ກອງ​ປະ​ຊຸມ​​ທາງໄກ ສະໄໝພິເສດ ​ລັດຖ​ະ​ມົນ​ຕີ​ຕ່າງ​ປະ​ເທດ ​ອາ​ຊຽນ-ສ.ອາເມລິກາ ວ່າດ້ວຍການຕ້ານການແຜ່ລະບາດຂອງເຊື້ອພະຍາດ ໂຄວິດ-19.

  ກອງປະຊຸມທາງໄກສະໄໝພິເສດລັດຖະມົນຕີຕ່າງປະເທດອາຊຽນ-ສ.ອາເມລິກາ ກ່ຽວກັບການຕ້ານການແຜ່ລະບາດພະຍາດໂຄວິດ-19 ໄດ້ຈັດຂຶ້ນໃນຕອນເຊົ້າຂອງ​ວັນ​ທີ  23 ເມ​ສາ 2020 ທີ່ກະຊວງການຕ່າງປະເທດພາຍໃຕ້ການເປັນປະທານຮ່ວມຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີຕ່າງປະເທດແຫ່ງ ສປປ ລາວ ແລະ ທ່ານ ໄມ ປອມແປວ, ລັດຖະມົນຕີຕ່າງປະເທດແຫ່ງ ສ. ອາເມລິກາ. ເຂົ້າຮ່ວມໃນກອງປະຊຸມຄັ້ງນີ້ຍັງມີບັນດາລັດຖະມົນຕີຕ່າງປະເທດອາຊຽນ, ທ່ານ ເລຂາທິການໃຫ່ຍອາຊຽນ ແລະບັນດາພະນັກງານວິຊາການທີ່ກ່ຽວຂ້ອງຈໍານວນໜຶ່ງ.

 ກອງປະຊຸມໄດ້ຕີລາຄາສູງ ແລະຮັບຊາບຕໍ່ການແຈ້ງສະພາບການກໍຄືມາດຕະການຂອງແຕ່ລະປະເທດສະມາຊິກອາຊຽນ ແລະ ສ. ອາເມລິກາ ໃນການສະກັດກັ້ນ, ເຝົ້າລະວັງ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19. ໃນນີ້, ບັນດາທ່ານລັດຖະມົນຕີຍັງໄດ້ແລກປ່ຽນປະສົບການ ແລະບົດຮຽນທີ່ດີໃນການຕອບໂຕ້ ແລະຮັບມືກັບພະຍາດໂຄວິດ-19 ແລະຢືນຢັນຈະສືບຕໍ່ເພີ່ມທະວີການຮ່ວມມືກັນໃນຕໍ່ໜ້າ.

  ສໍາລັບ ສປປ ລາວ, ທ່ານ ລັດຖະມົນຕີ ສະເຫຼີມໄຊ ກົມມະສິດ ກໍໄດ້ແຈ້ງສະພາບການ ແລະແລກປ່ຽນຂໍ້ມູນ-ຂ່າວສານກໍຄືບົດຮຽນ ແລະມາດຕະການໃນການສະກັດກັ້ນ, ເຝົ້າລະວັງ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕໍ່ສູ້ກັບການແຜ່ລະບາດພະຍາດໂຄວິດ-19 ເປັນຕົ້ນ: ສະກັດກັ້ນການເຄື່ອນຍ້າຍຂອງພົນລະເມືອງດ້ວຍການໂຈະການເດີນທາງເຂົ້າ-ອອກປະເທດລວມທັງພົນລະເມືອງລາວ ແລະຕ່າງປະເທດ; ປິດສະຖາບັນການສຶກສາທຸກລະດັບ ແລະສະຖານບໍລິການທຸກປະເພດ ລວມທັງຮຽກຮ້ອງໃຫ້ປະຊາຊົນຢູ່ເຮືອນ; ຫຼີກລ້ຽງການຊຸມນຸມ ແລະທຸກກິດຈະກຳທີ່ມີການເຕົ້າໂຮມຈຳນວນຫຼາຍກວ່າ 10 ຄົນ; ປະຕິບັດຢ່າງເຂັ້ມງວດຕໍ່ຂໍ້ສະເໜີແນະຂອງອົງການອະນາໄມໂລກ; ແລະສຸມໃສ່ການໂຄສະນາເຜີຍແຜ່ກ່ຽວກັບຄວາມອັນຕະລາຍ ແລະວິທີປ້ອງກັນຕົນເອງຈາກການຕິດເຊື້ອໂຄວິດ-19.

 ສໍາລັບທິດທາງໃນຕໍ່ໜ້າ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະເໜີໃຫ້ກອງປະຊຸມເອົາໃຈໃສ່ຮ່ວມມືກັນສືບຕໍ່ແລກປ່ຽນຂໍ້ມູນ-ຂ່າວສານ, ປະສົບການ ແລະ ບົດຮຽນທີ່ດີໃນການເຝົ້າລະວັງ, ສະກັດກັ້ນ ແລະ ຮັບມືກັບພະຍາດໂຄວິດ-19; ສຸມໃສ່ວຽກຄົ້ນຄວ້າ ແລະ ພັດທະນາການຜະລິດຢາປົວພະຍາດກໍຄືຢາວັກແຊັງຕ້ານໂຄວິດ-19;ການສະໜັບສະໜູນຊ່ວຍເຫຼືອສ້າງຊັບພະຍາກອນມະນຸດດ້ານສາທາລະນະສຸກ; ແລະການແກ້ໄຂຜົນກະທົບຕໍ່ເສດຖະກິດກໍຄືຊີວິດການເປັນຢູ່ຂອງປະຊາຊົນ.

ສະໜັບສະໜູນໂດຍ: HONDA

 ໃນໂອກາດນີ້, ທ່ານລັດຖະມົນຕີ ຍັງໄດ້ສະແດງຄວາມຂອບໃຈ ແລະຮູ້ບຸນຄຸນຕໍ່ບັນດາປະເທດເພື່ອນມິດ ແລະອົງການຈັດຕັ້ງສາກົນລວມທັງປະເທດສະມາຊິກອາຊຽນ ແລະ ສ. ອາເມລິກາ ທີ່ໄດ້ຊ່ວຍເຫຼືອດ້ານອຸປະກອນການແພດ ແລະຢາປົວພະຍາດຕ່າງໆ ໃຫ້ແກ່ ສປປ ລາວ ໃນການສະກັດກັ້ນ ແລະຮັບມືກັບພະຍາດໂຄວິດ-19.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์