ລັດເລັ່ງວາງນະໂຍບາຍຫຼຸດຜ່ອນຜົນກະທົບຈາກພະຍາດໂຄວິດ-19

 ຂປລ. ລັດຖະບານ ແຫ່ງ ສປປ ລາວ ໄດ້ເລັ່ງຄົ້ນຄວ້າ ແລະກຳນົດບັນດານະໂຍບາຍທາງດ້ານເສດຖະກິດທີ່ໄດ້ວາງອອກກ່ອນໜ້ານີ້ໃຫ້ມີຄວາມແທດເໝາະກັບສະພາບຕົວຈິງເພື່ອຫຼຸດຜ່ອນຜົນກະທົບຕໍ່ເສດຖະກິດຂອງລາວຈາກການລະບາດຂອງພະຍາດໂຄວິດ-19 ຊຶ່ງປະຈຸບັນນະໂຍບາຍນີ້ສ່ວນຫຼາຍແມ່ນກໍາລັງຈັດຕັ້ງປະຕິບັດ ແລະມີຈຳນວນໜຶ່ງຢູ່ໃນຂັ້ນຕອນການຄົ້ນຄວ້າພິຈາລະນາ, ຫຼ້າສຸດໄດ້ນຳສະເໜີໃນກອງປະຊຸມຂອງຄະນະສະເພາະກິດດ້ານເສດຖະກິດເພື່ອແກ້ໄຂຜົນກະທົບການລະບາດພະຍາດໂຄວິດ-19 ໃນວັນທີ 20 ເມສາ 2020 ທີ່ນະ ຄອນຫຼວງວຽງຈັນ ເພື່ອພ້ອມກັນຄົ້ນຄວ້າ ແລະປັບປຸງຄືນໃໝ່ອີກຮອບແນໃສ່ໃຫ້ມີຄວາມເໝາະສົມກວ່າເກົ່າ ແລະຈັດຕັ້ງປະຕິບັດຢ່າງມີປະສິດທິພາບ.

  ບັນດານະໂຍບາຍດັ່ງກ່າວປະກອບມີ: ຍົກເວັ້ນການເກັບອາກອນລາຍໄດ້ຈາກເງິນເດືອນຂອງຜູ້ອອກແຮງງານທັງໝົດທັງພາກລັດ ແລະເອກະຊົນທີ່ມີລາຍຮັບ 5 ລ້ານກີບລົງມາໃນໄລຍະເວລາ 3 ເດືອນ (ເມສາ, ພຶດສະພາ, ມິຖຸນາ 2020); ຍົກເວັ້ນການເກັບອາກອນລາຍໄດ້ຂອງຈຸນລະວິສາຫະກິດຕາມທີ່ກຳນົດໄວ້ໃນມາດຕາ 29 ຂໍ້ 2 ຂອງກົດໝາຍວ່າດ້ວຍອາກອນລາຍໄດ້ສະບັບເລກທີ 67/ສພຊ, ລົງວັນທີ 18 ມິຖຸນາ 2019 ເປັນໄລຍະເວລາ 3 ເດືອນ (ເມສາ,ພຶດສະພາ,ມິຖຸນາ 2020), ຍົກເວັ້ນພາສີ-ອາກອນ ແລະຄ່າທຳນຽມຕ່າງໆໃນການນຳເຂົ້າສິນຄ້າທຸກປະເພດທີ່ນຳໃຊ້ເຂົ້າໃນວຽກງານສະກັດກັ້ນ, ກັນການລະບາດ ແລະກຽມຄວາມພ້ອມຮອບດ້ານ ຂະນະດຽວ ກັນ ກໍໃຫ້ເລື່ອນການຊໍາລະພັນທະອາ ການຂອງຜູ້ປະກອບການທຸລະກິດບໍລິການທ່ອງທ່ຽວເປັນໄລຍະເວລາ 3 ເດືອນ ເລີ່ມແຕ່ເດືອນເມສາ 2020 ເປັນຕົ້ນໄປ; ຕໍ່ເວລາການສົ່ງເອກະສານລາຍງານການເງິນ ແລະພັກການເຄື່ອນໄຫວວຽກງານປະຈຳປີ 2019 ຂອງວິສາຫະກິດຈາກ 31 ມີນາ 2020 ໄປເປັນ 30 ເມ ສາ 2020 ແລະຕໍ່ເວລາການຊຳລະຄ່າທຳນຽມທາງຈາກວັນທີ 31 ມີນາ ມາເປັນ 30 ມິຖຸນາ 2020.

  ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນໄດ້ເນັ້ນໃຫ້ໃຫ້ມີການຄົ້ນຄວ້າຜ່ອນຜັນລາຄາຕໍ່ເວລາໃນການຊຳ ລະຄ່າໄຟຟ້າ ແລະນ້ຳປະປາຂອງຜູ້ຊົມໃຊ້ຄົວເຮືອນ ແລະພາກທຸລະກິດ; ພ້ອມທັງເຫັນດີໃຫ້ທະນາຄານ ແຫ່ງ ສປປ ລາວ ປະຕິບັດການປັບຫຼຸດອັດຕາດອກເບ້ຍພື້ນ ຖານ ແລະຫຼຸດອັດຕາ ສ່ວນເງິນແຮຝາກບັງຄັບຂອງທະນາຄານທຸລະກິດລົງຕາມຄວາມເໝາະສົມໃນແຕ່ລະໄລຍະ, ເຫັນດີໃຫ້ທະນາຄານ ແຫ່ງ ສປປ ລາວ ກຳນົດໃຫ້ບັນດາທະນາຄານທຸລະກິດປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກການລະບາດຂອງພະຍາດໂຄວິດ-19 ເປັນຕົ້ນ: ນະໂຍບານການເລື່ອນເວລາຊຳລະຕົ້ນທຶນ ແລະດອກເບ້ຍ, ປັບຫຼຸດອັດຕາດອກເບັ້ຍ, ສະໜອງເງິນກູ້ບ້ວງໃໝ່ໃຫ້ບັນດາຫົວໜ່ວຍທຸລະກິດ, ການປັບໂຄງສ້າງໜີ້, ການຈັດຊັ້ນໜີ້ ແລະ ອື່ນໆ ຕາມທີ່ກຳນົດໄວ້ໃນຂໍ້ຕົກລົງສະບັບເລກທີ 238/ທຫລ ລົງວັນທີ 26 ມີນາ 2020 ແລະເລື່ອນການຊຳລະພັນທະການປະກອບສ່ວນປະກັນສັງຄົມແບບບັງຄັບຂອງຫົວໜ່ວຍທຸລະ ກິດທີ່ໄດ້ຮັບຜົນກະທົບເປັນໄລຍະເວລາ 3 ເດືອນເຊັ່ນກັນ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์