ການຄ້າຫຼວງພະບາງຢືນຢັນລາຄາສິນຄ້າຄືນສູ່ປົກກະຕີ

 ພະແນກອຸດສາຫະກຳ ແລະ ການຄ້າແຂວງຫຼວງພະບາງໄດ້ສືບຕໍ່ເຄື່ອນໄຫວຕິດຕາມກວດກາລາຄາສິນຄ້າຕາມທ້ອງຕະຫຼາດ ແລະ ຫ້າງຮ້ານພາຍໃນແຂວງໃນວັນທີ 14 ເມສາ 2020 ນີ້ ໂດຍປະຕິບັດຕາມຄຳສັ່ງແນະນຳຂອງທ່ານເຈົ້າແຂວງວ່າດ້ວຍການຜັນຂະຫຍາຍຄຳສັ່ງຂອງທ່ານນາຍົກລັດຖະມົນຕີ ແຫ່ງ ສປປ ລາວ ວ່າດ້ວຍການກຽມພ້ອມຮອບດ້ານເພື່ອຕ້ານພະຍາດໂຄວິດ-19 ຊຶ່ງມອບໃຫ້ພະແນກອຸດສາຫະກໍາ ແລະການຄ້າແຂວງເອົາໃຈໃສ່ຢ່າງໃກ້ຊິດໃນການຕິດຕາມ ແລະ ກວດກາສິນ ຄ້າໃນທ້ອງຕະຫຼາດເພື່ອບໍ່ໃຫ້ມີການສວຍໂອກາດຂຶ້ນລາຄາສິນຄ້າ, ມາຮອດປະຈຸບັນນີ້ລາຄາສິນຄ້າແມ່ນຢູ່ໃນເກນປົກກະຕິແລ້ວ.

  ທ່ານ ສໍານານ ສົນທະນີ ຫົວໜ້າພະ ແນກອຸດສາຫະກໍາ ແລະການຄ້າແຂວງຫຼວງພະບາງໃຫ້ສໍາພາດຕອນລົງພື້ນທີ່ຕະຫຼາດໂພສີນະຄອນຫຼວງພະບາງໃຫ້ສໍາພາດທີມຂ່າວເສດຖະກິດ-ສັງຄົມພວກເຮົາວ່າ: ຫຼັງຈາກທີ່ຂັ້ນເທິງໄດ້ອອກແຈ້ງການໃຫ້ທາງພະແນກອຸດສາຫະກໍາ ແລະການຄ້າແຂວງໄດ້ສົມທົບກັບການຄ້ານະຄອນຫຼວງພະບາງຮ່ວມກັບໜ່ວຍງານທີ່ກ່ຽວຂ້ອງກໍໄດ້ເລີ່ມລົງກວດກາເຊົ້າ-ແລງນັບແຕ່ວັນທີ 30 ມີນາ ເປັນຕົ້ນມາເພື່ອຄວບຄຸມ,ຄຸ້ມຄອງສິນຄ້າເຄື່ອງອຸປະໂພກ, ບໍລິໂພກຍ້ອນຫາງ ສຽງຈາກສັງຄົມ ວ່າແມ່ຄ້າໄດ້ສວຍໃຊ້ ຊ່ວງວິກິດເປັນໂອກາດໂດຍກັກຕຸນສິນຄ້າປະເພດສະບຽງອາຫານ ແລະອຸປະກອນການແພດປ້ອງກັນພະຍາດເຊັ່ນ: ຜ້າ ປິດປາກ-ດັງ, ເຈວລ້າງມື, ນ້ຳຢາຂ້າເຊື້ອ ແລະສິນຄ້າອື່ນໆ.

