ກາແດງຫຼວງພະບາງຍັງຕ້ອງການເລືອດ

  ກາແດງຢືນຢັນສູນເລືອດແຂວງຫຼວງພະບາງຍັງເຫຼືອເລືອດນ້ອຍເຕັມທີແລ້ວຍ້ອນໜ່ວຍງານກາແດງທີ່ລົງເຄື່ອນໄຫວຮັບບໍລິຈາກເລືອດຢູ່ຕາມສະຖາບັນການສຶກສາໂຮງຮຽນແຫ່ງຕ່າງໆອ້ອມຂ້າງແຂວງໄດ້ຢຸດຊົ່ວຄາວເນື່ອງຈາກຊ່ວງວິກິດການລະບາດຂອງເຊື້ອພະຍາດໂຄວິດ-19 ຈິ່ງຮຽກຮ້ອງໃຫ້ສັງຄົມຜູ້ທີ່ມີສຸຂະພາບແຂງແຮງໄປບໍລິຈາກເລືອດເພື່ອຊ່ວຍເຫຼືອເພື່ອນມະນຸດດ້ວຍກັນທີ່ສູນເລືອດແຂວງຫຼວງພະບາງໄດ້ທຸກວັນ.

 ທ່ານ ດຣ ວຽງສະຫວັນ ສຸກກະເສີມ ຫົວໜ້າອົງການກາແດງລາວ ແຂວງຫຼວງພະບາງ ໃຫ້ສໍາພາດຕໍ່ທີມຂ່າວໜັງສືພິມເສດຖະກິດ-ສັງຄົມພວກເຮົາວ່າງບໍ່ດົນນີ້ວ່າ: ຫາກເຊື້ອພະຍາດໂຄວິດຍັງສຶບຕໍ່ແຜ່ລະບາດໂຮງໝໍຕ້ອງຂາດເລືອດແນ່ນອນແລະເປັນຫ່ວງຄົນເຈັບທີ່ມາເຂົ້ານອນຢູ່ໂຮງໝໍຫາກຕ້ອງການເລືອດໃສ່ເພາະວ່າປະຈຸບັນນີ້ ຢູ່ສູນເລືອດເຫຼືອພຽງ 23 ຖົງ, ໃນນັ້ນເລືອດໜວດ AB ບໍ່ມີຈັກຖົງເພາະໜວດເລືອດນີ້ມີຄວາມຈໍາເປັນຍິ່ງຫາກຄົນເຈັບເກີດມີອາການເລືອດໄຫຼບໍ່ຢຸດສະນັ້ນຫາກຄົນເຈັບທີ່ມາໂຮງໝໍໃນຊ່ວງໂຄວິດ-19 ນີ້ ແມ່ນໃຫ້ເອົາພີ່ນ້ອງມານໍາເພື່ອກໍລະນີຫາກມີການຊົມໃຊ້ເລືອດໜວດດັ່ງກ່າວແລະຫາກຜູ້ໃດທີ່ມີຈິດໃຈຢາກບໍລິຈາກເລືອດແມ່ນໃຫ້ໄປບໍລິຈາກເລືອດຢູ່ທີ່ສູນເລືອດໂຮງໝໍແຂວງພ້ອມນີ້ທາງສູນບໍລິຈາກເລືອດຍັງຮັບປະກັນຄວາມປອດໄພການຕິດເຊື້ອໂຄວິດ-19 ໂດຍທາງສູນເລືອດຈະມີເຄື່ອງຮອງຮັບຊີດພົ່ນຂ້າເຊື້ອໃຫ້ທຸກຄົນກ່ອນເຂົ້າຫ້ອງບໍລິຈາກເລືອດ.

  ທ່ານກ່າວຕື່ມອີກວ່າ: ສໍາລັບຜູ້ໃດທີ່ຢາກບໍລິຈາກເລືອດແຕ່ຍ້ອນຄວາມບໍ່ສະດວກໃນການເດີນທາງໄປໃຫ້ບໍລິຈາກແມ່ນໃຫ້ຕິດຕໍ່ຫາທາງສູນເລືອດຂອງໜ່ວຍກາແດງ ແຂວງຫຼວງພະບາງ ພຽງທ່ານບອກບ່ອນຢູ່ບ້ານ, ເມືອງໃດເທົ່ານັ້ນທາງທີມງານຮັບບໍລິຈາກເລືອດກາແດງຈະເປັນທີມໄປຫາເຖິງທີ່ເລີຍ.

_____________

ຂຽນໂດຍ: ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์