ເນັ້ນກະສິກຳເປັນຜູ້ສົ່ງເສີມການຄ້າເປັນຜູ້ຄວບຄຸມ ເພື່ອຜົນປະໂຫຍດຜູ້ຊື້-ຂາຍ

  ໃນວັນທີ 24 ເມສາ 2020 ຄະນະສະເພາະກິດຕິດຕາມຜົນກະທົບທາງດ້ານເສດຖະກິດເພື່ອຮັບມືກັບການລະບາດຂອງເຊື້ອພະຍາດໂຄວິດ-19 ຢູ່ແຂວງສະຫວັນນະເຂດ, ນຳໂດຍທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງທັງເປັນປະທານສະເພາະກິດດັ່ງກ່າວພ້ອມຄະນະຊຶ່ງປະກອບມີ: ພະແນກກະສິກຳ-ປ່າໄມ້ແຂວງ, ພະແນກແຜນການ-ການລົງທຶນແຂວງ ແລະພະແນກອຸດສາຫະກຳ-ກ້ານຄ້າແຂວງ, ໄດ້ລົງສຳຫຼວດພື້ນຖານການຜະລິດ, ການປູກ-ການລ້ຽງຂອງປະຊາຊົນຢູ່ເຂດເມືອງໄຊບູລີ, ນະຄອນໄກສອນພົມວິຫານ ແລະເມືອງໄຊພູທອງໃນການຮອງຮັບດ້ານສະບຽງອາຫານ, ພືດຜັກເພື່ອໃຫ້ພຽງພໍກັບການປ້ອນຕະຫຼາດໃນການບໍລິໂພກ.

  ຜ່ານການລົງສຳຫຼວດຕົວຈິງຈຶ່ງໄດ້ພົບວ່າ: ກຸ່ມປູກພືດຢູ່ເຂດປາກເຊບັ້ງໄຟເມືອງໄຊບູລີເປັນຕົ້ນ: ກຸ່ມປູກພືດຢູ່ເຂດຫາດຊາຍແຄມຂອງບ້ານບົວໄຂ ແລະບ້ານເຊບັ້ງໄຟເຫັນວ່າປະຊາຊົນໄດ້ທຳການຜະລິດໄດ້ຫຼາຍຢ່າງໃນນັ້ນປະກອບມີ: ຜັກຫອມຊະນິດຕ່າງໆ, ໝາກແຕງ, ໝາກເຜັດ, ໝາກເຂືອ, ສາລີ, ໝາກເລັ່ນ ແລະອື່ນໆ ທີ່ຕະຫຼາດຕ້ອງການເຫັນວ່າມີຄວາມພຽງພໍ, ພຽງແຕ່ມີການບໍລິຫານຈັດການໃຫ້ເປັນລະບົບ, ພ້ອມທັງມີການຈັດຕັ້ງກຸ່ມການຜະລິດໃຫ້ມີຄວາມເຂັ້ມແຂງຂຶ້ນຕື່ມອີກ. ແຕ່ພາກລັດຕ້ອງໄດ້ມີການສົ່ງເສີມ, ມີການຄວບຄຸມລາຄາສິນຄ້າ, ຈຳກັດການນຳເຂົ້າ, ອັນສຳຄັນປະຊາຊົນຍັງໄດ້ສະເໜີຢາກໄດ້ໄຟຟ້າເພື່ອນຳໃຊ້ເຂົ້າໃນການຜະລິດ, ເພື່ອສູບນ້ຳ, ຊຶ່ງໃນຜ່ານມາແມ່ນໃຊ້ຈັກນ້ຳມັນເຫັນວ່າມີຄວາມຫຍຸ້ງຍາກ ແລະສິ້ນເປືອງຫຼາຍ.

  ຈາກນັ້ນຄະນະດັ່ງກ່າວກໍ່ໄດ້ໄປຕິດຕາມເບິ່ງຟາມລ້ຽງໄກ່ລາດບ້ານນ້ຳບໍ່, ຟາມລ້ຽງໝູ CP ບ້ານທ່າອຸດົມ ແລະຟາມລ້ຽງໝູທົ່ວໄປຢູ່ເຂດບ້ານນາແກ, ພ້ອມທັງໄປຕິດຕາມ-ສອບຖາມເຈົ້າຂອງໂຮງຂ້າສັດທ່າຊະໂນ ແລະໂຮງຂ້າສັດ ດອນເຊັງ ທີ່ຂຶ້ນກັບນະຄອນໄກສອນ ພົມວິຫານ. ໂດຍການພາທາງຂອງເຈົ້ານະຄອນໄກສອນ ພົມວິ ຫານ ພ້ອມຄະນະ, ໃນນັ້ນກໍ່ເຫັນວ່າສັດລ້ຽງປະເພດໝູ ແລະໄກ່ກໍ່ສາມາດສະໜອງໃຫ້ຕະຫຼາດໄດ້ພຽງພໍ.