  ສະນັ້ນພະແນກອຸດສາຫະກໍາ ແລະການຄ້າໄດ້ລົງເຄື່ອນໄຫວຕິດຕາມ, ກວດກາບັນດາຕະຫຼາດ, ຫ້າງຮ້ານພາຍໃນແຂວງໃນຄັ້ງນີ້ແມ່ນໄດ້ມີການກວດກາສິນຄ້າຂາຍເກີນລາຄາ ແລະເຄື່ອນໄຫວຕິດຕາມຊຸກຍູ້ຜູ້ປະກອບການຄ້າຂາຍສິນຄ້າອຸປະໂພກ-ບໍລິໂພກ ໂດຍສະເພາະແມ່ນເຂົ້າສານ, ຊີ້ນ, ປາ, ຜັກ ໝາກໄມ້ສົດ, ອາຫານແຫ້ງ ແລະຜ້າອັດປາກຢູ່ຕະຫຼາດໂພສີ, ຕະຫຼາດຊຸມຊົນ ແລະຮ້ານຄ້າຕາມເສັ້ນທາງທົ່ວແຂວງຫຼວງພະບາງໃຫ້ປະຕິບັດຕາມຄໍາສັ່ງຂອງຄະນະພັກ-ຂັ້ນເທິງເວົ້າລວມ, ເວົ້າສະເພາະແມ່ນຄໍາສັ່ງຂອງກະຊວງອຸດສາຫະກຳ ແລະ ການຄ້າກໍ່ຄືຄໍາສັ່ງຂອງຄະນະພັກ-ອົງການປົກຄອງແຂວງກ່ຽວກັບການຄຸ້ມຄອງລາຄາສິນຄ້າ ແລະ ຄ່າບໍລິການ. ພ້ອມນີ້, ເຈົ້າໜ້າທີ່ກວດກາການຄ້າພະແນກອຸດສາຫະກໍາ ແລະການຄ້າແຂວງຫຼວງພະບາງກໍ່ໄດ້ແນະນໍາໃຫ້ຜູ້ຄ້າຂາຍເຄື່ອງອຸປະໂພກ-ບໍລິໂພກໃຫ້ຕິດປ້າຍລາຄາສິນ ຄ້າຂອງຕົນ, ບໍ່ໃຫ້ຂາຍເກີນລາຄາທີ່ກໍານົດໄວ້ຖ້າບຸກຄົນ ຫຼືຮ້ານໃດຝ່າຝືນເວລາເຈົ້າໜ້າທີ່ກວດເຫັນຈະມີການດໍາເນີນຕາມມາດຕະການທີ່ກໍານົດອອກ.

  ດ້ານ ທ່ານ ຈັນທະພອນ ປັນຍາສະຫວັດ ຮອງຫົວໜ້າຂະແໜງການຄ້າພາຍໃນແຂວງຜູ້ປະຕິບັດຕົວຈິງລົງພື້ນ ທີ່ແຕ່ລະຮ້ານກ່າວວ່າ: ຜ່ານການລົງປະຕິບັດຕົວຈິງຢູ່ພາກສະໜາມກໍເຫັນວ່າມີຂໍ້ສະດວກ ແລະຂໍ້ຫຍຸ້ງຍາກຕໍ່ກັບສິນຄ້າ ໃນທ້ອງຕະຫຼາດແຕ່ໂດຍລວມແລ້ວສິນຄ້າຢູ່ຕະຫຼາດນັບແຕ່ລົງກວດກາແຕ່ລະມື້ແມ່ນຢູ່ໃນລາຄາປົກກະຕິແລ້ວ ແລະໃນວັນດຽວກັນພະແນກອຸດສາຫະກຳແລະການຄ້າແຂວງຍັງໄດ້ມອບເຄື່ອງຊ່ວຍເຫຼືອເຂົ້າໃນການປ້ອງກັນຕ້ານພະຍາດໂຄວິດ-19 ໃຫ້ສູນປະຕິບັດການເຟົ້າລະວັງການແຜ່ລະບາດຂອງເຊື້ອໂຄວິດຢູ່ທີ່ພະແນກສາທາລະນະສຸກແຂວງອຸປະກອນທີ່ນໍາມາຊ່ວຍເຫຼືອປະກອບມີຜ້າປິດປາກ,ເຈວລ້າງມື ແລະເງິນສົດຈໍານວນໜຶ່ງ.

__________

ຂຽນໂດຍ:  ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์