ປີໃໝ່ລາວປີນີ້ບໍ່ໄດ້ສະຫຼອງແຕ່ມີຜູ້ເສຍຊີວິດຈາກອຸບັດເຫດ 15 ຄົນ

  ປີໃໝ່ລາວຖືເປັນບຸນໃຫຍ່ຂອງຊາດລາວທີ່ສືບທອດນັບຖືກັນມາເຖິງປີນີ້ພັກ-ລັດຈະໂຈະບໍ່ໃຫ້ສະເຫຼີມສະຫຼອງຍ້ອນພະຍາດໂຄວິດ-19 ກໍ່ຕາມແຕ່ຍັງມີຈຳນວນໜຶ່ງໄດ້ມີການພົບປະສັງສັນເຮັດໃຫ້ຍັງມີອຸບັດເຫດເກີດຂຶ້ນໂດຍພຽງ 4 ວັນ ທົ່ວປະເທດມີອຸບັດເຫດເກີດຂຶ້ນ 63 ລາຍ ເສຍຊີວິດ 15 ຄົນ.

  ຕາມການລາຍງານຂອງກົມຕຳຫຼວດຈະລາຈອນກົມໃຫຍ່ຕຳຫຼວດກະຊວງປ້ອງກັນຄວາມສະຫງົບແຈ້ງໃຫ້ຊາບໃນວັນທີ19 ເມສາ 2020 ນີ້ວ່າ: ໃນໄລຍະ 4 ວັນ ນັບແຕ່ວັນທີ 13-16 ເມສາ 2020 ຂອງມື້ສົ່ງທ້າຍປີເກົ່າ ແລະຕ້ອນຮັບປີໃໝ່ລາວທົ່ວປະເທດມີອຸບັດເຫດເກີດຂຶ້ນທັງໝົດ 63 ລາຍ ມີຜູ້ເສຍຊີວິດຈຳນວນ 15 ຄົນ ຍິງ 2 ຄົນ ທຽບໃສ່ປີຜ່ານມາການເກີດອຸບັດເຫດແມ່ນຫຼຸດລົງ 135 ລາຍ ແລະຜູ້ເສຍຊີວິດກໍຫຼຸດລົງເຖິງ 13 ຄົນ.

  ສຳລັບນະຄອນຫຼວງວຽງຈັນ ຍັງມີຕົວເລກຂອງການເກີດອຸບັດຕິເຫດຫຼາຍກວ່າແຂວງອື່ນໆຄື: ເກີດຂຶ້ນ 11 ລາຍ ຮອງລົງມາຕາມລຳດັບແມ່ນແຂວງຈຳປາສັກ 8 ລາຍ ໄຊຍະບູລີ ແລະແຂວງສະຫວັນນະເຂດ ແຂວງລະ 7 ລາຍ ແຂວງທີ່ມີຜູ້ເສຍຊີວິດຫຼາຍແມ່ນນະຄອນຫຼວງວຽງຈັນ ແລະແຂວງອັດຕະປື ແຂວງລະ 4 ຄົນ ໄຊຍະບູລີ 2 ຄົນ ແຂວງອຸດົມໄຊ ຫຼວງນ້ຳທາ ບໍລິຄຳໄຊ ສະຫວັນນະເຂດ ແລະສາລະວັນ ແຂວງລະ 1 ຄົນ.

  ສາເຫດຕົ້ນຕໍທີ່ພາໃຫ້ເກີດອຸບັດເຫດ ແຕ່ລະຄັ້ງແມ່ນເກີດມາຈາກການຂັບຂີ່ໃຊ້ຄວາມໄວເກີດກຳນົດເກີດຂຶ້ນ 23 ກໍລະນີ ເສຍຊີວິດ 7 ຄົນ ດື່ມສິ່ງມຶນເມົາແລ້ວຂັບ 15 ກໍລະນີ ເສຍຊີວິດ 4 ຄົນ ປ່ຽນທິດທາງກະທັນຫັນ 5 ກໍລະນີ ເສຍຊີວິດ 3 ຄົນ ສະພາບເຕັກນິກລົດ 2 ກໍລະນີ ເສຍຊີວິດ 1 ຄົນ ແລະອື່ນໆ.

  ສຳລັບພາຫະນະທີ່ຮ່ວມເກີດອຸບັດເຫດ ແລະມີຄົນເສຍຊີວິດມີລົດຈັກຕຳລົດຈັກ 16 ລາຍ ເສຍຊີວິດ 4 ຄົນ ລົດຈັກຕຳລົດໃຫຍ່ 18 ລາຍ ເສຍຊີວິດ 5 ຄົນ ລົດຈັກລົ້ມເອງ 3 ລາຍ ເສຍຊີວິດ 1 ຄົນ ລົດໃຫຍ່ຕຳເຮືອນປະຊາຊົນ 1 ລາຍ ເສຍຊີວິດ 1 ຄົນລົດບັນທຸກປີ້ນເອງ 2 ລາຍ ເສຍຊີວິດ 2 ຄົນ ແລະ ລົດໃຫຍ່ຕຳຕົ້ນໄມ້ 1 ລາຍ ເສຍຊີວິດ 1 ຄົນ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์