ເມືອງເຮືອງຮວາ ມອບເຄື່ອງຊ່ວຍເມືອງນອງ ຕ້ານໂຄວິດ-19

  ເພື່ອຮັດແໜ້ນສາຍສຳພັນອັນເປັນມູນເຊື້ອຍາວນານ, ຄວາມສາມັກຄີພິເສດມິດຕະພາບລະຫວ່າງ ລາວ-ຫວຽດນາມ ທີ່ມີມາຕັ້ງແຕ່ດົນນານ ແລະດ້ວຍຄວາມເປັນຫ່ວງເປັນໄຍໃນສະຖານະການ, ການແຜ່ລະບາດຂອງພະຍາດອັກເສບປອດສາຍພັນໃໝ່ ຫຼືໂຄວິດ-19 ທີ່ກຳລັງແຜ່ລາມໃນຄະນະນີ້,ໂດຍສະເພາະກໍ່ຄືໃນປະເທດລາວເຮົາ ດັ່ງນັ້ນ ມາໃນອາທິດທີ່ ຜ່ານມານີ້ການນຳເມືອງເຮືອງຮວາ ແຂວງກວາງຈິ ສສ ຫວຽດ ນາມ ນຳໂດຍທ່ານ ພັທ ຕັນ ຕ໋ວນ ແອັງ ຮອງຫົວໜ້າກອງບັນຊາການທະຫານຊາຍແດນແຂວງ ກວາງຈິ ພ້ອມດ້ວຍຄະນະໄດ້ນໍາເອົາອຸປະກອນທາງການແພດ, ເຄື່ອງປ້ອງກັນ, ຄວບຄຸມຕ້ານເຊື້ອພະຍາດໂຄວິດ-19 ມາມອບໃຫ້ກັບການຳຂອງເມືອງນອງ ເພື່ອ ມອບຕໍ່ໃຫ້ພາກສ່ວນກ່ຽວຂ້ອງ. ພິທີດັ່ງກ່າວຈັດຂຶ້ນຢູ່ທີ່ແຄມນ້ຳເຊໂປນເຂດບ້ານຕະນົວເມືອງເຮືອງຮວາ ແຂວງກວາງຈິ ສສ ຫວຽດນາມ ກັບຝັ່ງເຊບ້ານແດນວິໄລ ເມືອງນອງ ແຂວງສະຫວັນນະເຂດ, ໂດຍການໃຫ້ກຽດກ່າວຮັບຂອງທ່ານ ລຳແກ້ວ ແສງໜູທອງ ເລຂາພັກເມືອງເຈົ້າເມືອງ-ເມືອງນອງ ພ້ອມຄະນະ.


  ຊຶ່ງຈຳນວນເຄື່ອງທີ່ນຳມາມອບໃນຄັ້ງນີ້ມີ: ຜ້າອັດປາກແພດຈຳນວນ 1.000 ອັນ, ເຈວລ້າງມື 36 ກ່ອງ, ຊຸດປ້ອງກັນພະຍາດທາງການແພດ 100 ຊຸດ, ຊົບມື 100 ຄູ່, ຜ້າອັດປາກແພທີ່ມີຄຸນ ນະພາບດີ ຈຳນວນ 1.000 ອັນ, ເຄື່ອງວັດແທກອຸນຫະພູມ 1 ອັນ (ວັດແທກໄຂ້) ແລະເຂົ້າສານ ຈ້າວຈໍານວນ 2 ໂຕນ, ລວມມູນຄ່າ ທັງໝົດ 19 ລ້ານກວ່າກີບ. ທັງນີ້ກໍ່ ເພື່ອຊ່ວຍເຫຼືອແບ່ງເບົາບັນເທົາ ທຸກໃຫ້ແກ່ພໍ່ແມ່ປະຊາຊົນເຂດ ບ້ານແດນວິໄລ ແລະໄດ້ແຈກຢາຍ ໃຫ້ກຳລັງ ປກຊ-ປກສ, ຕາມຈຸດ ກວດກາ, ຈຸດເວນຍາມຕ່າງໆ ທີ່ກຳ ລັງປະຕິບັດໜ້າທີ່ຢ່າງເຂັ້ມງວດ ໃນການຕ້ານການແຜ່ລະບາດຂອງ ພະຍາດໂຄວິດ-19, ເຖິງແມ່ນວ່າ ເຄື່ອງຈໍານວນດັ່ງກ່າວອາດຈະບໍ່ຫຼວງຫຼາຍແຕ່ມັນກໍ່ສະແດງເຖິງຄວາມຈິງໃຈ, ສະແດງເຖິງມູນເຊື້ອທີ່ຍິ່ງໃຫຍ່ລະຫວ່າງລາວ-ຫວຽດນາມສືບຕໍ່ປົກປັກຮັກສາມູນມໍລະດົກອັນລ້ຳຄ່ານີ້ໄວ້ໃຫ້ຊົ່ວລູກ, ຊົ່ວຫຼານໄດ້ສືບທອດຕໍ່ໆໄປ.


  ທ່ານ ພັທ ຕັນ ຕ໋ວນ ແອັງ ຮອງຫົວໜ້າກອງບັນຊາການທະຫານຊາຍແດນ ແຂວງກວາງຈິ ຍັງໄດ້ກ່າວວ່າ: ຊ່ວງໄລຍະວິດກິດຂອງພະຍາດໂຄວິດ-19 ນີ້,ຊ້ຳພັດເປັນງານບຸນປະເພນີສົງການປີໃໝ່ລາວ ພສ 2563 ຂໍຖືໂອກາດ ສະແດງຄຳອວຍພອນໃຫ້ແກ່ການນຳເມືອງນອງຈົ່ງມີພະລານາໄມທີ່ສົມບູນປັດສະຈາກໂລຄາໄພຕ່າງໆ ພ້ອມພາກັນຜ່ານຜ່າພະຍາດດັ່ງກ່າວນີ້ໃຫ້ຜ່ານພົ້ນໄປດ້ວຍດີ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์