ນັກສືກສາແຂວງອັດຕະປື ທີ່ກັບຈາກ ສສ ຫວຽດນາມ ໄດ້ກັບບ້ານແລ້ວ

  ນັກສຶກສາລາວທີ່ໄປສຶກສາຕໍ່ວິຊາຊີບທີ່ ສສ ຫວຽດນາມ ຊຸດທີ I ແລະ II ຈຳນວນ 80 ຄົນ, ພາຍຫຼັງຄົບກໍານົດໃນການຕິດຕາມສຸຂະພາບ ແລະຈຳກັດບໍລິເວນພາຍ ໃນ 14 ວັນ ມາຮອດປະຈຸບັນກໍໄດ້ຮັບການອະນຸຍາດກັບບ້ານ, ຢູ່ສູນກັກກັນໂຮງຮຽນປະຖົມເຊກອງ, ກອງເລຂາຄະນະສະເພາະກິດເພື່ອປ້ອງກັນ,ຄວບຄຸມ ແລະແກ້ໄຂການລະບາດພະຍາດໂຄວິດ-19 ໄດ້ອະນຸຍາດໃຫ້ນັກ ສຶກສາລາວທີ່ມາຈາກ ສສ ຫວຽດນາມ ຊຸດທີ I ຈຳນວນ 51 ຄົນ, ຍິງ 28 ຄົນ ຊຸດທີ II ຈຳນວນ 29 ຄົນ, ຍິງ 18 ຄົນ ລວມ 80 ຄົນ, ຍິງ 46 ຄົນ ສາມາດກັບບ້ານໄດ້ພາຍຫຼັງຜ່ານການຕິດຕາມສຸຂະພາບ ແລະຈຳກັດບໍລິເວນຄົບພາຍໃນ 14 ວັນ ຊຶ່ງນັກສຶກສາດັ່ງກ່າວແມ່ນໄດ້ເລີ່ມເຂົ້າຕິດຕາມສຸຂະພາບແຕ່ ວັນທີ 28 ແລະ 29 ມີນາ 2020 ແລະສໍາເລັດການຕິດຕາມອາການ ໃນວັນທີ 11-12 ເມສາ 2020, ຜ່ານການຕິດຕາມສຸຂະພາບພາຍໃນ 14 ວັນເຫັນວ່າພວກກ່ຽວແມ່ນບໍ່ມີອາການສະແດງໃດໆເຂົ້າກັບນິຍາມຂອງພະຍາດໂຄວິດ-19 (COVID-19)

 ດັ່ງນັ້ນ,ທາງພາກສ່ວນທີ່ກ່ຽວຂ້ອງຈຶ່ງໄດ້ອອກໃບຢັ້ງຢືນການຕິດຕາມຈຳກັດບໍລິເວນພາຍໃນ14 ໃຫ້ນ້ອງນັກສຶກສາທັງສອງຊຸດຊຶ່ງໃຫ້ກຽດມອບໂດຍທ່ານ ອິນປັນ ອິນທິລາດ ຫົວໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19.

  

  ນອກນັ້ນ, ທ່ານຍັງໄດ້ໂອ້ລົມກັບນ້ອງນັກສຶກສາຕື່ມວ່າ: ພາຍຫຼັງທີ່ໄດ້ຮັບອະນຸຍາດໃຫ້ກັບບ້ານແລ້ວໃຫ້ນ້ອງນັກສຶກສາໄປສືບຕໍ່ກັກກັນ ແລະຕິດຕາມສຸຂະພາບຂອງຕົນເອງຢູ່ນຳຄອບຄົວໃນໄລຍະ 7-14 ວັນຕື່ມອີກໂດຍປະຕິບັດຕາມຫຼັກການດຽວກັນກັບຄຳແນະນຳທີ່ໄດ້ປະຕິບັດຢູ່ຈຸດກັກກັນລວມສູນມາເຖິງປະຈຸບັນແມ່ນຍັງອີກ 3 ຄົນທີ່ຍັງຕ້ອງລໍຖ້າໃຫ້ຄົບກຳນົດກັກໂຕ 14 ວັນ ກ່ອນແລ້ວທາງພາກສ່ວນທີ່ກ່ຽວຂ້ອງຈຶ່ງຈະອະນຸຍາດໃຫ້ກັບບ້ານໄດ້.

__________

ຂຽນໂດຍ:  ບ ອັດຕະປື    

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์