ພິດໂຄວິດ-19 ອາດດຶງດູດເສດຖະກິດລາວຫຼຸດມາຢູ່ 3,3% ໃນປີນີ້ພາກທ່ອງທ່ຽວກະທົບໜັກສຸດ ຄາດມູນຄ່າເສຍຫາຍກາຍ 3 ພັນຕື້ກີບ

  ສະພາບການແຜ່ລະບາດຂອງພະຍາດໂຄວິດ-19 ໄດ້ສ້າງຜົນເສຍຫາຍຢ່າງໃຫຍ່ຫຼວງໃຫ້ກັບຊີວິດ ແລະສຸຂະພາບຂອງປະຊາຄົມໂລກສະເພາະ ສປປ ລາວ ກໍມີການລະບາດຍັງບໍ່ທັນມີຜູ້ເສຍຊີວິດແຕ່ທຸກໆຂະແໜງການຖືກກະທົບເປັນອຳມະພາດຊົ່ວຄາວສົ່ງຜົນໃຫ້ລະບົບເສດຖະກິດຂອງປະເທດເສຍຫາຍຢ່າງຫຼີກລຽງບໍ່ໄດ້ຢ່າງໃດກໍ ຕາມຈາກຜົນຄວາມເສຍດັ່ງກ່າວສະຖາບັນຄົ້ນຄວ້າແຫ່ງຊາດຄາດຄະເນເສດຖະກິດລາວໃນປີນີ້ຈະຫຍາຍຕົວພຽງແຕ່ 3,3% ຊຶ່ງຫຼຸດ ລົງເກືອບເຄິ່ງໜຶ່ງຂອງປີກ່ອນ ແລະຕໍ່າກວ່າທີ່ຄາດໄວ້ເບື້ອງຕົ້ນ 4,5% ທັງນີ້ເຫັນວ່າທ່ອງທ່ຽວເປັນຂະແໜງການທຳອິດ ແລະໜັກກວ່າຂະແໜງການອື່ນທີ່ຮັບຜົນກະທົບຈາກວິດກິດໃນຄັ້ງນີ້.

  ທ່ານ ລີເບີ ລີບົວປາວ ຮັກສາການຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມ ໃນວັນທີ 20 ເມສານີ້ວ່າ: ຜົນ ກະທົບທາງດ້ານເສດຖະກິດໄລຍະສັ້ນທີ່ປະເທດເຮົາຈະເຫັນຢ່າງຊັດເຈນແມ່ນການສູນເສຍລາຍຮັບໃນດ້ານຕ່າງຂອງປະເທດເປັນຕົ້ນແມ່ນດ້ານການທ່ອງທ່ຽວ, ການສົ່ງອອກ ແລະ ລາຍຮັບຕ່າງໆ ທີ່ລັດຖະບານຄວນຈະໄດ້ຮັບຈາກກິດຈະກຳທາງດ້ານເສດຖະກິດທີ່ມີທ່າອ່ຽງເຕີບໂຕຊ້າລົງຊຶ່ງສ່ວນໜຶ່ງແມ່ນຈາກການປະຕິບັດມາດຕະການປິດກິດຈະການທຸລະກິດໂດຍທັງໝົດເຫຼົ່ານີ້ລ້ວນແລ້ວແຕ່ມີຜົນເຮັດໃຫ້ການເຕີບໂຕຂອງເສດຖະກິດໃນປີ 2020 ຫົດຖອຍລົງຢ່າງຫຼີກລຽງບໍ່ໄດ້.

  ນອກຈາກນັ້ນຜົນກະທົບໄລຍະສັ້ນທີ່ສຳຄັນທີ່ສຸດແມ່ນຕໍ່ຊີວິດການເປັນຢູ່ຂອງປະຊາຊົນກໍຄືກະທົບຕໍ່ກະແສລາຍຮັບຂອງຜູ້ອອກແຮງງານໃນປະເທດໃນສະພາບເສດຖະ ກິດຝືດເຄືອງ, ຫົວໜ່ວຍທຸລະກິດບໍ່ສາມາດດຳເນີນກິດຈະການໄດ້ເຕັມທີ່ ຫຼືຕ້ອງຢຸດກິດຈະການຊົ່ວຄາວຍ້ອນມາດຕະການປ້ອງກັນການແຜ່ລະບາດຂອງພະຍາດຈາກສະພານການດັ່ງກ່າວຫາກສືບຕໍ່ແກ່ຍາວພາກທຸລະກິດອາດບໍ່ສາມາດແບກຫາບພາລະຕໍ່ໄປໄດ້ອີກຈຳເປັນຕ້ອງຢຸດຈ່າຍເງິນເດືອນ ແລະເລີກຈ້າງ.

