ເມືອງບູນເໜືອສືບຕໍ່ເຂັ້ມງວດໃນການປ້ອງກັນພະຍາດໂຄວິດ-19

  ຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ແລະຕໍາຫຼວດຈະລາຈອນເມືອງບູນເໜືອຍັງສືບຕໍ່ເຄືອນໄຫວລົງໂຄສະນາຕ້ານພະຍາດໂຄວິດ-19 ໂດຍສະເພາະການສືບຕໍ່ປະຕິບັດຄໍາສັ່ງຂອງທ່ານນາຍົກເລກທີ 06 ດ້ວຍການໃຊ້ລົດທີ່ເປີດເຄື່ອງສຽງໄປຕາມເສັ້ນທາງເທສະບານເມືອງ ແລະໜ່ວຍງານຖະແຫຼງຂ່າວຂອງເມືອງໄດ້ລົງຊຸກຍູ້ໃຫ້ແຕ່ລະບ້ານໂຄສະນາຜ່ານລະບົບໂທລະໂຄ່ງຂອງ 14 ໝູ່ບ້ານເທສະບານໃນແຕ່ລະຕອນເຊົ້າ ແລະຕອນແລງທຸກວັນເປັນປົກກະຕິ.

  ພ້ອມນີ້ຄະນະສະເພາະກິດຍັງໄດ້ປະຕິບັດຕາມແຈ້ງການຂອງຄະນະສະເພາະກິດຂັ້ນສູນກາງເລກທີ 037/ສພກ ລົງວັນທີ24 ເມສາ 2020 ໂດຍການລົງສຳຫຼວດ, ກວດກາຕາມໂຮງຮຽນ, ໂຮງແຮມ, ເຮືອນພັກເພື່ອຈັດເປັນສູນກັກກັ້ນເພື່ອຮອງຮັບແຮງງານລາວ ແລະຕ່າງປະເທດ, ນັກສຶກ ສາ, ນັກທຸລະກິດຈາກຕ່າງປະເທດ ແລະມາຈາກເຂດທີ່ມີຄວາມສ່ຽງທີ່ຈະເດີນທາງກັບຄືນເຂົ້າມາເມືອງບູນເໜືອ.

  ສຳລັບການກັກກັ້ນຢູ່ສູນຂອງເມືອງບູນເໜືອປະຈຸບັນແມ່ນບໍ່ມີແລ້ວ, ສ່ວນບຸກຄົນທີ່ກັກບໍລິເວນຢູ່ເຮືອນຍັງມີພຽງແຕ່ 4 ຄົນ, ຍິງ 2 ຄົນ.

_____________

ໜັງສືພິມເສດຖະກິດ-ສັງຄົມ

• 30/04/2020