ບານເຕະລາວພຣີເມຍລີກປີນີ້ໃຊ້ກຳມະການຕັດສິນ 25 ຄົນ

   ຕອນເຊົ້າວັນທີ 5 ກຸມພາ ຜ່ານມາທີ່ຫ້ອງປະຊຸມສະຫະພັນບານເຕະແຫ່ງຊາດລາວ ໄດ້ຈັດຝຶກອົບຮົມກຳມະການຕັດສິນເພື່ອກຽມຄວາມພ້ອມຕັດສິນການແຂ່ງຂັນບານເຕະເປບຊີລາວພຣີເມຍລີກ 2019 ທີ່ຈະເປີດສາກຂຶ້ນໃນວັນເສົາ 23 ກຸມພາ 2019.

ໂອກາດດັ່ງກ່າວທ່ານ ກະເສມ ອິນທະລາ ຮອງປະທານຄະນະກຳມະການໂອແລມປິກແຫ່ງຊາດລາວໄດ້ກ່າວວ່າ: ການຝຶກອົບໃນຄັ້ງນີ້ກໍເພື່ອເປັນກະກຽມການແຂ່ງຂັນ ເປບຊີລາວພຣີເມຍລີກ 2019 ຂໍໃຫ້ກຳມະການຕັດສິນໃຫ້ເອົາໃຈໃສ່ໃນການຝຶກອົບຮົມສຶກສາກົດລະບຽບທີ່ທາງຟີຟາປັປປຸງໃໝ່ໃຫ້ລະອຽດພ້ອມດຽວກັນນັ້ນຍັງໄດ້ເນັ້ນໜັກໃຫ້ກຳມະການຈົ່ງຕັ້ງໜ້າຕັດສິນໃຫ້ຄວາມເປັນທຳໃນທຸກໆນັດທີ່ລົງທຳການຕັດສິນ.

ສຳລັບການຝຶກອົບກຳມະການຕັດສິນຈະໄດ້ດຳເນີນການຝຶກນັບຕັ້ງແຕ່ວັນທີ 5 ຫາ 8 ກຸມພາ 2019 ໂດຍນັກສຳມະກອນຈະໄດ້ຮຽນຮູ້ທາງດ້ານທິດສະດີ  ແລະ ການປະຕິບັດຕົວຈິງ, ແກ້ໄຂປັບປຸງຂໍ້ຜິດພາດທີ່ຜ່ານມາພ້ອມດຽວກັນນັ້ນຈະໄດ້ມີການທົດສອບພາລະກຳລັງ ຊຶ່ງຈະໃຊ້ກຳມະການຕັດສິນລົງທຳການຕັດສິນທັງໝົດ 25 ຄົນ .

• 07/02/2019