  ທັງນີ້ທ່ານ ລີເບີ ລີບົວປາວ ເຫັນວ່າ: ຊີວິດວິດການເປັນຢູ່ຂອງປະຊາຊົນຈະມີຄວາມຫຍຸ້ງຍາກຫຼາຍຂຶ້ນໂດຍສະເພາະກຸ່ມຄົນຫາເຊົ້າກິນຄໍ່າ, ອາໄສແຮງງານຮັບຈ້າງລາຍວັນທີ່ດຳລົງຊິວິດໃນຕົວເມືອງຜົນກະທົບຕາມມາຈະເຮັດໃຫ້ເຂົາເຈົ້າຂາດລາຍຮັບບໍ່ມີເງິນຊື້ອາຫານ, ຄ່າເຊົ່າຫ້ອງຍ້ອນບໍ່ມີວຽກເຮັດ, ມີຄວາມສ່ຽງການເປັນຄົນເລ້ ລ້ອນພະເນຈອນອາໄສນອນຕາມສະຖານທີ່ຕ່າງໆ ແລະສ້າງປາກົດການຫຍໍ້ທໍ້ຕ່າງໆໃນສັງຄົມທີ່ລັດ ແລະສັງຄົມຕ້ອງຮີບຮ້ອນແກ້ໄຂ.

   ຢ່າງໃດກໍຕາມສຳລັບທຸລະກິດທ່ອງທ່ຽວແມ່ນຂະແຫນງການທຳອິດ ແລະ ໄດ້ຮັບຜົນກະທົບໜັກຫນ່ວງກວ່າຂະແໜງການອື່ນໆ ວິສາຫະກິດທີ່ຕິດພັນກັບວຽກງານກ່ານທ່ອງທ່ຽວ ແລະບໍລິການລວມມີວິສາຫະກິດທ່ອງທ່ຽວ, ທີ່ພັກອາໄສ, ຮ້ານອາຫານ ແລະເຄື່ອງດື່ມ, ການບັນເທີງ,ການຂົນສົ່ງໂດຍສານ, ການສຶກສາ ແລະການບໍລິການອື່ນໆ ຊຶ່ງຖືກກະທົບໂດຍກົງຈາກມາດຕະການປະເທດຄູ່ຄ້າ ແລະມາດຕະການພາຍໃນໃນນັ້ນແຂວງທີ່ໄດ້ຮັບຜົນກະທົບຫຼາຍກວ່າໝູ່ແມ່ນນະ ຄອນຫຼວງວຽງຈັນ ແລະແຂວງຫຼວງພະບາງ ທີ່ມີຈຳນວນວິສາຫະກິດຫຼາຍກວ່າ 5 ພັນວິສາຫະກິດ ແລະ 2 ແຂວງດັ່ງກ່າວເປັນຈຸດສູນກາງການທ່ອງທ່ຽວ, ມີຖ້ຽວບິນຈາກຕ່າງປະເທດຈຳນວນຫຼາຍ ແລະເປັນ 2 ແຂວງທຳອິດທີ່ພົບການຕິດເຊື້ອ.

  ທ່ານຮັກສາການຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດຢ້ຳວ່າ: ຈາກຜົນກະທົບໃນຂະແໜງການດັ່ງກ່າວຄາດວ່າ ສປປ ລາວ ຈະສູນເສຍລາຍຮັບຈາກການທ່ອງທ່ຽວບໍ່ຫຼຸດ 350 ລ້ານໂລລາ ຫຼືປະມານ 3.111,5 ຕື້ກີບ ແລະ ຂະແໜງການທ່ອງທ່ຽວຂະແໜງການດຽວອາດເຮັດໃຫ້ລວມຍອດຜະລິດຕະພັນພາຍໃນ ຫຼື GDP ຂະຫຍາຍຕົວຊ້າລົງໄດ້ເກືອບ -2%

__________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์