ລາວເສຍລາຍໄດ້ສົ່ງອອກ 4,2 ພັນຕື້ກີບ

  ເສດຖະກິດການຄ້າລາວຖືກຜົນກະທົບຢ່າງໜັກຈາກການລະບາດຂອງພະຍາດໂຄວິດ-19 ຫຼາຍກວ່າ 9 ພັນວິສາຫະກິດຜົນເສຍຫາຍ ແລະຄາດວ່າຈະສູນເສຍລາຍຮັບການສົ່ງອອກປະມານ 4.294,3 ຕື້ກີບ ຄິດເປັນປະມານ 8,4% ຂອງມູນຄ່າສົ່ງອອກປີ 2019.

  ຕາມຂໍ້ມູນຈາກສະຖາບັນຄົ້ນຄວ້າເສດຖະກິດແຫ່ງຊາດເປີດເຜີຍວ່າ: ສະເພາະທຸລະກິດຂະແໜງອຸດສາຫະກຳມີການຫຼຸດລົງຄວາມຕ້ອງການຂອງປະເທດຄູ່ການຄ້າຂອງ ສປປ ລາວ ບວກກັບການຈັດຕັ້ງປະຕິບັດແຈ້ງການ ເລກທີ 034/ອຄ,ກອຫລົງວັນ 31 ມີນາ 2020 ໃນການປິດດຳເນີນກິດຈະການໂຮງງານອຸດສາຫະກຳຊົ່ວຄາວ ແລະແຈ້ງເລກທີ 0432/ພບ ລົງວັນທີ 5 ເມສາ 2020 ໃນການປິດການດຳເນີນກິດຈະການໂຮງງານຂຸດຄົ້ນປຸງແຕ່ງແຮ່ທາດ ແລະໂຄງການສ້າງເຂື່ອນໄຟຟ້ານໍ້າຕົກໃນຂອບເຂດທົ່ວປະເທດຈະກະທົບຫຼາຍກວ່າ 9 ພັນວິສາຫະກິດໃນທົ່ວປະເທດ.

  ສຳລັບການຄ້າຕ່າງປະເທດການສົ່ງອອກຄາດວ່າ ສປປ ລາວ ຈະສູນເສຍ ລາຍຮັບຈາກສິນຄ້າສົ່ງອອກປະມານ 483,3ລ້ານໂດລາ ຫຼືປະມານ 4.294,3 ຕື້ກີບ ຄິດເປັນປະມານ 8,4% ຂອງມູນຄ່າການສົ່ງອອກໃນປີ 2019 ຍ້ອນການສະລໍຕົວເສດຖະກິດ ແລະຄວາມຕ້ອງການທີ່ຫຼຸດລົງຂອງປະເທດຄູ່ຕ່າງໆຂອງລາວ.

  ໂດຍຕົວເລກການສົ່ງອອກໃນໄລຍະ 3 ເດືອນທຳອິດຂອງປີ 2020 ໄດ້ ເລີ່ມມີທ່າອ່ຽງຫຼຸດລົງຈາກ 410  ລ້ານໂດລາ ໃນເດືອນມີນາດ້ານສະໜອງເຫັນວ່າມີຄວາມຈຳກັດຫຼາຍໂດຍສະເພາະໃນໄລຍະຈັດຕັ້ງປະຕິບັດຄຳສັ່ງເລກທີ 06/ນຍ ທີ່ໃຫ້ມີການຢຸດຕິຫຼາຍກິດຈະການຊົ່ວຄາວ, ລວມທັງໂຮງງານຜະລິດເພື່ອສົ່ງອອກເຊັ່ນ: ໂຮງ ງານຕັດຫຍິບ 23 ແຫ່ງ, ໂຮງງານປຣາສະຕິກ, ຊີມັງ, ຢາສູບ, ປະກອບລົດ, ເຈ້ຍ ແລະປຸງແຕ່ງໄມ້.

  ນອກນີ້ການສົ່ງອອກສິນຄ້າປະເພດກະສິກຳອາດໄດ້ຮັບຜົນກະທົບໃນໄລຍະສັ້ນ ຫຼືຊົ່ວຄາວຍ້ອນມີການປິດດ່ານທ້ອງຖິ່ນແລະມາດຕະການຈຳກັດຄົນເຂົ້າປະເທດຢ່າງເຂັ້ມງວດ.

ຢ່າງໃດກໍຕາມການນຳເຂົ້າສິນຄ້າຂອງລາວຄາດວ່າຈະຫຼຸດລົງເຊັ່ນດວກັນໂດຍອາດຫຼຸດລົງປະມານ 347 ລ້ານໂດລາ ຫຼື 3.084,5 ຕື້ກີບ ຍ້ອນການສະລໍຕົວຂອງການຊົມໃຊ້ພາຍໃນ ແລະໂຄງການລົງທຶນຕ່າງໆທີ່ປະຕິບັດການນຳເຂົ້າໄດ້ລ້າຊ້າ ຫຼືເລື່ອນການປະຕິບັດໃນໄລຍະທີ່ມີການປິດດ່ານ.

___________

ຂຽນໂດຍ:  ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์