ່າວ ແລະຂໍໂທດຕໍ່ສັງຄົມ, ເພື່ອເປັນແບບຢ່າງໃຫ້ກັບຊາວຄ້າຂາຍດ້ວຍກັນໃຫ້ມີຄວາມຊື່ສັດຈິງໃຈກັບການປະກອບອາຊີບຂອງຕົນເອງບໍ່ເອົາລັດເອົາປຽບຜູ້ບໍລິໂພກ.

 ຕໍ່ເຫດການດັ່ງກ່າວນີ້ກໍ່ຢາກຝາກເຕືອນສະຕິພໍ່ແມ່ພີ່ນ້ອງປະຊາຊົນທັງຜູ້ຂາຍ ແລະຜູ້ຊື້-ຜູ້ຂາຍກໍ່ຂໍໃຫ້ສັດຊື່ຈິງໃຈກັບການປະກອບອາຊີບທຳມາຫາກິນເພື່ອຄວາມໝັ້ນຄົງ ແລະຍືນຍົງໃນອາຊີບການງານຂອງຕົນເອງ, ບ້ານເມືອງມີການພັດທະນາການຄຸ້ມຄອງລັດຄຸ້ມຄອງສັງຄົມຫັນສູ່ການບັງຄັບໃຊ້ກົດໝາຍທຸກສາຂາອາຊີບຕ້ອງໄດ້ພັດທະນາຕົນເອງແຂ່ງຂັນພາຍໃຕ້ລະບຽບ ແລະກົດໝາຍ,ຜູ້ຊື້ກໍລະນີສັງເກດເຫັນການຊັ່ງການຜອງຜິດປົກກະຕິກໍ່ໃຫ້ໄປໃຊ້ບໍລິການຊິງກາງຕິດຄືນເພື່ອຄວາມຖືກຕ້ອງຊັດ ເຈນໂດຍເຈົ້າໜ້າທີ່ພວກເຮົາໄດ້ໃຫ້ຜູ້ປະກອບການຕະຫຼາດຕິດຕັ້ງຊິງກາງພ້ອມປ້າຍແນະນຳໃຫ້ທົ່ວເຖິງເພື່ອຮັບປະກັນການຊື້-ຂາຍທີ່ຍຸຕິທຳ.

____________

ໜັງສືພິມເສດຖະກິດ-ສັງຄົມ

แชร์