ສາລະວັນ ສະໜອງສະບຽງອາຫານພຽງພໍ ຮອງຮັບໃນໄລຍະທີ່ພະຍາດໂຄວິດ-19 ລະບາດ

 ໂດຍປະຕິບັດຕາມຄຳສັ່ງຂອງນາຍົກລັດຖະມົນຕີແຫ່ງ ສປປ ລາວ ເລກທີ 06/ນຍ ວ່າ ດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19, ແຂວງສາລະວັນ ກໍໍ່ໄດ້ຈັດຕັ້ງຜັນຂະຫຍາຍບັນດາຄຳສັ່ງ, ແຈ້ງການ ຕ່າງໆຂອງພັກ ແລະລັດຖະບານ ພ້ອມກັນປະຕິບັດຢ່າງເຄັ່ງຄັດ ແລະເຂັ້ມງວດ, ຄຽງຄູ່ກັນນັ້ນກໍ່ ໄດ້ກຽມຄວາມພ້ອມດ້ານສະບຽງ ອາຫານ ທີ່ຈະກະທົບເຖິງຊີວິດການເປັນຢູ່ຂອງປະຊາຊົນໃນທົ່ວສັງຄົມ ໃນໄລຍະທີ່ພະຍາດແຜ່ລະບາດ.

  ທ່ານ ກິພະຈັນ ໂພສາລີ ຮອງ ຫົວໜ້າພະແນກກະສິກຳ ແລະປ່າໄມ້ແຂວງສາລະວັນ ໄດ້ເປີດເຜີຍຕໍ່ ສື່ມວນຊົນແຂວງເມື່ອບໍ່ດົນມານີ້ ໃຫ້ຮູ້ວ່າ: ພາຍຫຼັງທີ່ລັດຖະບານ ກໍ່ຄືອົງການປົກຄອງແຂວງໄດ້ອອກຄຳສັ່ງ ແລະແຈ້ງການຕ່າງໆ ກ່ຽວກັບການຕ້ານ ແລະສະກັດກັ້ນ ການແຜ່ລະບາດຂອງພະຍາດດັ່ງກ່າວ,ພະແນກກະສິກຳ ແລະ ປ່າໄມ້ແຂວງກໍ່ໄດ້ເຊື່ອມຊຶມ ແລະ ຈັດຕັ້ງຜັນຂະຫຍາຍ ໂດຍໄວໃນຂອບເຂດຄວາມຮັບຜິດຊອບຂອງຕົນໂດຍໄດ້ມອບໝາຍໃຫ້ຄະນະພັກ, ຄະນະນຳຂອງພະແນກ, ຫ້ອງ ການ 8 ຕົວເມືອງ ສືບຕໍ່ຈັດຕັ້ງປະຕິບັດວຽກງານວິຊາສະເພາະເພື່ອຮອງຮັບດ້ານສະບຽງອາຫານໃຫ້ ແກ່ປະຊາຊົນໄດ້ທົ່ວເຖິງ ແລະພຽງ ພໍກັບຄວາມຕ້ອງການຂອງສັງຄົມ, ພາຍໃນໄລຍະ 3 ເດືອນ ຕົ້ນປີ 2020 ນີ້, ສາມາດສະໜອງ ຊີ້ນ, ປາ, ໄຂ່ ໄດ້ທັງໝົດ 6.069.858 ກິໂລ ໃນນັ້ນຊີ້ນ 4,7 ລ້ານກວ່າກິ ໂລ, ໄຂ່ 7 ແສນກວ່າກິໂລ ແລະ ປາ 6 ແສນກວ່າກິໂລ, ນອກນັ້ນ ທາງພະແນກກະສິກໍາ ແລະປ່າໄມ້ໃນນາມຜູ້ເປັນໃຈກາງໃນການຊຸກ ຍູ້, ຕິດຕາມການຜະລິດດ້ານກະສິ ກຳຂອງຜູ້ປະກອບການ ແລະປະຊາຊົນກໍ່ໄດ້ປະສານເພື່ອກຽມ ຄວາມພ້ອມໃນການສະໜອງຊີ້ນ, ປາໃນໄລຍະເດືອນ 4-7 ປີ 2020.

