ອຸດົມໄຊ ປະຕິບັດມາດຕະການປ້ອງກັນ ແລະຄວບຄຸມພະຍາດໂຄວິດ-19

  ຕະຫຼອດໄລຍະໃນການຈັດຕັ້ງປະຕິບັດມາດຕະການປ້ອງກັນ, ສະກັດກັ້ນ ແລະຄວບຄຸມເຊື້ອພະຍາດໂຄວິດ-19 ໃນໄລຍະທຳອິດຂອງແຂວງອຸດົມໄຊໂດຍອີງໃສ່ຄຳສັ່ງແນະນຳເລກທີ 06 ຂອງນາຍົກລັດຖະມົນຕິ, ຄຳສັ່ງຂອງ ທ່ານເຈົ້າແຂວງ, ຄຳສັ່ງຂອງເຈົ້າ ເມືອງໆໄຊ ເຫັນວ່າສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະບັນລຸຕາມລະດັບຄາດຫມາຍດັ່ງນັ້ນຈຶ່ງວາງແຜນສືບຕໍ່ເຄື່ອນໄຫວຈັດຕັ້ງປະຕິບັດວຽກງານດັ່ງກ່າວເປັນໄລຍະທີ 2 ຕາມແຈ້ງການແນະນຳຂອງຫ້ອງວ່າການສຳນັກງານນາຍົກລັດຖະມົນຕີເລກທີ 481 ແຕ່ນີ້ຈົນຮອດວັນທີ 3 ພຶດສະພາ 2020 ນີ້.

  ທ່ານ ດຣ ສົມພອນ ຊາວມົງ ວື ຮອງຫົວໜ້າພະແນກສາທາລະນະສຸກແຂວງອຸດົມໄຊທັງເປັນກອງເລຂາຄະນະສະເພາະກິດເພື່ອຕ້ານ ແລະ ສະກັດກັ້ນພະຍາດໂຄ ວິດ-19 ຂັ້ນແຂວງກ່າວວ່າ: ຜ່ານການດຳເນີນກອງປະຊຸມສະຫຼຸບຕີລາຄາຜົນການເຄື່ອນໄຫວຈັດຕັ້ງປະຕິບັດວຽກງານຂອງຄະນະສະເພາະກິດໃນວັນທີ 20 ເມສາ 2020 ນີ້ກອງປະຊຸມແມ່ນ ໄດ້ຮັບຮອງເອົາຫຼາຍບັນຫາໂດຍສະເພາະແມ່ນຜົນສໍາເລັດໃນການເຄື່ອນໄຫວຈັດຕັ້ງປະຕິບັດວຽກງານຕ້ານ ແລະສະກັດກັ້ນເຊື້ອພະຍາດໂຄວິດ-19 ຕາມຄຳສັ່ງແນະນຳເລກທີ 06 ຂອງທ່ານນາຍົກລັດຖະມົນຕີ, ຊຶ່ງຜົນສຳເລັດດັ່ງກ່າວໂດຍລວມແລ້ວເຫັນວ່າປະສົບຜົນສຳເລັດເປັນຢ່າງດີຊຶ່ງມັນສະແດງອອກຄືຢູ່ພາຍໃນແຂວງອຸດົມໄຊແມ່ນຍັງບໍ່ທັນມີຜູ້ຕິດເຊື້ອພະຍາດໂຄວິດ-19, ໄດ້ຮັບຮອງເອົາແຜນທີ່ຈະສືບຕໍ່ເຄື່ອໄຫວໄລຍະທີ 2 ຕາມແຈ້ງການແນະນຳຂອງຫ້ອງວ່າການສຳນັກງານນາຍົກລັດຖະມົນຕີເລກທີ 481 ກ່ຽວກັບການສືບຕໍ່ຈັດຕັ້ງປະຕິບັດມາດຕະການປ້ອງກັນ ແລະ ຄວບຄຸມພະຍາດໂຄວິດ-19 ໂດຍສະເພາະແມ່ນມອບໃຫ້ພາກສ່ວນ ກ່ຽວຂ້ອງເຊັ່ນເຈົ້າໜ້າທີ່ ປກສ, ສາທາລະນະສຸກກວດກາຄົນເຂົ້າ-ອອກຢ່າງເຂັ່ງຂັດ, ດ່ານຕ່າງໆ ຕ້ອງກວດກາສິນຄ້າຢ່າງລະອຽດ, ໃຫ້ຄະນະສະເພາະກິດຂັ້ນເມືອງ ຂອງຕົນເປັນຜູ້ອະນຸຍາດໃຫ້ແກ່ຜູ້ອອກແຮງງານໄດ້ເຄື່ອນໄຫວເຮັດວຽກງານແຕ່ຕ້ອງປະຕິບັດຕາມມາດຕະການ ແລະຂັ້ນຕອນຢ່າງເຂັ້ມງວດ, ບໍລິສັດຂົນສົ່ງສິນ ຄ້າທີ່ຈະເຄື່ອນໄຫວຕ້ອງໄດ້ຮັບອະ ນຸຍາດຈາກຄະນະສະເພາະກິດ ຂັ້ນແຂວງ, ສືບຕໍ່ໂຄສະນາປະຊາສະພັນໃຫ້ປະຊາຊົນຮັບຮູ້, ເຂົ້າໃຈຢ່າງກວ້າງຂວາງ, ຄະນະສະ ເພາະກິດແຕ່ລະເມືອງຕ້ອງໄດ້ສືບຕໍ່ຈັດຕັ້ງປະຕິບັດຕາມຄຳສັ່ງແນະນຳເລກທີ 06 ຂອງນາຍົກລັດຖະມົນຕີຢ່າງເຂັ້ມງວດພ້ອມທັງສະຫຼຸບຜົນການເຄື່ອນໄຫວຈັດຕັ້ງປະ ຕິບັດວຽກງານປ້ອງກັນ ແລະຄວບຄຸມເຊື້ອພະຍາດໂຄວິດ-19 ໃນໄລຍະທີ 1 ຢ່າງລະອຽດພ້ອມທັງລາຍງານຕໍ່ຂັ້ນເທິງຮັບຊາບ.

  ທ່ານ ດຣ ສົມພອນ ຊາວມົງວື ກ່າວຕື່ມອີກວ່າ: ຜ່ານການຈັດຕັ້ງປະຕິບັດວຽກງານຂອງຄະນະສະເພາະກິດໃນໄລຍະຜ່ານມາມີທັງຂໍ້ສະດວກ ແລະຂໍ້ຫຍຸ້ງຍາກເຖິງ ຢ່າງໃດກໍຕາມທາງຄະນະສະເພາະກິດໃນການຕ້ານ ແລະຄວບຄຸມພະຍາດໂຄວິດ-19 ຈະສືບຕໍ່ ແລະ ສຸ້ຊົນຈັດຕັ້ງປະຕິບັດວຽກງານຢ່າງຈິງຈັງ ແລະຮຽກຮ້ອງໃຫ້ທຸກ ພາກສ່ວນຕະຫຼອດຮອດປະຊາຊົນໃຫ້ເປັນເຈົ້າການນຳກັນ ແລະພ້ອມກັນຈັດຕັ້ງປະຕິບັດຕາມມາດຕະການຕ່າງທີ່ຂັ້ນເທິງວາງອອກໃຫ້ເຂັ້ມງວດ.

__________

ຂຽນໂດຍ:  ຄານມະນີ ຮຽນດໍຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์