ໜອງບົກເກັບກ່ຽວເຂົ້ານາແຊງໄດ້ແລ້ວ 85%

  ທ່ານ ຄໍາມອນ ພົມພິພັກ ຫົວໜ້າຫ້ອງການກະສິກໍາ ແລະປ່າໄມ້ເມືອງໜອງບົກ ແຂວງຄຳມ່ວນ ໃຫ້ສຳພາດຕໍ່ສື່ມວນຊົນທ້ອງຖິ່ນກ່ຽວກັບການຜະລິດເຂົ້າລະດູແລ້ງໃນປີ 2020 ຂອງຊາວກະສິກອນຕາມແຜນສູ້ຊົນມີທັງໝົດ 2.800 ຜ່ານການຈັດຕັ້ງປະຕິບັດຕົວຈິງແມ່ນ 3.626 ເຮັກຕາ, ລື່ນແຜນການ 826 ເຮັກຕາ ຫຼືເທົ່າ ກັບ 129%. ມາຮອດປະຈຸບັນທົ່ວເມືອງສາມາດເກັບກ່ຽວເຂົ້ານາແຊງໄດ້ປະມານ 85% ຄາດວ່າຈະສຳເລັດ 100% ໃນກາງເດືອນພຶດສະພານີ້. ກ່ຽວກັບຜົນຜະ ລິດແມ່ນໄດ້ວາງຄາດໝາຍ 16. 520 ໂຕນ,ສະມັດຕະພາບ 5,9 ໂຕນຕໍ່ເຮັກຕາ ຖືໄດ້ວ່າສະມັດຕະພາບເພີ່ມຂຶ້ນສະແດງອອກຜົນຜະລິດໄດ້ 20 ພັນກວ່າໂຕນ, ລື່ນແຜນການ 4 ພັນກວ່າໂຕນ.

  ສຳລັບການປູກພືດລະດູແລ້ງຕາມແຜນການແມ່ນ 1.770 ເຮັກຕາ, ປະຕິບັດໄດ້ 2.130 ເຮັກຕາ. ໃນນັ້ນເດັ່ນກວ່າໝູ່ແມ່ນການປູກໝາກສາລີ,ໝາກຖົ່ວ, ໝາກແຕງ, ໝາກເລັ່ນ ແລະພືດຜັກຕ່າງໆທີ່ສາມາດສ້າງລາຍຮັບໃຫ້ແກ່ຊາວກະສິກອນພາຍໃນເມືອງ.

  ສຳລັບແຜນການຜະລິດເຂົ້ານາປີຕາມແຜນການສູ້ຊົນແມ່ນ 15.700 ເຮັກຕາ, ສະມັດຕະພາບ 3.9 ໂຕນຕໍ່ເຮັກຕາ ແລະ .ພືດລະດູຝົນ 664 ເຮັກຕາ, ພາຍຫຼັງ ການເກັບກ່ຽວມ້ຽນມັດເຂົ້ານາແຊງແລ້ວຈະໄດ້ສືບຕໍ່ເຄື່ອນໄຫວລົງຊຸກຍູ້ພໍ່ແມ່ປະຊາຊົນທຳການຜະລິດລະດູຝົນໂດຍສະເພາະນາປີ, ສ່ວນໜຶ່ງເຂົາເຈົ້າກໍ່ກະກຽມແນວພັນ, ໄຖຮູດ, ໄຖກົບຕໍເຟືອງແລ້ວ, ສະນັ້ນຄາດວ່າຕົ້ນເດືອນພຶດສະພາຈະໄດ້ເລີ່ມລົງມືເຂົ້າສູ່ການຜະລິດ, ຜູ້ທີ່ມີນາທາມ, ນາລຸ່ມ, ກໍ່ໃສ່ເຂົ້າງັນ (ເຂົ້າອາຍຸຍາວ) ໂດຍສະເພາະແມ່ນເຂົ້າກໍຂໍ 6, ເຂົ້າມະລິອື່ນໆ ພ້ອມກັນນັ້ນກໍ່ຈະໄດ້ເລີ່ມວ່ານ, ປະຊາຊົນສ່ວນໜຶ່ງກໍ່ຈະໄດ້ກະກຽມຕົກກ້າສຳລັບຜູ້ທີ່ບໍ່ມີເງື່ອນໄຂເຮັດນາວ່ານ.

_____________

ຂຽນໂດຍ: ມະນີວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์