ປະເມີນຄວາມຄືບໜ້າໂຄງການ ຈີເອັມເອັສ ຢູ່ສະຫວັນນະເຂດ

     ໃນອາທິດຜ່ານມານີ້ ແຂວງສະຫວັນນະເຂດໄດ້ຈັດກອງປະຊຸມຄະນະຊີ້ນຳໂຄງການເພື່ອສະຫຼຸບລາຍງານການຈັດຕັ້ງປະຕິບັດໂຄງການປະຈຳປີ 2018 ແລະການວາງແຜນການຈັດຕັ້ງປະຕິບັດໃນສົກປີ 2019 ສຳລັບໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນ້ຳຂອງ (GMS) ເງິນກູ້ຢືມ ເລກທີ 2931 ແລະເງິນຊ່ວຍເຫຼືອລ້າເລກທີ 0313/0314, ເລກທີ 9173 (JFPR) ໂດຍການເປັນປະທານຂອງທ່ານ ທ່ອນແກ້ວພຸດທະໄກຍະລາດຮອງເຈົ້າແຂວງສະຫວັນນະເຂດປະທານຊີ້ນຳໂຄງການ GMS, ມີຄະນະຊີ້ນຳໂຄງການຂັ້ນສູນ ກາງ, ແຂວງ, ເມືອງ, ບັນດາຊ່ຽວ ຊານໂຄງການ, ທີ່ປຶກສາໂຄງການຕະຫຼອດຮອດວິຊາການກ່ຽວຂ້ອງເຂົ້າຮ່ວມ.

  ທ່ານ ພົມມາ ວົງພະຈິດ ຫົວໜ້າໂຄງການ GMS ໄດ້ລາຍງານໃຫ້ຮູ້ກ່ຽວກັບຄວາມເປັນມາຂອງໂຄງການພ້ອມທັງໄດ້ລາຍງານໃຫ້ຮູ້ເຖິງຄວາມຄືບໜ້າການກໍ່ ສ້າງ 6 ໂຄງການຍ່ອຍໂດຍສັງເຂບຊຶ່ງໄດ້ໃຫ້ຮູ້ວ່າ: ມາຮອດປະຈຸບັນ, ທາງໂຄງການໄດ້ສຳເລັດການສ້າງແຜນຍຸດທະສາດການພັດທະນາເສດຖະກິດ-ສັງ ຄົມທ້ອງ ຖິ່ນ ແລະພັດທະນາຂີດຄວາມສາມາດບຸກຄະລາກອນໄດ້ສຳເລັດແລ້ວ 100% ສ່ວນການຈັດຕັ້ງ ປະຕິບັດໜ້າວຽກຕ່າງໆໃນ 7 ໂຄງການຍ່ອຍແມ່ນມີຄວາມຄືບໜ້າແລ້ວປະມານ 40,8% ຂອງແຜນການໃນນີ້: ສຳລັບໂຄງການກໍ່ສ້າງຖະໜົນໄກສອນ ພົມວິຫານ ປະຕິບັດສຳເລັດແລ້ວ 40 ,1%, ທາງຟ້າງຸ່ມ, ຄືບໜ້າ 47%, ທາງແດນສະຫວັນສຳເລັດເກືອບ 54%, ທາງເມືອງພີນສຳເລັດ 52,6%, ການຈັດສັນຂີ້ເຫຍື້ອບ້ານຊອກປະຕິບັດໄດ້ເກືອບ 21%, ການສ້າງຮ່ອງລະບາຍນ້ຳຫ້ວຍລົງກົງມີຄວາມຄືບໜ້າ 8,2%. ສຳລັບທິດທາງແຜນການໃນຕໍ່ໜ້ານີ້, ທາງໄກສອນ ພົມວິຫານ ວຽກປູຢາງອາສຟານຈະໃຫ້ສຳເລັດໃນວັນທີ 31 ພຶດສະພາປີນີ້, ທາງຟ້າງຸ່ມວຽກປູຢາງອາສຟານຈະໃຫ້ສຳເລັດໃນວັນທີ 30 ເມສານີ້, ທາງແດນສະຫວັນວຽກປູຢາງ 2 ຊັ້ນຈະໃຫ້ສຳເລັດວັນທີ 15 ພຶດສະພາ 2019, ທາງເມືອງພີນ ວຽກປູຢາງຈະໃຫ້ສຳເລັດວັນທີ 31 ພຶດສາະພາ, ການກໍ່ສ້າງຮ່ອງລະບາຍນ້ຳຫ້ວຍລົງກົງໃນວຽກ ເຮືອນປ້ຳສູບນ້ຳຈະໃຫ້ສຳເລັດ ວັນທີ 31 ທັນວາ 2019  ແລະ ວຽກຮ່ອງລະບາຍນ້ຳຈະໃຫ້ສຳ ເລັດວັນທີ 28 ກຸມພາ 2020, ການກໍ່ສ້າງສະໜາມຂີ້ເຫຍື້ອບ້ານຊອກວຽກກໍ່ສ້າງຂຸມຖິ້ມຂີ້ເຫຍື້ອ ແລະອາຄານ 4 ຫຼັງຈະໃຫ້ສຳເລັດ 31 ທັນວາ 2019 ສ່ວນການກໍ່ສ້າງຕາຝັ່ງເຈື່ອນແຄມຂອງໃນນີ້ວຽກຈ່າຍເງິນໃຫ້ຜູ້ຖືກຜົນກະທົບຈະໃຫ້ສຳເລັດໃນວັນທີ 28 ກຸມພາ 2019 ແລະຈະເລີ່ມວຽກກໍ່ສ້າງເດືອນມີນາ 2019 ສ່ວນວຽກອື່ນໆໃນແຕ່ລະໂຄງການຍ່ອຍແມ່ນຈະໃຫ້ສຳເລັດຕາມແຜນການ.

  ຫົວໜ້າໂຄງການ GMS ໃຫ້ ຮູ້ຕື່ມອີກວ່າ: ສຳລັບເຫດຜົນທີ່ເຮັດໃຫ້ການຈັດຕັ້ງປະຕິບັດໂຄງການມີຄວາມຊັກຊ້າກໍ່ຍ້ອນວ່າການຈັດຫາທີ່ປຶກສາໃນການຄຸມງານກໍ່ສ້າງບໍ່ໄດ້ຕາມແຜນບວກກັບພາຍຫຼັງທີ່ໄດ້ເຊັນສັນຍາການກໍ່ສ້າງແມ່ນເຂົ້າຊ່ວງລະດູຝົນຈາກນີ້, ໃນກອງປະຊຸມຍັງໄດ້ມີການປຶກສາຫາລືໃນບັນຫາສຳຄັນອື່ນໆເປັນຕົ້ນ: ສະເໜີປ່ຽນແປງໜ້າວຽກຍ່ອຍ, ດອນກາງທາງໄກສອນ ພົມວິຫານ ແລະທາງເລືອກໃນການບໍລິຫານ ແລະຄຸ້ມຄອງສະໜາມຂີ້ເຫຍື້ອ ທັງນີ້ກໍ່ເພື່ອສ້າງເປັນຄວາມເອກະພາບຮ່ວມກັນໃນການຈັດຕັ້ງປະຕິບັດໂຄງການໃນຕໍ່ໜ້າທັງເຮັດໃຫ້ການຈັດຕັ້ງປະຕິບັດໂຄງການມີປະສິດທິພາບ ແລະປະສິດທິຜົນດີຂຶ້ນໄປເລື້ອຍໆ.

แชร์