ເຊີນທ່ຽວຫົວພັນດິນແດນແຫ່ງປະຫວັດສາດ

  ແຂວງຫົວພັນເປັນ ແຂວງທີ່ອຸດົມສົມບູນໄປດ້ວຍຊັບພະຍາ ກອນທໍາມະຊາດ, ມີພູຜາປ່າໄມ້ອັນກວ້າງໃຫຍ່ໄພສານປົກຄຸມໄປທົ່ວ ທຸກບ່ອນ,  ເນື້ອທີ່ສ່ວນໃຫຍ່ເປັນເຂດພູຜາສູງຊັນເຮັດໃຫ້ອາກາດມີຄວາມສົດຊື່ນດີ, ແຂວງຫົວພັນ ເປັນແຂວງໜຶ່ງຂອງປະເທດລາວ ຊຶ່ງຕັ້ງຢູ່ທາງພາກເໜືອຢູ່ທິດຕາເວັນອອກສຽງ ເໜືອຂອງແຂວງຊຽງຂວາງ ປະກອບມີ 10 ເມືອງຄື: ເມືອງຊໍາເໜືອ, ເມືອງວຽງໄຊ, ເມືອງຊຽງຄໍ້, ເມືອງຮ້ຽມ, ເມືອງຫົວເມືອງ, ເມືອງຊໍ້າໃຕ້, ສົບເບົາ, ເມືອງແອດ, ເມືອງກວັນ ແລະເມືອງຊ່ອນ, ປະກອບດ້ວຍຫຼາຍຊົນເຜົ່າເປັນຕົ້ນແມ່ນລາວລຸ່ມ, ໄທຂາວ, ໄທແດງ, ໄທເໜືອ, ໄທນ້ອຍ, ມົ້ງ, ຂະມຸ ແລະອື່ນໆ.

ແຂວງຫົວພັນ ເປັນແຂວງທີ່ອຸດົມສົມບູນໄປດ້ວຍສະຖານທີ່ທ່ອງທ່ຽວທີ່ໂດດເດັ່ນ ແລະໜ້າສົນໃຈຢູ່ຫຼາຍແຫ່ງເຊັ່ນ: ຖ້ຳປະຫວັດສາດ ຜູ້ນຳ, ບໍ່ນ້ຳອຸ່ນນາເມືອງ, ບ້ານຫັດ ຖະກຳຕ່ຳຫູກບ້ານຊຳໃຕ້, ຕາດລຸນ, ສວນອຸທິຍານຫີນຕັ້ງ, ຕາດສະເຫຼີຍ, ວັງສະຫງວນ, ແກ້ງລິດ, ຕາດຫ້ວຍ ສ້ານ, ຕາດນ້ຳນົ່ວ, ຖ້ຳປະຫວັດ ສາດເຂດຫາງລ້ອງ ແລະອື່ນໆ ຊຶ່ງທັງໝົດເຫຼົ່ານີ້ໄດ້ກາຍເປັນມົນສະເໜ່                                                                        ດຶງດູດຈິດໃຈບັນດານັກທ່ອງທ່ຽວ ທັງພາຍໃນ ແລະຕ່າງປະເທດເຂົ້າ ມາທ່ຽວຊົມເປັນປະຈໍາ, ຈາກນັ້ນ ຈຶ່ງໄດ້ເຮັດໃຫ້ວຽກງານທ່ອງທ່ຽວຂອງແຂວງນັບມື້ເປີດກວ້າງ ແລະ ໄດ້ຮັບການພັດທະນາໄປເລື້ອຍໆ.

ແຂວງຫົວພັນເຖິງແມ່ນວ່າເປັນແຂວງທີ່ມີພູດອຍເປັນສ່ວນໃຫຍ່, ແຕ່ພື້ນຖານໂຄງລ່າງໃນການພັດທະນາທາງດ້ານເສດຖະກິດ, ວັດທະນະທໍາສັງຄົມ ແລະການທ່ອງທ່ຽວແມ່ນໄດ້ມີມາແຕ່ກ່ອນນັ້ນແລ້ວຈຶ່ງເຮັດໃຫ້ແຂວງດັ່ງກ່າວໄດ້ຮັບການພັດທະນາຊຶ່ງປະຊາຊົນມີຄວາມສາມັກຄີເປັນປຶກແຜ່ນ, ມີຄວາມດຸໝັ່ນຫ້າວຫັນ, ມີວັດທະນະທໍາ ແລະຮີດຄອງປະເພນີອັນດີງາມຂອງຊົນເຜົ່າ, ມີນໍ້າໃຈເອື້ອອາລີໄມ ຕີຈິດຕ້ອນຮັບແຂກທີ່ມາຢ້ຽມຢາມ ດ້ວຍຄວາມອົບອຸ່ນ  ແລະຈິງໃຈຖ້າທ່ານໃດໄດ້ໄປແຂວງຫົວພັນເມື່ອໃດ ທ່ານກໍສາມາດເລືອກສະຖານທີ່ທ່ຽວຊົມໄດ້ຕາມໃຈມັກ ແລະທຸກໆສະຖານທີ່ທ່ອງທ່ຽວລ້ວນແລ້ວແຕ່ມີຄວາມສວຍສົດງົດງາມອັນເປັນ ເອກະລັກສະເພາະທີ່ແຕກຕ່າງກັນໄປ ແລະເຮັດໃຫ້ທ່ານມີຄວາມປະທັບໃຈໄປຫຼາຍເກີນກວ່າທີ່ຄາດຄິດ.

• 07/02/2019