ນໍ້າປະປາແຂວງໄຊຍະບູລີ ຈະຂະຫຍາຍນຳ້ປະປາໄຫ້ໄດ້ 74%

  ຕາມການໃຫ້ຂໍ້ມູນຈາກບໍ ລິສັດລັດວິສາຫະກິດນໍ້າປະປາ ແຂວງໄຊຍະບູລີ ໃຫ້ຮູ້ວ່າ: ປີນີ້ທາງບໍລິສັດລັດວິສາຫະກິດນໍ້າປະປາ ແຂວງໄຊຍະບູລີ ຈະໄດ້ຕັ້ງໜ້າເອົາໃຈໃສ່ຕໍ່ໜ້າທີ່ວິຊາສະເພາະ ໂດຍ ສະເພາະແມ່ນຂະຫຍາຍນໍ້າປະປາ ໃຫ້ປົກຄຸມພື້ນທີ່ກວມ 74% ໃນປີ ຜ່ານມາອັດຕາການຊົມໃຊ້ນໍ້າປະປາປົກຄຸມພື້ນທີ່ໄປແລ້ວ 71%. ໃນ 1 ປີຜ່ານມາເຖິງວ່າສະພາບການດໍາເນີນທຸລະກິດ ແລະການບໍລິການຈະພົບຄວາມຫຍຸ້ງຍາກທັງໃນຕົວ ແລະນອກຕົວເປັນຕົ້ນລາຄາວັດຖຸດິບ, ອຸປະກອນທໍ່ນໍ້າ, ຄ່າແຮງງານ ແລະການໃຊ້ຈ່າຍອື່ນໆແມ່ນ ມີລາຄາສູງ ອີກດ້ານໜຶ່ງການສະ ໜອງນໍ້າປະປາກໍ່ຍັງບໍ່ທັນສະໜອງໄດ້ຕາມຄວາມຕ້ອງການຂອງສັງຄົມໃນບາງຂົງເຂດ; ແຕ່ການນໍາ ຂອງບໍລິສັດລັດວິສາຫະກິດນໍ້າປະ ປາແຂວງໄຊຍະບູລີ ໄດ້ພ້ອມກັນ ປະຕິບັດໜ້າທີ່ວຽກງານຂອງຕົນ ໄດ້ດີຕະຫຼອດມາ ເປັນຕົ້ນສາມາດຜະລິດນໍ້າສະໜອງນໍ້າປະປາໃຫ້ ປະຊາຊົນພາຍໃນແຂວງ, ສໍານັກງານ, ອົງການ, ຫ້ອງການ, ຮ້ານອາຫານ, ບ້ານພັກ, ໂຮງແຮມໄດ້ເຂົ້າເຖິງການບໍລິການນໍ້າປະປາທີ່ສະອາດ, ສ້າງຄວາມສະດວກສະບາຍໃຫ້ແກ່ສັງຄົມໃນການດໍາລົງຊີວິດ, ເຮັດໃຫ້ຊີວິດການເປັນຢູ່ດີຂຶ້ນເປັນລໍາດັບ.
  ທົ່ວແຂວງໄຊຍະບູລີ ໄດ້ໃຊ້ບໍລິການນໍ້າປະປາມີ 9 ພື້ນທີ່ເຊັ່ນ: ເມືອງໄຊຍະບູລີ ກວມເອົາ 61%, ສາຂາເມືອງພຽງກວມເອົາ 51%, ສາຂາເມືອງປາກລາຍກວມເອົາ 103%, ສາຂາເມືອງແກ່ນທ້າວ ກວມເອົາ 100%, ສາຂາເມືອງ ຫົງສາກວມເອົາ 99%, ສາຂາ ເມືອງຊຽງຮ່ອນກວມເອົາ 30%, ໜ່ວຍບໍລິການເມືອງທົ່ງມີໄຊກວມ ເອົາ 74%, ໜ່ວຍບໍລິການເມືອງ ເງິນກວມເອົາ 70% ແລະໜ່ວຍ ບໍລິການເມືອງຄອບກວມເອົາ 27% ໃນປີຜ່ານມາອັດຕາປົກຄຸມໃນພື້ນທີ່ບໍລິການກວມເອົາທັງໝົດ 71%, ມີຈໍານວນຜູ້ທີ່ໄດ້ຊົມໃຊ້ນໍ້າ ປະປາທັງໝົດ 83.835 ຄົນ, ປະ ຊາກອນໃນພື້ນທີ່ບໍລິການທັງໝົດ 118.241 ຄົນ.
  ປະຈຸບັນທົ່ວແຂວງໄດ້ຕິດຕັ້ງໝໍ້ແທກນໍ້າ (ຫຼືກົງເຕີ) ທັງໝົດ 18.621 ໜ່ວຍ, ປີຜ່ານມາສາມາດ ຜະລິດນໍ້າໄດ້ທັງໝົດ 4,66 ລ້ານແມັດກ້ອນ,ນໍ້າສົ່ງອອກຈາກໂຮງ ງານມີ 4,43 ລ້ານແມັດກ້ອນ, ນໍ້າ ສູນເສຍທັງໝົດ 229.788 ແມັດ ກ້ອນ ແລະຂາຍນໍ້າໄດ້ທັງໝົດ 3.356,865 ແມັດກ້ອນ, ສາມາດສ້າງລາຍຮັບໄດ້ທັງໝົດ 14,4 ຕື້ ກີບ, ດ້ານລາຍຈ່າຍປະຕິບັດໄດ້ 14,1 ຕື້ກີບ, ຜົນໄດ້ຮັບ (ກໍາໄລ) 208 ລ້ານກວ່າກີບ, ໃນປີ 2019 ຜ່ານມາບໍລິສັດລັດວິສາຫະກິດນໍ້າປະປາແຂວງໄຊຍະບູລີ ໄດ້ປະຕິ ບັດພັນທະມອບອາກອນໃຫ້ລັດ ເປັນເງິນ1,92 ຕື້ກີບ.


  ໃນປີ 2020 ທາງລັດວິສາຫະກິດນໍ້າປະປາແຂວງໄຊຍະບູລີ ຈະມີແຜນຂະຫຍາຍການບໍລິການນໍ້າປະປາໃຫ້ປົກຄຸມພື້ນທີ່ 74%, ຂະ ຫຍາຍກົງເຕີ ຫຼືຕິດຕັ້ງກົງເຕີນໍ້າ ໃຫ້ໄດ້ 744 ກົງເຕີ, ຜະລິດນໍ້າໃຫ້ໄດ້ທັງໝົດ 5,16 ລ້ານແມັດກ້ອນ, ນໍ້າສົ່ງອອກຈາກໂຮງງານ 4,8 ລ້ານແມັດກ້ອນ, ນໍ້າຂາຍຈາກພີມບິນ 3,51 ລ້ານແມັດກ້ອນ, ນໍ້າສູນເສຍໃນໂຮງງານ 340.690 ແມັດກ້ອນ, ນໍ້າສູນເສຍຈາກທໍ່ 1.310 ແມັດກ້ອນ ແລະຄາດວ່າ ຈະສ້າງລາຍຮັບໄດ້ທັງໝົດ 15 ຕື້ກວ່າກີບ, ສາມາດສ້າງກໍາໄລ ຫຼືຜົນໄດ້ຮັບ 585 ລ້ານກວ່າກີບ ສ່ວນດ້ານລາຍຈ່າຍປະຕິບັດໃຫ້ໄດ້ 15,59 ຕື້ກີບ.

_____________

ຂຽນໂດຍ: ບຸນທີ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์