 ໂອກາດນີ້ທ່ານ ທ່ອນແກ້ວ ພຸດທະໄກຍະລາດ ຍັງໄດ້ຮຽກຮ້ອງມາຍັງເຈົ້າຂອງໂຮງຂ້າສັດຊຶ່ງເປັນຜູ້ຈຳໜ່າຍປ້ອນຕະຫຼາດຈົ່ງພ້ອມກັນເອົາໃຈໃສ່ໃນການປັບປຸງຄຸນນະ ພາບ, ຄວາມສະອາດ ເພື່ອຄວາມປອດໄພຂອງຜູ້ບໍລິໂພກ, ພ້ອມທັງໃຫ້ມີການຈັດຕັ້ງກຸ່ມຜູ້ຂາຍ (ລູກຂຽງ) ຢູ່ຕະຫຼາດຕ່າງໆ, ເພື່ອຄວາມເປັນລະບຽບ ແລະສາມາດຄວບຄຸມໄດ້. ທັງນີ້ກໍ່ເພື່ອຫຼີກລ້ຽງການຂ້າສັດຊະຊາຍບໍ່ໄດ້ຜ່ານການກວດກາຈະເຮັດໃຫ້ຜູ້ບໍລິໂພກໄດ້ຮັບຜົນກະທົບ.

 ເວລາຕໍ່ມາກໍ່ໄດ້ເດີນທາງໄປຕິດຕາມເບິ່ງຟາມລ້ຽງງົວຢູ່ເຂດບ້ານທ່າໂພ ແລະບ້ານຫົວຫາດທີ່ຂຶ້ນກັບເມືອງໄຊພູທອງ, ໃນນີ້ໄດ້ນຳໜ້າພາທາງໂດຍທ່ານເຈົ້າເມືອງພ້ອມວິຊາການທີ່ກ່ຽວຂ້ອງ. ຊຶ່ງທັງສອງຟາມແມ່ນໄດ້ສະໜອງສັດໃຫ້ກັບໂຮງຂ້າສັດເພື່ອນຳໄປປ້ອນຕະຫຼາດໃຫ້ໄດ້ພຽງພໍກັບຄວາມຕ້ອງການເຊັ່ນກັນ.

  ໂອກາດດັ່ງກ່າວນີ້ທ່ານຮອງເຈົ້າແຂວງ, ປະທານຄະນະສະເພາະກິດຕິດຕາມຜົນກະທົບທາງດ້ານເສດຖະກິດກໍ່ໄດ້ເນັ້ນໜັກໃຫ້ພະແນກກະສິກຳ-ປ່າໄມ້ ຈົ່ງພ້ອມກັນເອົາໃຈໃສ່ສົ່ງເສີມການຜະລິດຂອງປະຊາຊົນໃຫ້ຖືກຕາມເຕັກນິກວິຊາການເພື່ອຕອບສະໜອງສະບຽງອາຫານໃຫ້ພຽງພໍກັບຄວາມຕ້ອງການ. ເນັ້ນໜັກໃຫ້ພະແນກອຸດສາຫະກຳ-ການຄ້າແຂວງຈົ່ງເອົາໃຈໃສ່ຄວບຄຸມລາຄາສິນຄ້າຕາມທ້ອງຕະຫຼາດໃຫ້ເໝາະສົມລະຫວ່າງຜູ້ຊື້ ແລະຜູ້ຂາຍ, ນອກນັ້ນກໍ່ຕ້ອງໄດ້ມີການສ້າງຕັ້ງກຸ່ມການຜະລິດ, ການປູກ, ການລ້ຽງ ແລະກຸ່ມຊື້-ຂາຍ ເພື່ອສ້າງຄວາມເຂັ້ມແຂງໃຫ້ແກ່ທຸກຝ່າຍ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์