  ສຳລັບການຄໍ້າປະກັນສະບຽງອາຫານໃນທົ່ວແຂວງສາລະວັນ ແມ່ນມີຄວາມພຽງພໍ ໂດຍໄດ້ປະເມີນຈາກພື້ນຖານການຜະລິດຂອງ ຜູ້ປະກອບ, ປະຊາຊົນແມ່ນມີຫຼາຍ ສົມຄວນທີ່ຈະຮອງຮັບເປັນຕົ້ນ: ມີຟຣາມໝູ 27 ແຫ່ງ, ມີໝູທັງໝົດ 4.744 ໂຕ, ຄອບຄົວລ້ຽງປາ 3 ຄອບຄົວ ທີ່ສາມາດສະໜອງປາໄດ້ 700-1.000 ກິໂລຕໍ່ມື້, ນອກນັ້ນປະຊາຊົນຍັງໄດ້ລ້ຽງສັດແບບ ເປັນຟຣາມ ແລະລ້ຽງທົ່ວໄປມີສັດທັງໝົດ 3,6 ລ້ານກວ່າໂຕ, ໃນນັ້ນ ຄວາຍ 94 ພັນກວ່າໂຕ, ງົວ 132 ພັນກວ່າກໂຕ, ໝູ 673.550 ໂຕ,ແບ້ 36 ພັນກວ່າໂຕ, ສັດປີ 2,6 ລ້ານກວ່າໂຕ ແລະໜອງປາ 6.678 ໜອງ ໃນເນື້ອທີ 737 ເຮັກຕາ, ຊຶ່ງ ນອກຈາກການຜະລິດເປັນສິນຄ້າ ແລ້ວປະຊາຊົນໃນແຕ່ລະທ້ອງຖີ່ນທົ່ວແຂວງແມ່ນມີພື້ນຖານການ ປູກ-ການລ້ຽງທີ່ເຂັ້ມແຂງ ແລະ ກຸ້ມກິນຢູ່ແລ້ວເປັນຈຳນວນຫຼາຍ ເປັນຕົ້ນ: ການປູກພືດຜັກສວນຄົວ, ການລ້ຽງສັດນ້ອຍເຊັ່ນ: ໝູ, ເປັດ, ໄກ່ ແລະອື່ນໆ ທີ່ເຂົາເຈົ້າສາມາດແກ້ໄຂຊີວິດການເປັນຢູ່ໄດ້ດີສົມຄວນ.

 ໃນຕອນທ້າຍທ່ານ ກິພະຈັນ ໂພສາລີ ຮອງຫົວໜ້າພະແນກກະສິກຳ ແລະປ່າໄມ້ແຂວງຍັງໄດ້ຮຽກຮ້ອງມາຍັງພໍ່ແມ່ປະຊາຊົນ, ຜູ້ປະກອບການ, ຜູ້ທຳຜະລິດກະສິກຳຈົ່ງພ້ອມໃຈກັນສືບຕໍ່ສຸມໃສ່ໃນການຜະລິດໃຫ້ຫຼາຍຂຶ້ນ ແລະທຸກໆຄອບຄົວໃຫ້ກຸ້ມກິນ ຊຶ່ງຈະເປັນການຫຼຸດຜ່ອນຄ່າໃຊ້ຈ່າຍພາຍໃນຄອບຄົວ, ພັກ ແລະລັດຖະບານ ກໍ່ໄດ້ສົ່ງເສີມ ແລະອຳນວຍຄວາມສະດວກໃຫ້ ແກ່ຜູ້ທຳການຜະລິດໃນດ້ານກະສິກຳທຸກດ້ານ, ເປັນປົກກະຕິຄຽງຄູ່ກັນນັ້ນກໍ່ຕ້ອງໄດ້ມີສະຕິ, ເຝົ້າລະວັງ ແລະຕິດຕາມຂໍ້ມູນຂ່າວສານ ເປັນປະຈຳ.

------

ໂດຍ: ວິໄລວອນ ສິດທິໄຊ

แชร์