ທ່ານ ວິລະສັກ ຊາຍຍະສິດ ຫົວຫນ້າທະນາຄານເຈດີບີສາຂາແຂວງຫຼວງພະບາງກ່າວວ່າ: ເພື່ອເປັນການປະກອບສວ່ນຕໍ່ຕ້ານໂຄວິດ-19 ທະນາຄານຮວ່ມພັດທະນາ-JDB ຈື່ງໄດ້ເຫັນຄວາມອັນຕະລາຍຈາກການຕິດເຊື້ອທີ່ພວມກໍາລັງລະບາດຢູ່ຫຼາຍປະເທດທົ່ວໂລກໃນນັ້ນ ສປປ ລາວ ເຮົາກໍໄດ້ມີຜູ້ຕິດເຊື້ອຈາກພະຍາດດັ່ງກ່າວໄປແລ້ວຈໍານວນຫນຶ່ງ ແລະ ໃນນັ້ນກໍໄດ້ປິ່ນປົວຫາຍດີ ແລະກັບບ້ານໄດ້ແລ້ວຈໍານວນໜຶ່ງ ,ໂດຍເຫັນໄດ້ຄວາມສໍາຄັນໃນການເອົາໃຈໃສ່ຂອງຄະນະສະເພາະກິດກໍຄືແພດຫມໍຜູ້ປິ່ນປົວຄົນຕິດເຊື້ອຢ່າງໃກ້ຊິດນັ້ນໃນຕອນບ່າຍວັນທີ 24 ເມສາ 2020 ກອງທຶນຮ່ວມໃຈຂອງທະນາຄານຮ່ວມພັດທະນາ-JDB ສາຂາແຂວງຫຼວງພະບາງຈື່ງໄດ້ນໍາເອົາເງິນສົດຈໍານວນ 30 ລ້ານກີບ ມອບໃຫ້ຄະນະສະເພາະກິດຂັ້ນແຂວງ, ຕາງຫນ້າຮັບໂດຍແມ່ນທ່ານ ດຣ ຄໍາສອນ ພົງສະຫວັດດີ ຫົວຫນ້າພະແນກສາທາລະນະ ສຸກແຂວງ, ທັງເປັນຄະນະສະເພາະກິດຂັ້ນແຂວງໃນການຊີ້ນໍາວຽກງານຕ້ານ ໂຄວິດ19 ທີ່ແຂວງຫຼວງພະບາງ.

  ໂອກາດດັ່ງກ່າວ ທ່ານ ດຣ ຄໍາສອນ ໄດ້ຕາງຫນ້າໃຫ້ຄະນະສະເພາະກິດຂັ້ນແຂວງກ່າວສະແດງຄວາມຂອບໃຈມາຍັງທະນາຄານຮ່ວມພັດທະນາທີ່ໄດ້ຊ່ວຍເຫຼືອໃນຄັ້ງນີ້ເປັນການປະກອບສ່ວນຊ່ວຍເຫຼືອສັງຄົມລາວເວົ້າລວມເວົ້າສະເພາະກໍຄືຊ່ວຍເຫຼືອພໍ່ແມ່ປະຊາຊົນແຂວງຫຼວງພະບາງ ແລະ ຫວັງວ່າໂອກາດຫນ້າຈະໄດ້ຮັບການຊ່ວຍ ເຫຼືອດ້ານຕ່າງໆ ຈາກທະນາຄານຮ່ວມພັດທະນາສາຂາແຂວງຫຼວງພະບາງຕື່ມອີກ.

----------------

ຂຽນໂດຍ:   ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