ຈຳປາສັກ ຕິດຕາມຄວາມພ້ອມບັນດາໂຮງງານທີ່ກຽມເປີດຜະລິດ

  ວັນທີ 24 ເມສາ 2020 ຜ່ານມາ ທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກ ພ້ອມການນໍາຂອງແຂວງໄດ້ລົງເຄື່ອນໄຫວຕິດຕາມເບິ່ງບັນດາບໍລິສັດ, ໂຮງ ງານຢູ່ເຂດເສດຖະກິດພິເສດລາວ-ຍີ່ປຸ່ນ ທີ່ກະກຽມເປີດທໍາການຜະລິດເປັນປົກກະຕິເປັນຕົ້ນ: ບໍລິສັດ ລີອອນກາເວີຣ ລາວ ຈໍາກັດ, ບໍລິສັດ ທາຄາ ເນະ ອີເລັກໂຕຼນິກ ລາວ ຈໍາກັດ, ໂຮງງານອໍເຈແປນ ບຸໂດງຸ ລາວ ຈໍາກັດ.

  ໃນໂອກາດລົງຕິດຕາມຄັ້ງນີ້ໄດ້ຮັບຟັງການລາຍງານໂດຍສັງເຂບຂອງບັນດາບໍລິສັດກໍຄືໂຮງງານກ່ຽວກັບສະພາບການດໍາເນີນທຸລະກິດໃນໄລຍະຜ່ານມາ ແລະລາຍງານກ່ຽວກັບວິທີການປ້ອງກັນພະຍາດໂຄວິດ-19 ຕາມການແນະນໍາຂອງພະແນກສາທາລະນະສຸກແຂວງທັງນີ້ກໍເພື່ອຮັບປະກັນບໍ່ໃຫ້ເກີດມີພະຍາດດັ່ງກ່າວໃນໝູ່ພະນັກງານ-ກຳມະກອນພາຍໃນໂຮງງານ  (ເວລາເປີດໂຮງງານ) ຈາກນັ້ນທ່ານ ບົວລິນ ວົງພະຈັນ ກໍໄດ້ເນັ້ນໜັກໃຫ້ບໍລິສັດ, ໂຮງງານເພີ່ມທະວີການປ້ອງກັນ, ການຕອບຕ້ານພະຍາດໂຄວິດ-19 ໃຫ້ມີປະສິດທິພາບສູງ.

  ໃນວັນດຽວກັນຍັງໄດ້ໄປຕິດຕາມເບິ່ງສູນຊ່ວຍເຫຼືອຜູ້ດ້ອຍໂອກາດທາງສັງຄົມ ແຂວງຈໍາປາສັກ ຊຶ່ງສູນດັ່ງກ່າວຈະຈັດເປັນສະຖານທີ່ເພື່ອຮອງຮັບແຮງງານລາວທີ່ເດີນ ທາງກັບຈາກຕ່າງປະເທດ (ສະຖານທີ່ຈະໃຊ້ເປັນບ່ອນກັກກັນ 14 ວັນ)  ຊຶ່ງສະຖານທີ່ມີ 6 ຫຼັງ, 18 ຫ້ອງ, ສາມາດຮອງຮັບ 90 ຄົນ (ຕາມລະບຽບຂອງສາທາ), ຕັ້ງຢູ່ຫຼັກ 21 ເມືອງ ປະທຸມພອນ.

______________

ໜັງສືພິມເສດຖະກິດ-ສັງຄົມ

แชร์